Pa 26 June, mu 2014, icilye ca European Court of Human Rights (ECHR) capingwile ukuti Inte sha kwa Yehova mu Russia balikwata insambu sha kupepa ukwabula ukubakaanya ku ba mu buteko. Icilye casangile ukuti icalo ca Russia tacakonkele ifyaba mu Fipande 5 (ubuntungwa ne nsambu sha kucingililwa) na 9 (insambu sha kupepa) ifyaba mu lupapulo lwa European Convention on Human Rights (Convention) ilyo bakapokola bapumfyenye amapepo icungulo bushiku pa April 12, mu 2006.

Pali ubu bushiku, Inte sha kwa Yehova mwi sonde lyonse shalilongene ku kwibukisha imfwa ya kwa Yesu Kristu ukubako cila mwaka. Aba mu filonganino fibili ifya mu musumba wa Moscow bapekenye ukulonganina pa sukulu kabili bale-enekela abantu 400 ukwisa ku kupepa. Ilyo balelongana, bakapokola abali mu myotoka 10 na mu maminibasi yabili balishile apo balelonganina, kabili baishile ne bumba lya bakapokola ilyo beta ukuti Special Police Force (OMON) ilyakwete imfuti e lyo na bakapokola bambi abengi. Bwangu bwangu bashingulwike icikuulwa, kabili bapumfyenye ukulongana nangu ca kuti tabakwete ifipepala fya mwi funde. Baebele bonse abalongene ukusalangana, lyene basokwete mu cikuulwa, bapoka impapulo shilanda pali Baibolo, kabili ku maka basendele na ba Nte abaume 14 ku kapokola no kubalonga mu cifungo. Loya uo baebele ukuti alandileko ba Nte abo baikete alifikile pa kapokola ku kubafwilisha. Bakapokola balimupikite, bamuwisha pa nshi, no kumubika umwele pa mukoshi, kabili balimutiinishe ukuti nga atwala umulandu ku cilye, bali no kukanda aba mu ng’anda yakwe. Pa numa ya ma-awala nalimo 4, abo babikile mu cifungo balibafumishe no kubaleka baya ku mayanda.

Ba Nikolay Krupko, pamo na ba Nte batatu abo baikete, batwele abalashi ku cilye pa kupumfyanya ukulongana ukwabula ifipepala fya mwi funde na pa kubekata apabula umulandu. Ilyo ifilye fya Lyublino District Court na Moscow City Court fyakeene ukukutika ku mulandu wabo, batwele umulandu ku cilye ca ECHR mu June mu 2007.

Mu mulandu uo icilye ca ECHR capingwile pa 26 June, uo baleita ukuti Krupko and Others v. Russia (Krupko na Bambi balwishanya na Russia), icilye catile: “Lyonse icilye citila, mu calo umwaba insambu sha kuisosela, na lintu bashipokele ulusa ku balashi ulwa kulongana, bakapokola tabalingile ukusalanganya abalongene nga ca kuti abo bantu balongene bantu aba mutende. . . . Nga ca kuti icilye kuti calanda ifi pa kulongana fye ukuli konse, pali bufi uku kulongana. Pantu pali uku kulongana tapaali icongo kabili takwabelele pa nse, lelo kwabelele mu cikuulwa kabili kwali kulongana kwa mapepo ukushalepumfyanya abantu bambi. Nangu ca kuti abalashi balishininkishe ukuti ukukanabeshibisha kwalengele kulya kulongana ukukanaba ukwa mwi funde, ukutuma bakapokola abengi nga nshi abasendele ifyanso pa kuti bayebapumfyanye ukulongana, no kwikata bamo abalongene pa ma-awala yatatu, takwalekabilwa pa kucingilila abantu bambi.”

Uyu e muku walenga bune uo Inte sha kwa Yehova shawina umulandu ilyo shatwele icalo ca Russia ku cilye pantu tacicindika insambu shabo. Mu 2007, ilyo icilye ca ECHR capingwile umulandu uo baleita ukuti Kuznetsov and Others v. Russia catile icalo ca Russia calipulile mwi funde ilyo abalashi bailepumfyanya ukulongana kwa citungu ukwa ba Nte bankomamatwi abalongene mu Chelyabinsk. Mu 2010, icilye ca ECHR capingwile ukuti iofeshi lya Moscow City Prosecutor’s Office lyalipulile mwi funde ilyo lyabindile akabungwe ako Inte sha kwa Yehova shalembesha mwi funde mu musumba wa Moscow. Uyu mulandu balewita ati Jehovah’s Witnesses of Moscow v. Russia. Mu 2013, icilye ca ECHR capingwile ukuti icalo ca Russia tacacindike insambu sha bantu ilyo aba mwi ofeshi lya St. Petersburg City Prosecutor’s Office bapatikishe ukuti babapeele ifipepala fya ku cipatala. Uyu mulandu balewita ati Avilkina and Others v. Russia.

Ifyo icilye ca ECHR capingwile fyaba bushininkisho na bumbi ubulanga ukuti ubuteko bwa mu Russia bulafwaya ukucincintila ukupepa kwa Nte sha kwa Yehova mu Russia, tabucindika insambu sha bantu isho ulupapulo lwa mafunde ulwa Constitution of the Russian Federation and the Convention lwalandapo.