Pa 3 August, 2018 Kapingula Inna Yangubayeva uwa mu cilye ca Leninsky District Court of Orenburg, mu Russia, alipingula ukuti munyinefwe Vladimir Kochnev na Aleksandr Suvorov babakakile mu ng’anda pa numa ya kubabika mu cifungo pa nshiku 78. Pali ubu bwine ubushiku mu cilye ca Magadan Regional Court munyinefwe Konstantin Petrov na o balimupingwila ukukakilwa pa ng’anda pa numa ya kuba mu cifungo inshiku 64. Nangu ca kuti tuletasha pa ficitike kuli bamunyinefwe batatu abo bafumishe mu cifungo, imilandu yabo tailapwa, kabili nga babasanga ne mulandu, kuti babakaka imyaka ukufika na kuli 10.

Pa 16 August, kwali ba Nte 9 abo bakakiile mu ng’anda kabili abali 25 bali mu fifungo mu ncende ishalekanalekana mu calo ca Russia. Bamunyinefwe 30 na bankashi balibeba ukusaina ifipepala fya kuti tabakafume mwi tauni bekala ukwabula ukupoka ulusa ku balashi. Twakulapepelako bamunyinefwe na bankashi abakwete aya mafya ayakalamba mu Russia.—2 Abena Korinti 1:11.