MAY 10, 2018
RUSSIA
Icilye ca Oryol Cakutika ku Bunte mu Mulandu wa ba Dennis Christensen pa Muku wa Kubalilapo
Pa 23 April, 2018, umulandu wa ba Dennis Christensen walitendeka na kabili mu cilye ca Zheleznodorozhniy District Court mu Oryol. Ba Christensen abena Denmark kabili Inte ya kwa Yehova, babekete ninshi balelongana ku kupepa mu May 2017 kabili balibabika mu cifungo ukwabula ukubalubulwisha ukutula apo babekatiile.
Ba Fomin bashicilye bapeele ba Christensen umulandu wa ‘kuteyanya imilimo ya kabungwe ako batila kalalenga abantu bafwaya ukwimina ubuteko,’ e kuti Icilonganino ca Mapepo ica Nte sha kwa Yehova mu Oryol (Local Religious Organization (LRO) of Jehovah’s Witnesses), ico babindile mu June 2016 pa mulandu wa kubabepesha uwa kuti balalenga abantu baimina ubuteko. Badubulwila baba Christensen balikaana ukuti imilandu bapeele ba Christensen ya bufi pantu icilonganino ca Nte sha kwa Yehova mu Oryol libumba fye lya bantu abapepela pamo mu mutende kabili abalongana ku kusambilila Baibolo te kabungwe akalembeshiwa mwi funde. Bandubulwila wabo bakomaile pa cishinka ca kuti abalashi ba buteko bwa Russia, balisumina ukuti tababinda imipepele ya Nte sha kwa Yehova kabili nangu lupapulo lwa calo lulapeela abantu insambu sha kusumina mu fyo imipepele yabo isambilisha. * Kanshi ilyo ba Christensen balongene pamo ku kupepa, balecita fye ifyo basuminamo.
Batendeke ukupeela ubunte pa 24 April, 2018. Bashicilye babalilepo ukwita kapokola wa ku Federal Security Service ku kupeela ubunte. Uyu kapokola atile alibikile amakamera pa nse ya Ng’anda ya Bufumu mu Oryol ukutula mu 2017 pa kuti balemona ifyo ba Nte bacita. Lelo alifililwe ukulanda ificitika mu kati, pantu ifyo balekopa fyalelanga fye ba Christensen balesengela abanabo no kubaposha ne nsansa ilyo baleingila mu cikuulwa. Bashicilye pa numa baitile umwanakashi uwalongenepo ne Nte sha kwa Yehova mu Oryol. Na lyo line, alifililwe ukulanda ifyo ba Christensen balecita pantu alesangwa fye ku kulongana ninshi tabalabinga icilonganino ca Nte sha kwa Yehova mu Oryol.
Ba Irina Christensen
Ubushiku bwa konkelepo, bashicilye baitile banakulu bantu abali ne myaka 78, Inte ya kwa Yehova ukuti bapeele ubunte. Pa numa ya kubepusha pa maawala yabili na hafu mu kufwaya ukuti basange ubushininkisho bwa kuti ba Christensen bali no mulandu, uyu nakulu bantu alandile fye ukuti ba Nte tabakwata badairekita nelyo intungulushi kabili nga balelongana tababomfya impapulo isho ubuteko bwa Russia bwabinda.
Bakatwalilila ukulubulula pa 14 May, 2018, kabili bakalubulula pa nshiku ishingi mu mweshi. Nga ca kuti ba Christensen babasanga no mulandu, bakabakaka imyaka 6 ukufika ku 10. Inte sha kwa Yehova isonde fye lyonse baletiina ukuti nalimo ifi kuti fyacitika kabili nabasakamana pa filecitikila ba Christensen na bena mwabo ba Irina.
^ para. 3 Ilyo icilonganino ca Nte sha kwa Yehova mu Oryol bacibindile, icilye icikalamba ica Supreme Court catile: “Abapepa ku Nte nabakwata insambu sha kulongana, pantu tababalesha ukulalongana no kupepa ukwabula ukulapeela abantu impapulo isho buteko bumona ukuti shilalenga abantu baimina ubuteko.”