Mu 1992 ubuteko bwa Russia bwalisuminishe Inte sha kwa Yehova ukulembeshiwa mwi funde, ici calengele bakwata ubuntungwa bwa kupepa. Mu 1999, ba Nte na kabili balilembeshe ku kabungwe ka buteko akalolekesha pa nsambu umuntu akwata isha kukonka kampingu yakwe no buntungwa bwa mipepele (Law on Freedom of Conscience and Religion Associations). Mu calo conse ica Russia mwaliba ifilonganino ifingi ifya Nte sha kwa Yehova ifyalembeshiwa mwi funde.

Na lyo line, Inte sha kwa Yehova balabacusha ica kuti tabakwata ubuntungwa bwine bwine ubwa mipepele. Ukutula mu 2009, pa kuti abalashi ba buteko bakwate apa kucushisha Inte sha kwa Yehova balanyonganya ifunde (Law on Counteracting Extremist Activity) ililesha impapulo ne fintu fimbi ifingalenga abantu baimina ubuteko. Ifilye fya mu Russia fyalanda ukuti impapulo ishingi isha Inte sha kwa Yehova ukubikako fye na webusaiti ya jw.org fyaba pa fintu ifingalenga abantu baimina ubuteko. Bakapokola balisokota mu mayanda ayengi aya ba Nte na mu fifulo bapepelamo. Pa mulandu fye wa kuti Inte sha kwa Yehova balalongana pamo, bashicilye balibapeela imilandu ya kupula mu mafunde ya buteko.

Nangu ca kuti icilye cikalamba ica European Court of Human Rights no tubungwe tumbi utwa mwi sonde fyalyeba ubuteko bwa Russia ukuleka ukucusha ba Nte, ubuteko tabwabikako sana amano. Abalashi ba buteko e lyo bacililemo ukulesha Inte sha kwa Yehova ukubomba umulimo wabo.