Bakapokola mu misumba ukucila pali 7 mu calo ca Russia balisanshile Inte sha kwa Yehova. Bakapokola ababa mwi bumba lya ba OMON, balasansa ba Nte inshita shimo ninshi nabasenda ne mfuti isha maka, nabafwala ne fya kubafisa pa menso, kabili nga baingila mu mayanda ya Nte sha kwa Yehova, balasonta abo basanga imfuti no kubasenda mu kulubulula na mu kubacusha nampo nga baice nelyo bakalamba.

Ukufuma mu 2017, abalashi ba buteko balitendeka ukufwailisha ba Nte pa milandu 10, kabili ba Nte 5 abaume balibakakile. Pali aba 5 paba na ba Dennis Christensen, abo babikile mu cifungo ukwabula ukubalubulwisha pa 25 May mu 2017. Ba Arkadya Akopyan ba Nte na bambi abali ne myaka 69, balabalubulwisha mu calo ca mu Russia ica Republic of Kabardino-Balkaria. Aba bonse kuti babakaka imyaka ukutampila pali ibili ukufika kuli 10 pa mulandu fye wa kuti balelongana pamo ku kupepa Lesa.

Pa 20 April mu 2017, icilye cikalamba ica Supreme Court of the Russian Federation calibindile imilimo yonse iya kabungwe ka mwi funde aka Nte sha kwa Yehova aka Administrative Center of Jehovah’s Witnesses e lyo no tubungwe twa mwi funde tumbi 395. Ilyo kwali ukulubulula muli ici icilye, aba mu buteko bwa calo ca Russia balandile ukuti nangu ca kuti bali no kupoka fyonse ifyo utu utubungwe tubomfya, bali no kusuminisha ba Nte ukutwalilila ukupepa. Nomba ifyo balecita pali ino nshita nafipusana ne fyo balandile mu cilye.

Apo abalashi ba buteko balipoka kale fyonse ifyo utubungwe twa mwi funde utwa Nte sha kwa Yehova twalebomfya, nabatendeka no kupoka ifipe fya Nte sha kwa Yehova e lyo no kubasansa pa kuti baleke ukupepa. Pali ino nshita ba Nte ukucila pali 175,000 ababa muli ici calo balabapeela umulandu pa mulandu fye wa kupepa.

Ukutendekela mu January mu 2018, abalashi ba buteko balitendeka ukucusha sana Inte sha kwa Yehova.

Pa 20 April mu 2018, mu Shuya, mu Citungu ca Ivanovo: Abalashi ba buteko balisokwete mu mayanda 4 aya ba Nte. Abalashi balisendele ba Dmitriy Mikhailov ku kapokola no kubabika mu cifungo, lyena pa numa balibafumishe. Abalashi balitendeke ukubafwailisha kabili babomfeshe ifunde lyaba mu Cipandwa 282.2(2) ica lupapulo lwa Criminal Code pa kubapeela umulandu wa kuba mwi bumba lya fipondo ifilwisha ubuteko. Balibabinda ukufuma mu musumba wa Shuya mpaka ilyo bakabasuminisha.

Pa 19 April mu 2018 mu Vladivostok: Bakapokola e lyo na ba mu kabungwe ka Federal Security Service (FSB) balingiile mu muputule umo no kusenda ba Valentin Osadchuk e lyo na banakulubantu batatu ku kapokola mu kubalubulwisha. Abalashi ba buteko babomfeshe ifunde lyaba mu Cipandwa 282.2(2) ica lupapulo lwa Criminal Code pa kupeela ba Osadchuk umulandu, kabili ici kuti calenga babakaka imyaka ibili ukufika kuli 4. Pa numa ya kubapeela umulandu, balibabikile mu cifungo ukwabula ukubalubulwisha. Pa 23 April, aba mu cilye ca Frunzenskiy District Court bapingwile ukuti ba Osadchuk bakatwalilila ukuba mu cifungo ukwabula ukubalubulwisha mpaka pa 20 June mu 2018. Pali ino nshita bababika mu cifungo beta ukuti Investigation Prison No. 1 icaba mu Vladivostok.

Pa 18 April mu 2018, mu Polyarny, mu Citungu ca Murmansk: Bakapokola na ba mu kabungwe ka OMON abafwele ifya kuifisa pa menso, balile icungulo bushiku ku ng’anda ya ba Roman Markin ninshi nabasenda ne mfuti, kabili ilyo bafikile balipantwile iciibi no kwingila. Lyena balibasontele imfuti no kubeba ukulaala pa nshi. Ilyo umwana wabo umukashana amwene bakapokola bali ne mfuti, awile pa nshi ninshi naikata na maboko ku mutwe. Bakapokola balisokwete ing’anda yonse no kusenda ba Markin ku kapokola uko bailebabika mu cifungo ukwabula ukubalubulwisha.

Ubushiku bumo bwine, bakapokola balisokwete mu mayanda ya ba Nte na bambi 14 kabili balibapokele amafoni, amatabuleti, ne fintu fimbi ifyo basangile. Lyena bakapokola balisendele ba Nte ku kapokola uko baile mu kubalubulwisha no kubacusha. Bakapokola balitendeke ukufwailisha ba Markin na ba Nte banabo ba Viktor Trofimov. Bonse babili babapeele umulandu waba mu Cipandwa 282.2(1) mu lupapulo lwa Criminal Code uwa kutungulula ibumba lya fipondo ifilwisha ubuteko. Umuntu nga bamusanga no yu umulandu kuti bamukaka imyaka 6 ukufika kuli 10. Aba baume babili bababika mu cifungo beta ukuti Prison No. 1 mu Murmansk.

Pa 10 April mu 2018, mu musumba wa Zaton, mu Ufa: Ukufuma ku ma 6:30 ukufika 7:00, abafwailisha imilandu na ba mu kabungwe ka OMON balingiile no kusokota mu mayanda ya Nte sha kwa Yehova ayengi. Tabalesokota fye amayanda, lelo balelubulwisha ba Nte no kubacusha. Ilyo balelubulwisha Nte umo, bakapokola bamwebele ukuti: “Tulekulekelako nga walanda fye ukuti tauli Nte ya kwa Yehova.” Nte umbi bamwebele ukuti: “Tuli no kumulofya pa calo.” Ba Nte bonse balibasendele ku kapokola uko bailebafwatikisha iminwe mu fitabo fya bakapokola no kutwalilila ukubalubulwisha.

Ilyo bakapokola baingile mu ng’anda ya ba Khafizov, balisontele ba Khafizov na bena mwabo imfuti, kabili balitendeke ukusokota mu ng’anda na mu lubansa. Ilyo bapwile ukusokota, kapokola umo aikete bana Khafizova pa kuboko bukali bukali no kubasunkila muli motoka kabili babatwele ku kapokola ku kubalubulwisha. Ba Khafizov te Nte ya kwa Yehova.

Bakapokola balingiile mu ng’anda ya ba Anatoliy Vilitkevich no konaula ifipe fyabo kabili balibekete. Bakapokola baebele abena mwabo ukuti pakakokola sana pa kuti bakamone ba Anatoliy Vilitkevich na kabili. Bakapokola balibapeela umulandu waba mu Cipandwa 282.2(1) mu lupapulo lwa Criminal Code uwa kutungulula ibumba lya fipondo ifilwisha ubuteko. Pali ino nshita balibakaka ukwabula ukubalubulwisha ukufika pa 2 June mu 2018. Umuntu nga bamusanga no mulandu uo bapeela ba Anatoliy Vilitkevich, kuti bamukaka imyaka ukufika kuli 10.

Mu March mu 2018, mu Oryol: Abalashi ba buteko balafwailisha ba Dennis Christensen, kabili pali ino nshita balitendeka ukufwailisha ba Sergey Skrynnikov. Ba Sergey Skrynnikov ni ba Nte kabili batendeke ukubafwailisha pa numa ya kusokota amayanda 7 mu Oryol mu May mu 2017. Ba Skrynnikov tabalabapeela umulandu uuli onse, lelo bakapokola bafwaya ukubapeela umulandu waba mu Cipandwa 282.2(2) mu lupapulo lwa Criminal Code uwa kuba mwi bumba lya fipondo ifilwisha ubuteko. Umuntu nga bamusanga no mulandu bapeela ba Skrynnikov, kuti bamukaka imyaka ibili ukufika ku myaka 4.

Pa 7 February mu 2018, mu Belgorod: Abalashi ba buteko abengi nga nshi balingiile no kusokota mu mayanda 10 aya Nte sha kwa Yehova. Aba abalashi balipatikishe abo basangile muli aya amayanda ukulaala pa nshi e lyo bambi balibashintilike ku cibumba bubi bubi. Lyena batendeke ukusokota mu mayanda no kusenda ifyo balesanga pamo nga ifitupa fya kubomfya pa kwenda, ifikope ne ndalama. Lyena balisendele ba Nte bonse ku kapokola uko baile mu kubalubulwisha no kubacusha kabili pa numa balyebele bonse ukufuma, ukufimishako fye ba Anatoly Shalyapin na ba Sergei Voikov. Bakapokola balishile aba abaume mu cifungo, lyena pa numa ya nshiku shibili balibafumishe. Na lyo line, ilyo babafumishe babebele ukuti tabafwile ukulafuma mu Belgorod.

Pa 23 January mu 2018, mu Kemerovo: Bakapokola balingiile no kusokota amayanda 12 aya Nte sha kwa Yehova kabili balibapokele ifipe, impapulo ishilanda pa fya kwa Lesa, e lyo ne fintu fimbi. Ilyo bakapokola bashilasansa ba Nte, kwali umuntu uwaifungushenye ukuti ni Nte ya kwa Yehova kabili alilongeneko ilyo balelongana no kukopa ukulongana konse e lyo atwala vidio akopele kuli bakapokola. Lyena bakapokola balebomfya iyi vidio pa kuti bafyenge ba Nte ukuti fipondo ifilwisha ubuteko.

Ubuteko bwa calo ca Russia tabulebomfya fye bakapokola na ba FSB ukucusha ba Nte, lelo bulefwaya no kupoka Inte sha kwa Yehova abana. Pa 14 November mu 2017, mu bupingushi bwalenga 44, icilye cikalamba ica Supreme Court Plenum of the Russian Federation capingwile ukuti: “Abafyashi” ababa mu filonganino fya mapepo ifyo babinda ifyo batila “tubungwe twa fipondo ifilwisha ubuteko,” bafwile “ukubapoka abana” nga ca kuti balesambilisha abana babo ifya mapepo no kutendeka ukubasambilisha ifintu fimbi.

Pa 23 November mu 2017, icipani ca buteko icilolekesha pa masambililo ne fya sayansi calandile ukuti abana abo basambilisha ifya mapepo ifingalenga balalwisha ubuteko, “bafwile ukubafumya ku bafyashi babo pa kuti balebasambilisha ifintu fimbi.” Aba muli ici cipani balandile ukuti abafyashi ababa mu kabungwe beta ukuti ISIS e lyo ne Nte sha kwa Yehova, e bo bafwile ukupoka bana babo. Abana abakwata abafyashi babo ba Nte mu Russia, “bengi icine cine.” Pali ino nshita tapalaba Inte sha kwa Yehova abo bapoka abana babo.

Takwaba icalo icaba mu kabungwe ka Council of Europe icicusha abantu abapepa mu mutende nga fintu icalo ca Russia cicita. Inte sha kwa Yehova mu Russia tabakwata ubuntungwa bwa kulongana mu kupepa na mu kusambilila Baibolo. Pa kuti bebekata no kubapeela imilandu, bapepela mu bumfisolo, nga fintu balecita ilyo ici calo baleciita ukuti Soviet Union.

Inte sha kwa Yehova mwi sonde lyonse baliba sana no bulanda pa fyo bamunyinabo mu Russia balebacusha. Ba Philip Brumley, bandubulwila abalandilako Inte sha kwa Yehova batile: “Ubuteko bwa calo ca Russia bulingile ukucindika insambu abantu bakwata isha kupepa uko balefwaya nga fintu bwalaya ifyalo fimbi ukuti e fyo bukalacita. Nomba apo ubuteko nabuleka ukulwisha utubungwe twalembeshiwa mwi funde utwa Nte sha kwa Yehova no kutendeka ukubika ba Nte mu cifungo, finshi fili no kucitikila Inte sha kwa Yehova mu Russia?”