Pa 3 May, 2018, icilye ca Saint Petersburg City Court cikalakutika ku mulandu Inte sha kwa Yehova shatwala uwakuilishanya pa fyo icilye cimbi capingwile ukuti ubuteko bupoke ifikuulwa fyabo ifya musambo. Ba Nte nga balusa uyu mulandu, ubuteko bukapoka ifikuulwa ilyo line fye.

Pa kubala, icilye ca Sestroretskiy District Court tacabikile amano ku bushininkisho ubwa kuti abene ba maofeshi ya ba Nte ni ba Watch Tower Bible and Tract Society of Pennsylvania (WTPA), akabungwe akashicita amakwebo akabela ku calo ca United States. Ukutula apo akabungwe ka WTPA ka kwatila aya ofeshi napapita imyaka 17 kabili lyonse kalalipila imisonko. Na lyo line pa 7 December, 2017, icilye capingwile ukuti akabungwe ka WTPA te kene ka aya maofeshi. Ba Nte nga balusa uyu mulandu batwala ku cilye icikalamba kabili bakatwale uyu mulandu na ku filye fimbi mu Russia ukwabula ukupokelela ubupingushi ubusuma, ninshi bakatwala umulandu ku cilye icikalamba mu Bulaya ica European Court of Human Rights.

Bakatendeka ukulubulula ulucelo ne nshita ya 11:30, pa 3 May, 2018, mu cilye ca Saint Petersburg City Court, ul. Basseynaya, 6, St. Petersburg, ku Russia.