Pa 12 May mu 2015, icilye ca Gwangju District Court capingwile ukuti Inte sha kwa Yehova batatu tabapangile umulandu ilyo bakeene ukwingila ubushilika. Bashicilye mukalamba ba Choi, Chang-seok balandile ukuti: “Tufwile ukwishiba ukuti Ulupapulo lwa calo lwalisuminisha ukukaana ukwingila ubushilika pa mulandu wa kampingu.” Balandile no kuti: “Nga ca kuti insambu isho abantu bakwata shapusana ne fyo ulupapulo lufwaya abantu ukucita, tufwile ukusenda ifintu mu nshila ya kuti insambu shilecindikwa e lyo na mafunde yalekonkwa.” Inte sha kwa Yehova baleenekela ukuti ababapeele umulandu balautwala ku cilye cimbi ilyo inshiku 7 tashilapwa.