Pali Cine pa 30 August, 2018, icilye icikalamba ica mu South Korea ica Supreme Court caliteka umulandu apali na bakapingula 13 pa mulandu wa Nte sha kwa Yehova batatu abakaana ukwingila ubushilika pa mulandu wa kuti kampingu yabo taibasuminisha. Bakapingula bonse 13 pa maawala yane baleipusha baloya baba Nte e lyo na bantu bambi pali uyu mulandu, ifi bapoosele inshita iikalamba ukwipusha cilanga fye ukuti abantu abengi mu Korea tabatemwa ifyo ubuteko pa myaka iingi bukaka abakaana ukwingila ubushika. Pa nshita iikalamba bakapingula balilanshanye pa fyo icilye ica Constitutional Court capingwile pa 28 June, 2018, ilyo capingwile ukuti abapanga amafunde mu Korea batendeke ukubomfya ifunde ilisuminisha umuntu uushilefwaya ukwingila ubushilika pa milandu ya cine cine ukuti alebombako imilimo imbi iya buteko iishili ya bushilika ukucila ukumubika mu cifungo kwati cipondo. Baloya balombele icilye ukukanasanga bamunyinefwe batatu no mulandu, pa kuti ifilye ifinono na fyo fikakonke ubu bwine ubupingushi mu milandu imo ine ukucila pali 900 iyo bashilapingula iicili mu filye. Nomba cashalila icilye icikalamba ica Supreme Court ukusala ilyo cikapingula ne fyo cikapingula umulandu wa ba Nte batatu abo bakutike imilandu yabo.

Ifwe pamo na bamunyinefwe ukucila pali 100 abacili mu cifungo, tulesubila ukuti tukatwalilila ukulindilila Lesa we pusukilo lyesu.—Mika 7:7.