Ifilecitika mu South Korea filelanga ukuti ubuteko bulefwaya ukwaluka pa kuti bulecindika insambu sha bantu. Pa 7 December, 2017, kateka wa calo ca South Korea Jae-in Moon, akumene na balashi ba kabungwe kalolekesha pa nsambu sha bantu aka National Human Rights Commission (NHRC) kabili abepwishe ifyo engacita pa kuti ubuteko buwamyeko ifyo bucita pa kucindika insambu sha bantu ukulinga na mafunde ayo ifyalo filingile ukukonka. Kateka Moon aipwishe aba ku kabungwe ka NHRC ukulanda ifyo balemona ukuti kuti fyayafwa ubuteko ukufumyapo amafunde ayalenga balekaka abaume abakaana ukwingila ubushilika pa mulandu wa kuti kampingu yabo taibasuminisha.

Ilyo uku kukumana kwapwile, Inte sha kwa Yehova mu South Korea bapekenye kampeni ya kulomba abantu ukusaina pa fipepala fya kulombelapo bakateka. Ifunde lya buteko lya kuti uwakaana ukwingila ubushilika pa mulandu wa kuti kampingu yakwe taimusuminisha alingile ukukakwa, lyalikuma sana ba Nte pa myaka iingi. Apo Kateka Moon aliyeba abalashi ukwasuka abekala calo abalelomba ubuteko ukubacitilako fimo, balembele ukulomba kateka ukufwayako inshila iyo engafwilamo ukupwisha amafya abakaana ukwingila ubushilika pa mulandu wa kampingu baculako pa myaka 70.

Papitile fye imilungu ine ukutula apo kampeni yatendekele, balipwile ukusaina pa fipepala fya kulombelapo kateka. Abasaine pa fipepala bali abaume ukucila 14,000, abo bakakilepo pa mulandu wa kukaana ukwingila ubushilika kabili indupwa ukucila pali 26,000 abaculile pa mulandu wa kuti abaume mu ndupwa shabo balibapeele umulandu no kubakaka.

Pa 15 January, 2018, abantu 6 abaleimininako ba Nte 41,275 abasaine ifi fipepala batwele ifi fipepala kwi ofeshi lya kwa kateka. Balilembelepo ne fyo batashishe pa fyo kateka alefwaya ukupwisha ubu bwafya ubwacusha abantu pa myaka 70 iyo abakaana ukwingila ubushilika bababika mu cifungo kabili balilembele na pa busuma ubwakupwishisha ubu bwafya. Pa 16 January, 2018, iofeshi lya kwa kateka lyalitwele ifi fipepala ku cipani cilolekesha pa kucingilila icalo pa kuti babelengemo.

Ilyo balepekanya ifi fipepala, abaleimininako Inte sha kwa Yehova nabo balilemonana na ba kukabungwe ka NHRC. Balilelondolola ifyo amalembo yalanda ifilenga Inte sha kwa Yehova balekaana ukwingila ubushilika. Nga ca kuti babapeelako imilimo imbi iya buteko iishili ya bushilika, ba Nte abaume abacaice abalembesha ukubomba iyi milimo te kuti baleikala mu cifungo lelo kuti balebombela ubuteko kabili icalo kuti cilenonkelamo. Aba kuli aka kabungwe baebele ba Nte ukuti mu 2018 akabungwe ka NHRC kalefwaya kabombele sana pa nsambu sha bantu isha kukaana ukwingila ubushilika pa mulandu wa kuti kampingu yabo taibasuminisha.

Impendwa ya bantu abo bakaka pa mulandu wa kukaana ukwingila ubushilika mu South Korea yalicila sana pa mpendwa ya bafungwa ababa mu fyalo ifingi. Ilyo abalashi balefwaya inshila ya kupwishishamo ubu bwafya, Inte sha kwa Yehova balesubila ukuti ifi ubuteko bulefwaya ukucita fikapwisha amafya ayo ba Nte abaume abacaice baculako pa myaka iingi iyapita pa mulandu fye wa kukaana ukwingila ubushilika. Pamo bonse abo bakakapo mu cifungo bapoosa imyaka ukucila pali 36,700.