Mu ncende umo inkondo ikosele sana pamo nga mu musumba wa Mariupol, amalaiti takuli ne fya kwasha pa kuti mu muputule mukabe nafyo tafilebomba. Amafoni na Intaneti ifya kubomfya pa kulanshanya na fyo tafilebomba. Amawindo mu mayanda ayengi nayatobaika. Ifya kulya na mashi ya kunwa naficepa. Bamunyinefwe na bankashi ukucila pali 2,500 nabafilwa ukufuma mu musumba wa Mariupol. Ilyo icalo ca Ukraine ne calo ca Russia balanshenye ukuti baleke abantu bafulumuke ukuli sana inkondo, abantu bamo balikumanisha ukufulumukamo mu misumba imbi pamo nga umusumba wa Bucha, Chernihiv, Hostomel, Irpin, Kyiv, na umusumba wa Sumy. Ici calilenga na bamunyinefwe na bankashi bafulumuke no kuya ku ncende ukushali inkondo.

Munyinefwe uuli ne myaka 36 eluda kabili painiya wa nshita yonse uwaleikala mu musumba wa Hostomel, alifulumuka no mwina mwakwe na bafyashi bakwe. Alondololwele ifya bacitikile ilyo inkondo yatendeke mu musamba baleikala.

Atile: “Indeke shalepupuka pa muulu wa ng’anda yesu. Ama motoka ya bashilika yali fye mpanga yonse na mu misebo inshita yonse fye mwaleba fye ishi myotoka. Abashilika balingile mu ng’anda yesu ninshi tuli mu muputule wabela panshi. Umo alilishishe imfuti imiku iingi mu muputule twalimo. Impolompolo yalashile mu cola ca bamayo ica kufulumuka na co, lelo tayacenene uuli onse. Pa ma-awala yatatu nelyo 4, tatwaselele nelyo ukupanga icongo nangu fye panono ilyo amabomba yalepuulika na lintu balelasa imfuti mu ng’anda. . . . Ulucelo lwakonkelepo ilyo twaninine motoka muli motoka yesu ukuti tufumeko, abashilika balyambile ukulwa mupepi fye napo twali. Ifimamotoka fya bashilika ifikalamba fyali mu musebo . . . Ala ukwenda mu musebo kwalyafishe sana, nomba ukwikala kuli iyi ncende e kwabipishe sana ukucila na pa kwenda mu musebo.

“Ifi fyonse ifyacitike fyalyalwile ubumi bwesu. Natusambilila ifya kubomfya amashinte ya mafunde ya mu Baibolo ayengi. Ku ca kumwenako, twalisambilila ifya kusakamana fye ifya bushiku bumo, ukuteka umutima ku fyo tukwete, ne fya kucetekela Yehova ilyo ifintu fya-afya sana.”

Natwishiba ukuti Lesa, Yehova naishiba bwino amafya bamunyinefwe na bankashi mu Ukraine bakwete. Takafilwe ukubafwa.—2 Petro 2:9.

Ilyo 10 March 2022 yalefika, aya e malipoti twapokelele pa filecitika ku Ukraine:

• Bakasabankanya babili balifwa

• Bakasabankanya 8 balicenekwa

• Bakasabankanya 25,407 balifulumuka mu mayanda no kuya ku ncende ukushali inkondo mu Ukraine mwine

• Amayanda 25 yalionaikilila fye

• Amayanda 59 yalionaika

• Amayanda 222 yalionakako panono

• Amayanda ya Bufumu 7 yalionaika

• Balipanga Amakomiti ya Kwafwilisha Abaponenwe na Masanso Ayakalamba (DRCs) ayali 27 mu Ukraine

• Bakasabankanya 10,566 balibafwilisha kuli aya amakomiti ukusanga ukwa kwikala uko bengacingililwa

• Bakasabankanya 9,635 balifulumukila ku fyalo fimbi kabili balebafwa ku ba bwananyina