Ukutendeka mu August, mu 2014 ba Nte abali 26 balibasenda kabili balabacusha ku mabumba ya bantu abenda ne fyanso aba ku kabanga ka Ukraine. Abalenga ukuti aba bantu balecita ifi, ba mu mipepele abapata ba Nte. Ba Nte abengi bekala muli ici citungu, kabili balishibikwa ukuti balabila imbila nsuma kabili tabengila mu fya mapolitiki. Amabumba yamo ayakwata ifyanso yalacusha sana ba Nte pantu kuli iyi ncende takwaba amafunde kabili kwaba fye icimfulumfulu. *

• Pa 21 May, mu 2015, bakapokola mwi tauni lya Stakhanov balikete abaume babili ba Nte abaali ne myaka ukucila pali 60 pa mulandu wa kuti, baleebako abantu bambi pali Lesa. Babapeele umulandu wa kuti “baleleta icimfulunganya” kabili babapingwilile ukukakwa inshiku 15. Ilyo bali mu cifungo, aba ba Nte babili babapeele umulandu wa kuti bali ni nengu, kabili libili libili balebepukishisha pa fyo icilonganino ca Nte sha kwa Yehova caba. Ba Nte abo balelongana nabo baleya mu kupaapaata kuli shicilye uwa kuli iyi ncende pa kuti abafumye, lelo alikeene. Pa kubala, bakapokolola tabalesuminisha ba lupwa na ba Nte banabo ukuya mu kumona aba baume, lelo mu kupita kwa nshita balibasuminishe ukulabatwalila ifya kulya, ifya kufwala, no muti, imiku itatu mu mulungu. Nte umo balimufumishe pa 2 June mu 2015, e lyo umbi bamufumishe ubushiku bwakonkelepo, kabili babebele ukufuma kuli ici icitungu.

• Pa 17 May, mu 2015, abaume abali ne mfuti aba mu Novoazovsk balikete ba Nte 4 kabili balibakakile icisalu pa menso, e lyo babasenda ninshi na babasonteka ne mfuti no kubatwala ku maofeshi yakalamba aya bashilika. Aba baume balyumine ba Nte bubi bubi pa maawala yabili kabili balebatiinya ukuti balabepaya. Baebele Nte uwalipo umwaice ukwingila ubushilika no kuti bonse balande ukuti ukupepa kwa cine, kupepa kwa ba Orthodox. Ba Nte balibafumishe ubushiku bwakonkelepo pa numa ya kulaala mu cifungo umo batitikene icine cine.

• Pa 22 January, mu 2015, abaume batatu abaali ne mfuti balisendele Nte umo ku maka, uwalebomba mu Donetsk. Balupwa wakwe tabaishibe uko bamutwele ne co bamusendeele. Ilyo bamusendele, libili libili alebalondolwela ukuti taaba mu mapolitiki kabili balimulekele aya pa numa ya nshiku 9.

• Pa 9 August, mu 2014, ibumba lya baume abali ne mfuti balisendele ba Nte babili mu Stakhanov mu citungu ca Luhansk. Balibasungile pa nshiku 6, baleboma sana kabili balebatiinya kwati balabaputulako ifilundwa fya mubili nelyo kwati balabepaya. Tabalebapeela ne fya kulya, amenshi, ifya kufwala no muti. Ababasendele balefwaya ukupatikisha ba Nte ukuti balande ukuti baleka ukuba ba Nte no kuti balande ifisumino fye calici ca Orthodox, no kulanga umucinshi ku filubi ifyo balenga. Ifi bacitile fyalelanga fye ukuti icalengele basende ba Nte ni pa mulandu wa mipepele yabo. Nangu babacushishe ifi, ba Nte balikeene ukucita ifyo balebapatikisha.

Inte sha kwa Yehova balakonka sana ifyo basuminamo kabili tabalwako inkondo, ukucita kampeni, nelyo ukulipila indalama sha kutungilila abalelwa mu Ukraine. Amabumba ya bantu ababa ne mfuti balasansa ba Nte pa mulandu wa kuti tabengila mu mapolitiki kabili tabakonka ifyo ba Orthodox basuminamo. Ico babacushisha, kufwaya ukubapatikisha ukuti baleke ukuba Inte sha kwa Yehova.

Apo kuli ici icitungu kwalitwalilila ukuba ifimfulunganya, takwaba ifyo ba Nte bengacita pa kupwisha amafya bakwata. Balitwala imilandu ya musango uyu ku tubungwe twa mwi sonde, ukubikako fye na kabungwe ka UN Special Rapporteur on Torture.

Nangu ca kuti Inte sha kwa Yehova abekala ku kabanga ka Ukraine balabacusha, balikaana ukwingila mu mapolitiki kabili balitwalilila ukupepa mu bumfisolo. Balasubila ukuti abalashi ba buteko bakabapeela insambu pa kuti bakabe no buntungwa bwa kupepa.