Icilye icikalamba ica mu Ukraine capingwile ukuti abakaana ukwingila ubushilika pa mulandu wa kampingu yabo nabo balikwata insambu sha kubombako imilimo imbi iya buteko iishili ya bushilika na lintu kuli ifimfulunganya ne nkondo. Ifi icilye capingwile fikakuma sana insambu sha bantu mu Ukraine e lyo na mu fyalo fimbi.

Ba Vitaliy Shalaiko ni Nte ya kwa Yehova, kabili balibapeele umulandu wa kukaana ukwingila ubushilika ilyo icalo ca Ukraine caleipekanya ukuya ku kulwa inkondo. Ico babapeleele uyu umulandu ni co balilombele ukuti babapeeleko imilimo imbi iya buteko iishili ya bushilika ilyo babebele ukuyaingila ubushilika. Icilye uko batwele ba Vitaliy Shalaiko tacabasangile no mulandu ne cilye cimbi ico bashicilye batweleko uyu mulandu na co cine tacabasangile no mulandu. Lelo bashicilye na kabili batwele uyu mulandu ku cilye icikalamba ica High Specialized Court of Ukraine for Civil and Criminal Cases. Pa 23 June, mu 2015, icilye icikalamba calikeene ukukutika kuli uyu mulandu, ici calengele ukuti bakonke ubupingushi ubo icilye icinono capingwile.

Icilye icikalamba ica High Court calisuminisheko ukuti “ifyo icilye icinono capingwile fyali fye bwino pantu fyalilingene ne fyo akabungwe ka European Convention on Human Rights ne fyo icilye ca European Court of Human Rights capingwile. Icilye icikalamba calisumiine ukuti icilye icinono calicitile fye bwino ukukonka ifyo bapingwile umulandu wa ba Bayatyan v. Armenia. Icilye ca European Court of Human Rights e capingwile uyu mulandu wa ba Bayatyan v. Armenia pa 7 July, mu 2011. Icilye capingwile ukuti mu Cipandwa 9 ica European Convention on Human Rights calilanda ukuti umuntu kuti akaana ukwingila ubushilika pa mulandu ne fyo asuminamo. Mu mulandu wa ba Vitaliy Shalaiko, icilye icikalamba ica mu Ukraine catile insambu sha bantu abakaana ukwingila ubushilika shalicingililwa na lintu icalo cilepekanya abashilika aba kuya ku nkondo te pa nshita fye ilyo baleingisha abantu ubushilika. Ifyo icilye icikalamba capingwile e fyo bali no kukonka, kabili takwali icilye ico bali no kutwalako umulandu.

Ifi icilye capingwile fyalengele ba Shalaiko baleke ukusakamana sana. Ba Shalaiko batile: “Ninjiba ukuti icalo cesu cilefwaya ukwingisha abashilika pa kuti bacingilile abekala calo. Nangu ca kuti kampingu yandi tainsuminisha ukwingila ubushilika, kuti natemwa ukubombako imilimo imbi iya buteko iishili ya bushilika. Ndetasha sana icilye pa kunsuminisha ukukaana ukwingila bushilika pa mulandu ne fyo nasuminamo.”

Inte sha kwa Yehova abengi nga nshi mu Ukraine balabapatikisha ukwingila ubushilika. Kanshi abo bapeela umulandu wa kukaana ukwingila ubushilika nomba kuti babomfya ifyo bapingwile mu mulandu wa ba Vitaliy Shalaiko ilyo baya ku cilye.

Ba Vadim Karpov, bandubulwila ba ba Shalaiko, basosele ukuti: “Mu mashiwi ayayanguka, icilye icikalamba calondolola ukuti apo ba Shalaiko ni Nte ya kwa Yehova tabengabapeela umulandu wa kukaana ukwingila ubushilika. Nangu fye ni mu calo pamo nga Ukraine, umwaba inkondo ne fimfulunganya, na cicindama ukuti ici calo cilekonka amafunde ifyalo fyonse fikonka aya kupeela abantu ubuntungwa bwa kupepa no buntungwa bwa kucita ifyo kampingu alebeba.”

Ifilye fya mu Ukraine nafisumina ukuti umuntu alikwata insambu sha kukaana ukwingila ubushilika, kabili ishi nsambu shilingile ukucingilila umuntu na lintu icalo cilepekanya ukulwa inkondo. Umuntu nga akaana ukwingila ubushilika tacilolele mu kuti ninshi aliitemwa nelyo ukuti ninshi icalo tacacingililwe. Ifi icilye icikalamba casuminishe ku bupingushi bwa filye ifinono, cilelanga ukuti icilye icikalamba na cicindika insambu sha bena Ukraine bonse. Ifi icalo ca Ukraine cicitile, cikalenga ifyalo fimbi ifikanda abakaana ukwingila ubushilika pa mulandu wa kampingu yabo fikaleke ukubakanda.