Ba Dorothy Mae Sennett Covington, abayafwilishe sana ba Nte muli ba 1940 na muli ba 1950 pa nsambu shabo, balifwa pa 14, March mu 2015, mu Cincinnati, Ohio, ninshi bali ne myaka 92.

Muli ba 1940, ba Dorothy baliipeeleshe ukubomba umulimo wa kwafwilisha ba Victor Schmidt, abali ni ba Nte kabili abalelandilako Inte sha kwa Yehova mu filye. Pali iyi inshita ba Nte balebacusha sana mu America pa mulandu wa kuti abantu balitemwishishe icalo cabo ilyo Inkondo ya Calo iya Bubili yaleya ilebipilako. Icalengele ukuti ifi fyonse filecitika ni co ba Nte tabalecitako ifyo abantu balecita pa kucindikisha icalo cabo kabili balekaana ukuya ku nkondo. Icitabo citila The Lustre of Our Country calandile ukuti “pa mipepele yonse iyaliko muli ba 1900 mu America, ba Nte e bo bacushishe sana mu 1941 ukufika mu 1943.

Ba Nte mu America balebasansa sana ku bantu kabili abengi balibakakile, kabili ifi fyalecitika na mu musumba wa Cincinnati, mu Ohio, e lyo na ku citungu ca Indiana. Ba Victor Schmidt, baleya muli ifi ifitungu pa kulandilako Inte sha kwa Yehova abo bakakile apabula imilandu iine iine. Ba Dorothy tabaleyafwa fye ba Victor Schmidt mu mulimo balebomba, lelo bali abashipa pantu balebomba no mulimo wa kubila imbila nsuma nangu ca kuti umuntu nga alecita ifi kuti balamucusha ku mabumba ya bantu.

Ba Dorothy baleibukisha sana ifyacitike ifyalengele kube ifimfulunganya mu musumba wa Connersville, ku Indiana. Mu 1940, ilyo papitile fye inshiku 17 ukutula apo Icilye Cikalamba capingwilile umulandu wakumine isukulu lya Minersville School District na ba mwana Gobitis, uwa kupika sulupu ku mendela, bakapokola balikakile ba Nte 6 kabili balibapeele umulandu wa kukanacindika imendela pa kukanapika sulupu ku mendela iyo babika ku ca kufwala, iya calo ca America. Uku kwine ku Connersville e ko ba Victor Schmidt na ba Hayden Covington, abali bandubulwila ba Nte sha kwa Yehova ukufuma mu 1939 ukufika mu 1963, balandiileko ba Nte babili abo mu kuya kwa nshita bapeele imilandu ya bufi.

Pa numa ya kulanda amashiwi ya kulekeleshako mu cilye, ba Covington balifumine pa kuti babutukile ukunina indeke iyaleya ku Maine uko bali no kulubulula umulandu umbi, lelo ba Victor Schmidt na bena mwabo balishele pa kuti bomfwe ifyo bashicilye balapingula. Ilyo bapwile ukupingula, ibumba lya bantu lyalibasanshile. Nangu ca kuti ba Victor, abena mwabo pamo nabo bali nabo balifyukile, balibapumine icine cine.

Ilyo ba Dorothy balebepusha ninshi kwashala fye imilungu itatu ukuti bafwe, balandile ukuti ilyo papitile fye imyeshi 10 ukufuma pali bulya bushiku, ba Nte na bambi 75 mu Connersville balibabepeshe imilandu imo ine kabili balibakakile. Ba Dorothy batile: “Pali iyi nshita, fwe bengi balitwikete kabili iyi e nshita baletucusha sana.”

Ba Hayden Covington, ba Victor Schmidt e lyo na bambi balitwalilile ukulandilako Inte sha kwa Yehova mu filye. Ba Covington na ba Schmidt balyafwile bamunyinefwe abo bapeele imilandu mu Connersville, kabili ba Covington balyafwilishe ba Schmidt mu milandu imbi muli cilya citungu. Ilyo ba Dorothy baleyafwilisha aba babili muli iyi milandu, balishiletemwana na ba Hayden kabili mu 1949 balyupene.

Ba Dorothy baile ku New York mu kwafwa ba Hayden abakwete imilimo iingi pa maofeshi yakalamba aya Nte sha kwa Yehova ku Brooklyn, kabili balitwalilile ukubombesha mu mulimo wa kubila imbila nsuma ilyo ba Hayden baleyafwa ba Nte mu milandu iingi iyo balebapeela. Ba Covington balishibikwe icalo conse ukuti bali pali bandubulwila ba milandu abaishibishe sana uyu umulimo, kabili balibombeshe ukwafwa ba Nte abengi pa milandu iyo bababepeshe. Ba Covington balilubulwile imilandu ukucila pali 40 mu Cilye Cikalamba e lyo ne milandu imbi ukucila pali 100 mu filye umo batwala imilandu iyo abantu balemona ukuti na babafyenga.

Ba Dorothy baleya na ba Hayden ku Cilye Cikalamba ilyo ba Hayden balelandilako Inte sha kwa Yehova pa milandu balebapeela mu America. Ba Dorothy batile: “Ba Hayden balilengele twaishiba ne nsambu twakwata na pa fintu ifyo tushaishibe. Imona ukuti balicitile bwino sana pa kwafwa abantu abengi mu America e lyo na mu fifulo fimbi pa nsambu isho bakwata.

Mu 1959, ba Dorothy na ba Hayden balikwete umwana umwanakashi uo bainike ati Lynn, kabili ilyo papitile imyaka itatu balikwete umwana umwaume uo bainike ati Lane. Mu kuya kwa nshita, balifumine ku New York no kubwelela ku Ohio mu 1972. Ilyo abana babo bakulileko, ba Dorothy balebasambilisha Baibolo kabili balitemenwe sana umulimo wa kubila imbila nsuma.

Ku ca bulanda, pa 21, November mu 1978 ba Hayden balifwile. Ba Dorothy balitampile ukubomba umulimo balebomba kale uwa kubika ifilembo fya kubomfya pa kupulinta kabili balebomba na ku twampani utulemba ama nyunshipepala, ukubikako fye na akampani ka Cincinnati Enquirer. Umulimo balebomba wali uwakosa sana kabili abengi baleti wali mulimo uo umwaume alingile ukubomba pantu kwaleba ukubika utushimbi muli cimashini pa kuti ifilembo filelembwa. Ilyo balekele ukubomba uyu umulimo mu 1988, ba Dorothy na kabili balitendeke umulimo wa kusambilisha abantu Baibolo uo balebomba pa maawala ayengi. Abantu baishibe ba Dorothy ukuti bali abacincila, balishibe sana Baibolo, kabili nga babepusha amepusho, baleyasuka ukubomfya Amalembo ayalingile sana.

Ba Dorothy bafwile ninshi umwana wabo Lane alifwa kabili bashile umwana umwanakashi, Lynn Elfers; umupongoshi wabo, Gary Elfers; abeshikulu babo babili; e lyo na bankashinabo abaice, ba Ruth Sennett Naids.