Nga mulesakamikwa sana pali fimo, ubumi bwenu te kuti bube bwino. Ukusakamana sana kuti kwalenga mwakwata amafya ayakalamba ukucila na pa bwafya ubulengele musakamane sana.

•  Mwilakutika, ukubelenga, nelyo ukutamba sana amalyashi ayengalenga mwaumfwa ububi. Tamulingile ukwishiba fye tonse pa fyabipa ificitike. Nga mulekutika, ukubelenga nelyo ukutamba sana amalyashi ayalelanda pa fyabipa ifilecitika, kuti mwaleumfwa sana ububi.

   Ishinte lya mu Baibolo: “Umutima uwa bulanda umya ifupa.”—Amapinda 17:22.

   “Calyanguka ukulafwaya fye ukwishiba ilyashi ilipya ne fyabipa ifilecitika, lelo ukucita ifi te kusuma. Ndaleka ukusakamana sana nga naleka ukukutika sana ku malyashi ayabi.”—E fyalandile ba John.

   Ifyo mwingatontonkanyapo: Miku inga mulingile ukukutika ku lyashi ililecitika nelyo ilipya?

•  Mwileka ukucita ifyo mucita lyonse. Mule-esha ukubuuka, ukulya, ukubomba imilimo no kulaala pa nshita ilya ine mulaalilapo cila bushiku. Nga mwalitantika bwino ifya kucita, mukalaikala ifyo mulingile ukwikala kabili tamwakulasakamana sana.

   Ishinte lya mu Baibolo: “Amapange ya wacincila yamulenga ukubomba bwino.”—Amapinda 21:5.

   “Ilyo icikuko ca COVID-19 catendeke, nalilekele ukucita ifyo nalecita cila bushiku kabili nalepoosa inshita iikalamba ndelesha fye icitendwe. Nalefwaya ukulabomfya bwino inshita, e ico nalitantike ifyo ningile ukucita cila bushiku.”—E fyalandile ba Joseph.

   Ifyo mwingatontonkanyapo: Bushe mwalitantika bwino ifya kucita cila bushiku ifilenga muleumfwa ukuti namucita ifintu ifyacindama?

•  Mulebika amano ku fisuma ifilecitika mu bumi bwenu. Nga mwaikalila fye ukutontonkanya pa fyo mushacitile bwino ifyo mwingatemwa ukwalula nelyo pa fyabipa ifingacitika ku ntanshi, mukalasakamana sana. Lelo muletontonkanya pa fintu fibili nelyo fitatu ifyo mwingatashishapo.

   Ishinte lya mu Baibolo: “Muletootela.”—Abena Kolose 3:15.

   “Ukulabelenga Baibolo kulangafwa sana ukunakutika nelyo ukubelenga amalyashi ayengalenga naumfwa ububi kabili kulangafwa ukubika amano ku fisuma. Ifi nalanda kuti fyaumfwika kwati nafyanguka sana, lelo filabomba!”—E fyalandile ba Lisa.

   Ifyo mwingatontonkanyapo: Bushe mwalitemwa ukutontonkanya sana pa fyabipa ifilecitika mu bumi bwenu kabili tamubika amano ku fisuma ifimucitikila?

•  Muletontonkanya pa bantu bambi. Calyanguka ukulafwaya fye ukuba weka nga namusakamikwa, kanshi mu cifulo ca kuba mweka, muletontonkanya pa fyo mwingafwa abalekabila ubwafwilisho.

   Ishinte lya mu Baibolo: “Tamubika fye amano ku fyo mulefwaya fye mwe bene, lelo mulabika amano na ku fyo bambi bafwaya.”—Abena Filipi 2:4.

   “Ndaba ne nsansa nga ndeafwako abantu bambi. Nga ndebafwa ninshi ndecita ifingalenga baba ne nsansa, kabili pa nshita imo ine filalenga nilasakamikwa sana. Na kuba nshikwata ne nshita ya kulasakamana sana.”—E fyalandile ba Maria.

   Ifyo mwingatontonkanyapo: Pa bantu mwaishiba, ni bani mulemona ukuti ebengakabila ubwafwilisho sana, kabili finshi mwingacita pa kuti mubafwe?

•  Mulecita ifingalenga mwaba no bumi ubusuma. Muletukusha umubili no kutusha. Mulelya ifya kulya ifisuma ifya mulyo. Nga mulebika amano ku bumi bwenu kuti mwaleka ukusakamikwa sana kabili kuti mulebika amano ku fisuma.

   Ishinte lya mu Baibolo: “Ukutukusha umubili kwafwa fye panono.”—1 Timote 4:8.

   “Ine no mwana wandi umwaume te kuti tutukushe umubili panse nga fintu twingatemwa ukucita, kanshi twalitantika ukulatukushisha umubili mu ng’anda. Ifi twacita fyalilenga twaba ne nsansa, e lyo ndaba ne cikuuku kabili ndatekanishisha umwana wandi kabili nao e fyo acita kuli ine.”—E fyalandile ba Catherine.

   Ifyo mwingatontonkanyapo: Bushe mulekabila ukutendeka ukulalya ifya kulya ifisuma ifya mulyo no kulatukusha sana umubili pa kuti mubeleko no bumi ubusuma?

 Ukulunda pali ifi twalandapo, abantu abengi basanga ukuti balinonkelamo sana mu kusambilila pa malayo ayo Baibolo yatulaya ayalanda pa fyo tukalaikala bwino ku ntanshi. Moneni icipande citila “Finshi Ubufumu bwa kwa Lesa Bukacita?”