MULELOLA!
Inkondo ili ku Ukraine Nailenga Ifyakulya mwi Sonde Ukwafya
Pa 19 May 2022, aba mu kabungwe ka United Nations Security Council, balilandile na balashi ukucila pali 75. Kabili aba balashi batile, “icikuko ca COVID-19 no kwaluka kwa miceele fyalilenga ifya kulya ukwafya mwi sonde lyonse. Nomba inkondo iili ku Ukraine nailenga ifintu ukuya filebipilako mwi sonde lyonse kabili ici cikalenga mu fyalo fimo mukabe icipowe.” Tapakokwele uwasambilila ifya bunonshi (Economist) atile “kalekale mwi sonde mwaliba amafya ayengi nga nshi, nomba pa mulandu wa iyi nkondo mwi sonde muli no kuba abantu abengi aba kulacula ku nsala.” Baibolo yalisobele ukuti ifya kulya fikaafya muli shino inshiku, lelo yalitweba no fyo twingacita pa kuti tuleshipikisha amafya ya musango uyu.
Ifyo Baibolo yasobele pa kwafya kwa fya kulya
Yesu asobele ukuti: “Uluko lukemina uluko lubiye no buteko bukemina ubuteko bubiye, kabili kukaba ifipowe.”—Mateo 24:7.
Ibuuku lya mu Baibolo ilya Ukusokolola lya lilanda pa fishibilo fya baume bane abanina pali ba kabalwe. Umo pali aba baume emininako inkondo. Uwa mu konkapo emininako ifipowe, pa nshita ilyo ifya kulya fikaafya sana kabili ilyo abantu bakalashitisha ifya kulya pa mutengo uwacila mu cipimo. “Naliloleshe, kabili, moneni! kwali kabalwe uwafiita; no waikelepo ali na sekelo mu minwe yakwe. E lyo naumfwile ishiwi . . . aliti: “Icipimo cimo ica ngano mu ndalama imo iya denari, ne fipimo fitatu ifya barle mu ndalama imo iya denari”—Ukusokolola 6:5, 6.
Aya masesemo ya mu Baibolo ayalanda pa fya kulya ukwafya yalefikilishiwa muli shino inshiku isho Baibolo iita ukuti “inshiku sha kulekelesha.” (2 Timote 3:1) Pa kuti mwishibe na fimbi pa “nshiku sha kulekelesha” na pa baume bane abanina pali ba kabalwe abo balandapo mwi buuku lya Ukusokolola, tambeni vidio itila Ifintu mu Calo Fyalyaluka Ukutula mu 1914. Belengeni ne cipande citila, “Bushe Abaume Bane Abanina Pali Bakabalwe ni Bani?”
Ifyo Baibolo ingatwafwa
Mu Baibolo mwaliba ifingatwafwa ukushipikisha nga ca kuti ifintu fya-afya, ukubikako fye na lintu ifya kulya fyakosa sana umutengo. Moneni fimo ifingamwafwa mu cipande citila “Ifya Kucita pa Kuti Mulebomfya fye Indalama Ishinono Isho Mukwata.”
Na kabili, Baibolo ilatupeela isubilo lya kuti ifintu ku ntanshi fikawama. Yalitulaya ukuti inshita ileisa ilyo “Ingano shikafula nga nshi pano isonde.” Kabili abantu bonse bakakwata ifya kulya ifingi. (Amalumbo 72:16) Pa kuti musambilile na fimbi pa fyo Baibolo yatulaya no mulandu mwingacetekela ukuti fya cine, belengeni icipande citila “Isubilo lya Kuti Ifintu Fikawama ku Ntanshi lya Cine.”
Nalimo Kuti Mwatemwako ne fi
Icalo ca Russia Naciimina Icalo ca Ukraine—Bushe Ifyo Baibolo Yasobela Filefikilishiwa?
Nga ca kuti ifyo Baibolo yasobele filefikilishiwa, bushe yalilanda ne fyo fikapwa?
AMASUKO KU MEPUSHO YA MU BAIBOLO
“Finshi Twingeshibilako Inshiku sha Kulekelesha, Nelyo ‘Inshita ya Mpela’?”
Baibolo yalisobele ifintu ifingi ifyali no kulanga ukuti tuleikala mu nshiku sha kulekelesha.
AMASAMBILISHO YA MU BAIBO AYACINDAMA
Mulandu Nshi Lesa Asuminishisha Ukucula?
Abantu abengi balepusha ico mu calo mwafulila ulupato no kucula. Mu Baibolo mwaliba amasuko kuli aya mepusho.
AMASAMBILISHO YA MU BAIBOLO
Tendekeni ukusambilila Baibolo ne Nte sha kwa Yehova
Tendekeni ukusambilila baibolo ne Nte sha kwa Yehova ukwabula ukulipila.
