Mu July 2022 abantu abengi balibepeye ne mfuti mwi sonde lyonse:

•   “Abantu calibaponya pa musao filya baipeye politishani uwa ku Japan uwaishibikwa sana, [uwali kale Prime Minister Shinzo Abe] pantu mu Japan tamwaba sana ubunkalwe kabili ubuteko tabusuminisha abantu ukukwata imfuti.”—July 10, 2022, The Japan Times.

•   “Abantu mu Denmark balipapa sana ilyo umwaume umo aipeye abantu batatu ne mfuti pe tuuka ilikalamba mu musumba wa Copenhagen.”—July 4, 2022, Reuters.

•   “Ku South Africa: Abantu 15 balifwa ilyo umwaume umo abalashile imfuti mu cikuulwa ca bwalwa mu Soweto.”—July 10, 2022, The Guardian.

•   “Ilyo kwali inshiku sha mwikalwe pa 4 July, abantu 220 balibepaya ne mfuti mu U.S.”—July 5, 2022, CBS News.

 Bushe ubunkalwe bwa musango uyu buli no kupwa? Finshi Baibolo yalandapo?

 Baibolo ita shino nshiku tulimo ukuti ni “nshiku sha kulekelesha,” umo abantu bali no kuba abankalwe icine cine. (2 Timote 3:1, 3) Ubunkalwe bwa musango uyu bulenga abantu ukuba sana no mwenso. (Luka 21:11) Lelo Baibolo itila ubunkalwe bukapwa kabili “abantu . . . bakekala mu cifulo ca mutende na mu ncende ishacingililwa ne ncende sha kutuushishamo ishaba tondolo.” (Esaya 32:18) Bushe ubunkalwe bukapwa shani?

 Lesa akonaula abantu babipa kumo ne fyanso fyabo fyonse.

•   “Lelo ababifi, bakalofiwa mu calo; na ba bufi, bakabafumpulamo.”—Amapinda 2:22.

•   “[Lesa] alelenga inkondo ukupwa ukufika ku mpela sha pano isonde. Ubuta abukontola kabili aputaula ne fumo; aoca na maceleta mu mulilo.”—Amalumbo 46:9.

 Lesa akafumyapo ifilenga abantu ukuba abankalwe ilyo akabasambilisha ifya kwikala aba mutende.

•   “Tafyakacite ububi nangu ubonaushi monse mu lupili lwandi ulwa mushilo; pantu isonde likesulamo ukwishiba Yehova filya amenshi yaisula muli bemba.”—Esaya 11:9.

•   Na muno nshiku mwine Lesa alesambilisha abantu mwi sonde lyonse ukukanaba no bunkalwe e lyo no kukanalabomfya ifyanso, pa kuti ‘bafule impanga shabo ukuti shibe baplao, na mafumo yabo ukuti yabe ifya kutungwilako imiti.’—Mika 4:3.

 Nga mulefwaya ukusambilila na fimbi pa fyo Baibolo yalaya ukuti tukekala mwi sonde umukaba umutende wa cine cine, belengeni icipande citila “Freedom From Fear—Is It Possible?”

 Nga mulefwaya ukusambilila pa fyo ubunkalwe bukapwa, belengeni icipande cileti “Peace on Earth at Last!”