Mwi sonde fye lyonse, ifikansa fya calo fyalilenga abantu mu fyalo ifingi bafilwa ukwikatana. Ukulingana ne fyo bafwailishe mu 2022 kuli ba Pew Research Center basangile ukuti mu fyalo 19, “abakalamba abengi Abatungilila utubungwe twa fikansa fya calo utwapusana tabasuminishanya nga balelanda pa fikansa fya calo mu fyalo babamo.”

 Bushe mwalimona ukuti ifikansa fya calo fyalilenga abantu bafilwa ukwikatana na kuncende mwikala? Cinshi calenga? Bushe kwaliba icingapwisha ubu bwafya? Moneni ifyo Baibo ilanda.

 Baibo yalisobele ukuti mu nshiku shesu, isho ita ukuti “inshiku sha kulekelesha,” abantu bali no kuba ne mibele iilenga bafilwa ukwikatana.

•   “Mu nshiku sha kulekelesha mukesaba inshita ishayafya nga nshi. Pantu abantu bakaba abaitemwa, . . . abashifwaya ifipangano.”—2 Timote 3:1-3.

 Nangu ca kuti abantu abengi balesha na maka pa kuti amabuteko yaletunguluka, yalafilwa ukutunguluka. Abantu abapusana ifyo bamona ifintu balafilwa ukubombela pamo pa kuti bapwishe amafya. Ifi fine e fyo Baibo yasobele ukuti e fikalacitika.

•   “Umuntu atekela umuntu munankwe ku kumucusha.”—Lukala Milandu 8:9.

 Na lyo line, Baibo yalilanda pa ubuteko ubwakwata kateka uukapwisha amafya ayo abantu bakwata muno nshiku.

 Baibolo yalilanda ukuti Yesu Kristu e kateka uwakwata imibele iifwaikwa pa kuti aya amafya yonse yakapwe. Yesu alikwata amaka, kabili alafwaisha no kulenga abantu bonse baikatana kabili baba no mutende.

•   “Mu nshiku shakwe abalungama bakapuuka, kabili umutende ukafula.”—Amalumbo 72:7.

•   “Inko shonse, shikamubombela.”—Amalumbo 72:11.

 Yesu ni kateka umusuma pantu alibika amano ku bantu kabili alafwaya ukwafwa abantu, maka maka abo bafyenga.

•   “Akapususha umulanda uulekuuta mutuule, no wacula na onse uushakwata wa kumwafwa. Akomfwila ubulanda umulanda no mupiina, kabili akapususha imyeo ya bapiina. Akalubula imyeo yabo ukufuma ku ba mutitikisha na ku ba bunkalwe.”—Amalumbo 72:12-14.

 Sambililenipo na fimbi pa Bufumu bwa kwa Lesa, e kutila ubuteko bwa ku muulu ubo Yesu abapo imfumu. Moneni ifyo mwinganonkelamo ne fyo mwingatungilila ubufumu bwakwe.

•   Tambeni vidio itila Bushe Ubufumu bwa kwa Lesa ni Cinshi?

•   Belengeni icipande citila “Ubufumu bwa kwa Lesa—Ubuteko Umushakabe Amafisakanwa.”