MULELOLA!
Ukwipaya Abantu pa Sukulu—Finshi Baibolo Yalandapo?
Pa 24 May 2022, ilyashi lya bulanda lyalicitike mwi tauni ilinono lya Uvalde, mu Texas, mu U.S.A. Ukulingana ne fyalandile inyunshipepala ya The New York Times, “umwaume umo alipeye abana besukulu 19 na bakafundisha babili pe sukulu lya Robb Elementary.”
Ku ca bulanda ifya musango uyu nafiseeka sana. Inyunshipepala ya ba USA Today yatile, “mu mwaka wapwile, mu United States fye mweka abantu balibalashile imfuti pa masukulu ukufika kuli 249. Kabili ifi tafyatala aficitikapo ukutula nalimo mu mwaka wa 1970”
Mulandu nshi ifyabipa fya musango uyu ficitikila? Kuti twashipikisha shani ilyo ifintu fya musango uyu filecitika? Bushe kwaliba ifingalenga twashininkisha ukuti ubunkalwe bukapwa? Baibolo yalyasuka aya mepusho.
Mulandu nshi abantu mu calo balebelako fye no bunkalwe?
Baibolo ilondolola inshita tuleikalamo ukuti ni “nshiku sha kulekelesha” umo abantu abengi bakaba “abashatemwa abantu” kabili bakaba “abankalwe” e kutila bakalacita ubunkalwe ubwabipa nga nshi. Ababa ne yi mibele “bakaya balebipilako fye.” (2 Timote 3:1-5, 13) Pa kuti musambilile na fimbi, belengeni icipande citila “Did the Bible Predict the Way People Think and Act Today?”
Abantu abengi balaipusha ukuti, ‘Cinshi Lesa tacingilila ifyabipa pamo nga ukwipaya abantu pa sukulu ukuti filacitika?’ Pa kuti mumone ifyo Baibolo ya-asuka ici cipusho, belengeni icipande citila “Mulandu Nshi Ifyabipa Ficitikila Abacita Ifisuma?”
Kuti twacita shani pa kuti tuleshipikisha ilyo ifyabipa fya musango uyu filecitika?
“Pantu fyonse ifyalembelwe kale fyalembelwe ku kutufunda, pa kuti mu kushipikisha kwesu na mu cisansamushi ca mu Malembo tube ne subilo.”—Abena Roma 15:4.
Amashinte ya mafunde ya mu Baibolo kuti yamwafwa ukulashipikisha muli cino calo umuli sana ubunkalwe. Belengeni Loleni itila “Bushe ubunkalwe bukapwa?”
Pa kuti mumone ifyo abafyashi bengacita pa kwafwa abana babo ukukanaba sana no mwenso pa fyabipa ifyo bamona nelyo ifyo bomfwa, belengeni icipande citila “Disturbing News Reports and Your Children.”
Bushe ubunkalwe bukapwa?
“Akalubula imyeo yabo ukufuma ku ba mutitikisha na ku ba bunkalwe.”—Amalumbo 72:14.
“Bakafula impanga shabo ukuti shibe baplao, na mafumo yabo ukuti yabe ifya kutungwilako imiti. Kabili uluko talwakemishe uluko lunankwe ulupanga, nangu ukusambilila inkondo na kabili.”—Mika 4:3.
Lesa akacita ifyo abantunse bashingacita. Ubufumu bwakwe ubwa ku muulu bukonaula ifyanso fyonse no kupwisha ubunkalwe. Pa kuti musambilile na fimbi ifyo Ubufumu bwa kwa Lesa bukacita, belengeni icipande citila ‘“Umutende Ukafula” mu Bufumu bwa kwa Lesa.’
Nalimo Kuti Mwatemwako ne fi
AMASAMBILISHO YA MU BAIBO AYACINDAMA
Mulandu Nshi Lesa Asuminishisha Ukucula?
Abantu abengi balepusha ico mu calo mwafulila ulupato no kucula. Mu Baibolo mwaliba amasuko kuli aya mepusho.
AMASAMBILISHO YA MU BAIBOLO
Tendekeni ukusambilila Baibolo ne Nte sha kwa Yehova
Tendekeni ukusambilila baibolo ne Nte sha kwa Yehova ukwabula ukulipila.
