MULELOLA!
Finshi Baibo Yalandapo Pali ifi Abantu Balecita Sana Ubunkalwe pa Kufwaya Ukwalula Ubuteko?
Abantu balecita sana ubunkalwe pa kufwaya fye ukwalula ubuteko, ne ci nacilenga abantu ukuba no mwenso.
Ku Mexico abantu 39 abaiminine abalefwaya ukukwata ififulo mu buteko ilyo kwali ukusala, ebo baipeye ukufuma mu 2023 ukufika mu 2024. Kabili kwali ifimfulunganya na fimbi ifyacitike ifyalengele abantu ukuba no mwenso.
Pali ino nshita mu Europe mulecitika sana ifimfulunganya. Pa 15 May 2024 balefwaya no kwipaya uwa mu buteko mu Slovakia.
Pa 13 July 2024, uwali kale kateka mu United States Donald Trump balefwaya ukumwipaya. Abantu abengi nabapapa sana pali ifi ifyacitike.
Mulandu nshi abantu balecitila sana ubunkalwe pa kufwaya fye ukwalula ubuteko? Bushe ubunkalwe bukatala abupwa? Finshi Baibo yalandapo?
Baibo yalisobele ukuti abantu bakulalwishanya pa mulandu wa kufwaya ukwalula ubuteko
Baibo yalisobele ukuti muli shino nshiku isho tuleikalamo, e kutila “inshiku sha kulekelesha,” abantu abengi bakaba ne mibele iilenga baaba abankalwe kabili iilenga ukuti belaumfwana na bantu banabo.
“Mu nshiku sha kulekelesha mukesaba inshita ishayafya nga nshi. Pantu abantu bakaba . . . abashitasha, abashaba na cishinka, . . . abashifwaya ifipangano, . . . abankalwe, . . . abafutuka abanabo, bamunshebwa, aba cilumba.”—2 Timote 3:1-4.
Kabili Baibo yasobele no kuti mu nshiku sha kulekelesha mukaba sana ifimfulunganya pamo nga ukwimina ubuteko. (Luka 21:9) Na lyo line, ifimfulunganya ifilecitika pa mulandu no kufwaya ukwalula amabuteko tafyakatwalilile ukucitika.
Ubunkalwe ubulecitika bukapwa
Baibo ilondolola ukuti Lesa akafumyapo amabuteko ya bantunse yonse no kupyanikapo ubuteko bwakwe ubwa mu muulu.
“Lesa wa mu muulu akemya ubufumu . . . ubukashonaula no kupwisha aya mabufumu yonse, kabili bwena bukeminina umuyayaya.”—Daniele 2:44.
Ubufumu bwa kwa Lesa bukalenga abantu ukwikatana kabili bukalenga na mu calo conse mukabe umutende.
Yesu Kristu, Imfumu ya ubu bufumu, uo beta no kuti “Cilolo wa mutende,” akashininkisha ukuti “ku mutende wakwe takwakabe impela.”—Esaya 9:6, 7.
Na pali ino ine nshita, bonse abo ubu bufumu buteka balasambilila ifya kwikala umutende. E mulandu wine Baibo ilandila ukuti: “Kabili bakafula bapanga babo ukuti babe baplao na mafumo yabo ukuti yabe ifya kutungwilako imiti. Uluko talwakemishe uluko lunankwe ulupanga, nangu ukusambilila inkondo na kabili.”—Esaya 2:3, 4.
Nga mulefwaya ukwishibilapo na fimbi, belengeni icipande citila “Finshi Ubufumu bwa kwa Lesa Bukacita?” kabili tambeni na vidio itila Bushe Ubufumu bwa kwa Lesa ni Cinshi?