“Abantu balecita ifintu ifingi ifili no kulenga isonde ukonaika nomba line. Imisumba iikalamba ikabunda. Mwi sonde mukalakaba sana. Kukalaba ifikuuku fya mwela ifikalamba. Amenshi yakalashupa ukusanga. Ifimenwa ifingi ne nama fikaloba. Ifi te fya kwelenganya fye kabili te kukukumya iyo. Ifi e fikacitika nga ca kuti amabuteko tayalwileko amafunde ayalenga abantu balaonaula isonde.” E fyalandile ba António Guterres ba secretary-general ba United Nations, muli lipoti baleita ukuti Intergovernmental Panel on Climate Change iya pa 4 April, 2022.

 “Basayantisiti balesoka abantu ukuti amaparka yonse 423 aya mu [United States] yakonaika pa mulandu wa kwaluka kwa micele maka maka apo aya amaparka kuti yaonaika nga kwakaba sana. Ifyabipa ifingacitika kuti fyaba kwati ni filya tubelenga mu Baibolo: Umulilo, mulamba, ifimaisi ukusunguluka, amenshi muli ba bemba ukufulisha, isonde ukukabisha.” Ifi e fyali mu cipande caletila “Flooding Chaos in Yellowstone, a Sign of Crises to Come,” icafumine mu nyunshipepala ya The New York Times, iya pa 15 June , 2022

 Bushe amafya yakonaula isonde yakapwa? Nga yakapwa nani akayapwisha? Moneni ifyo Baibolo ilanda.

 Baibolo itila Lesa “akonaula abaleonaula isonde.” (Ukusokolola 11:18) Ici cikomo cilatusambilisha ifintu fitatu:

1.  1. Ifyo abantu bacita fikonaula sana isonde.

2.  2. Abantu tabakatwalilile fye ukonaula isonde.

3.  3. Ni Lesa fye e ukapwisha aya mafya.

 Baibolo itila “isonde lyaikalilila fye umuyayaya.” (Lukala Milandu 1:4) Lyonse kukalaba abakalaikala mwi sonde.

•   “Abalungama e bakekala mu calo, kabili bakekalamo umuyayaya.”—Amalumbo 37:29.

 Isonde likaba ilisuma na kabili.

•   “Amatololo ne mpanga yauma fikasekelela, kabili iciswebebe cikasansamuka no kubalula nga maluba ya ntongola.”—Esaya 35:1.