Mu calo conse, abantu abengi balefwaya ukuleka ukulya inama na fyonse ifyo bapanga ukubomfya inama.

•   “Abantu abashilya inama na fyonse ifyo bapanga ukubomfya inama, tababomfya fyonse ifyo bapanga ukubomfya inama. Batontonkanya ukuti nga baipaya inama pa kuti balye nelyo ukupangako ifya kufwala ninshi baleshicusha.”—E fyalandile akabungwe ka Vegan Society.

 Ifi abantu bomfwila inama uluse no kuleka ukushilya, bambi bena icilenga, ni co balafwaya ukuwamyako ubumi, e lyo bambi fintu babasambilisha ku macalici.

•   “Ifyo abantu abasalapo ukuleka ukulya ifya mweo batontonkanya fyalipusanako ne fyo abantu bambi abasalapo ukulya ifya kulya fimo batontonkanya. Pantu bamo abasalapo ukulalya imisalu icilenga balecita ifi ni co e fyo bafwaya fye abene, bambi nabo fintu basuminamo e lyo bambi bena bamona ukuti ukucita ifi kuti kwalenga ifintu mu calo ukuwama.”—Britannica Academic.

 Bushe ukulya ifilimwa e kukalenga fye ifintu mu calo ukuba bwino? Finshi Baibo isambilisha?

 Baibo ilanda ukuti Kabumba wesu, Yehova Lesa, a amona ukuti abantunse balicindama ukucila inama kabili alipela abantunse amaka pa nama. (Ukutendeka 1:27, 28) Mu kuya kwa nshita, Lesa alisuminishe abantunse ukulalya inama. (Ukutendeka 9:3) Na lyo line, tatile tulecusha inama.—Amapinda 12:10.

 Ukulingana na Baibo, fwe bene nifwe tulingile ukusalapo nga kulalya inama nelyo iyo. b Ifyo twasalapo te filenga Lesa alatumona ukuti tuli bantu abasuma. (1 Abena Korinti 8:8) Takuli umuntu nangu umo uufwile ukulasuusha ifyo umunankwe asalapo ukulalya.—Abena Roma 14:3.

 Baibo yalilanda ukuti ifyo tusalapo ukucita te fikapwisha amafya ayaba mwi sonde. Amafya ayengi yesako pa mulandu ne fikansa fya calo, ifyo abantu bacita, e lyo no bunonshi bwa calo. Baibo itila:

•   “Icapondama te kuti cololoke.”—Lukala Milandu 1:15.

 Kabumba wesu e ukapwisha fye amafya tukwata. Baibo ilalondolola ifyo akacita ifi mu mampalanya.

•   “Kabili namwene umuulu uupya ne calo icipya; pantu umuulu wa ntanshi ne calo ca ntanshi ninshi nafiya, na bemba talipo na kabili.”—Ukusokolola 21:1.

 Lesa akafumyapo amabuteko ya bantunse, nelyo “umuulu wa ntanshi,” no kubikapo “umuulu uupya,” e kutila Ubufumu kwa mu muulu. Ubufumu bwakwe bukafumyapo “icalo ca ntanshi,” e kutila abantu abacita ifyabipa, kabili bukatendeka ukuteka “ne calo icipya,” nelyo bonse abafwaya ukulatekwa no bu Bufumu.

 Ni mu Bufumu bwa kwa Lesa fye e mo abantu bakasambilila ifya kuba pa mutende ne nama e lyo no kulashisunga bwino.—Esaya 11:6-9.