Basangile ukuti abantu nalimo 5 bilioni e bakatamba bola ya FIFA World Cup ikabako ukutula pa 20 November kufika ku 18 December 2022. Abengi balemona ukuti ifyangalo fya musango uyu tafibeleleko fye ukuti abantu baletamba lelo kuti fyalenga na bantu baikatana.

•   “Ifyangalo fyalikwata amaka ya kwalula isonde. Fyalikwata amaka ya kulenga abantu balafwaisha ukucita fimo. Fyalikwata na maka ya kwikatanya abantu mu nshila iyaibela.”—E fyalandile ba Nelson Mandela, abali ba kateka ba calo ca South Africa.

•   “Bola ilalenga abantu baikatana pantu ilalenga “baba ne subilo, balasekelela, balatemwana, kabili ilalenga balamona ukuti balitemwa ifintu fimo fine.”—E fyalandile ba Gianni Infantino, bakateka ba FIFA. a

 Bushe bola ya World Cup kuti yalenga abantu baikatana no kucita ifintu ifisunga nge fi? Bushe abantu kuti baba no mutende kabili bushe kuti baikatana?

 Ukucimfyanya muli World Cup ukwa uno mwaka, nakulenga abantu abengi belatontonkanya fye pa mupila wa ku makasa. Iyi World Cup nailenga abantu balatalikishanya no kulalanda pa fikumine insambu sha bantu, akapaatulula ka mushobo, na pa fyo abantu bamo baba abapiina sana e lyo bambi abakankaala sana.

 Kwena, na ngu cibe ifyo abantu abengi balatemwa ukutamba ifyangalo fya kucimfyanya pamo World Cup. Nangu abantu balitemwa ukutamba, ifyangalo fya musango uyu te kuti filenge abantu batwalilila ukuba abaikatana. Lelo filanga fye imibele iyo Baibolo yalandapo iilanga ukuti tuleikala “mu nshiku sha kulekelesha.”—2 Timote 3:1-5.

 Mu Baibolo mwaliba ifingalenga twaba ne subilo lya kuti abantu mwi sonde lyonse bakekatana. Yatulaya ukuti abantu bonse mwi sonde bakekatana ilyo ubuteko bwa ku muulu ubwitwa no kuti “Ubufumu bwa kwa Lesa” bukalateka.—Luka 4:43; Mateo 6:10.

 Imfumu ya ubu Bufumu, Yesu Kristu, akashininkisha ukuti mwi sonde lyonse muli umutende. Baibolo itila:

•   “Abalungama bakapuuka, kabili umutende ukafula.”—Amalumbo 72:7.

•   “Pantu akapususha umulanda uulekuuta mutuule, . . . Akalubula imyeo yabo ukufuma ku ba mutitikisha na ku ba bunkalwe.”—Amalumbo 72:12, 14.

 Na muno nshiku mwine, ifyo Yesu asambilisha fyalilenga abantu abengi nga nshi mu fyalo 239 baikatana. Balisambilila ukukanapata abantu banabo. Pa kuti mwishibelepo na fimbi, belengeni icipande citila “Ifyo Twingacita pa Kuleka Ukuba no Lupato.”