Inte sha kwa Yehova balasakamana sana abo bapepa nabo. (1 Petro 2:17) Fwe bengi tumfwa nge fyo nkashi wa ku Kenya, Tannis omfwa. Atile, “Nalitemwa ukwishiba ifilecitikila aba bwananyina mwi sonde lyonse.” Bushe ba Tannis ne Nte sha kwa Yehova mwi sonde lyonse beshiba shani ifilecitikila aba bwananyina? Ukutula mu 2013, tuleshiba ifilecitikila aba bwananyina kubomfya jw.org nga mwaya apatila Ifilecitika.

 Amalyashi yaba apatila Ifilecitika ayalanda pa Nte sha kwa Yehova ya cine kabili kuti twayacetekela. Palaba na malyashi pamo nga, amaBaibolo ayapya ayo bafumishe, ifyo baleafwilisha abaponenwe na masanso ayakalamba, ifyo amakuule yale-enda, ne fintu fimbi ifyacindama ifilecitika. Palaba na malyashi ya bamunyinefwe na bankashi abo bakaka mu fifungo pa mulandu wa citetekelo cabo. Pali ici ciputulwa citila Ifilecitika palaba na malyashi ayasuma ayalanda pa fyo amakampeni ya mulimo wa kubila imbila nsuma yale-enda e lyo na basangilwe ku kwibukisha imfwa ya kwa Yesu. Ni bani bafwailisha pali aya malyashi kabili bacita shani pa kuyalemba?

 Ababombela ku Public Information (OPI) e balolekesha pa fyebo fiba apatila Ifilecitika. Amaofeshi ya ba Public Information yaba pe ofeshi likalamba ilya Nte sha kwa Yehova, kabili Komiti ya Bakampanya iye Bumba Litungulula e yangalila umulimo babomba. Mwi ofeshi lya ba Public Information mwaba bamunyinefwe na ba nkashi ukucila pali 100, kabili abengi pali aba ni balya abafwilishako umulimo wa pa bethel ababombela ku ng’anda. Aba bonse babomba imilimo iyalekanalekana pamo nga ukulemba ifyebo, ukufwailisha ilyashi, ukubombela pa ifikope fya kubikamo, e lyo na kupilibula. Bambi babomba umulimo wa kulanshanya na balashi ba buteko, aba pa masukulu, e lyo na ba ku milabasa. Amaofeshi ya ba Public Information (OPI) ukucila pali 80 ayaba pa ma bethel ayalekanalekana mwi sonde lyonse, e yafwilisha ba Public Information Desks (PID).

 Pa kupekanya amalyashi, ba Public Information (OPI) balabombela pamo na Public Information Desks (PID). Nga ca kuti bamunyinefwe bamona ukuti balingile ukulemba pe lyashi limo, balafwailisha ifyebo pali ilyo lyashi pa kuti bashininkishe ukuti ifyo fyebo fya cine. Pa fyo bacita paba ukwipusha abo fyacitikile no kwipushako abakalapashi mu lyashi balefwaya ukulemba. Nga bafwailisha ifishinka fyonse, balalemba ilyashi, ukumona ifilembelwe nga fili fye bwino, balabelengamo, balabikamo ifikope pa kuti balangilile ifyalecitika, lyena no kutuma kuli Komiti ya Bakampanya pa kuti bapitulukemo mu lyashi ilyo bashilalisabankanya.

 Bushe Inte sha kwa Yehova bomfwa shani pa fyebo fiba apatila Ifilecitika. Bankashi Cheryl aba ku Philippines batile: “Cila bushiku ilyo nshilatendeka ukubomba imilimo, nalitemwa ukubelenga amalyashi ayalanda pa cilonganino ca kwa Yehova na pa filecitikila abantu bakwe.”

 Abengi ababelenga amalyashi yaba apatila Ifilecitika balimona ubupusano bwaba pali aya malyashi na malyashi yasabankanya aba ku milabasa yalekanalekana. Ba Tatiana aba ku calo ca Kazakhstan batile: “Ndatasha sana pa malyashi yaba pa jw.org pantu ya cine kabili ndayacetekela.” Nkashi Alma uwikala ku Mexico atile: “Amalyashi yaba apatila Ifilecitika yalatukoselesha sana, ukupusanako na malyashi yaba ku milabasa imbi ayalanda fye pa fyabipa.”

 Amalyashi yaba apatila Ifilecitika te ya cine fye, lelo yalakosha ne citetekelo cesu. Ba Bernard aba ku Kenya batile: “Amalyashi yaba apatila Ifilecitika yalilenga nalamona bamunyinefwe na bankashi mwi sonde lyonse ukuti ni balupwa lwandi, te mulandu no ko bekala. Ilyo ndebapepelako ndabalumbula na mashina kabili ndalanda na mafya bakwete.” Nkashi Bybron na o uwikala ku Kenya atile: “Ndatemwa nga namona icipande icilelanda pali Baibolo iifumine mu lulimi lumbi! Ifi fipande filanjibukishako ukuti Yehova taba na kapatulula.”

 Nangu malyashi ayalelanda pa ba bwananyina abo balecusha kuti yatukoselesha. Ba Jackline aba ku Kenya batile “Ukutontonkanya pa fyo aba bwananyina baba abashipa ilyo balebacusha kulakosha icitetekelo candi. Lyonse ndafwaya ukwishiba ifibafwa ukushipikisha pa kuti nsambilileko. Nalisambilila ukuti ifintu fimo ifimoneka ifinono pamo nga ipepo, ukubelenga Baibolo, e lyo no kwimba inyimbo sha bufumu e filenga aba bwananyina ukuba abashipa.”

 Nkashi Beatriz uwa ku Costa Rica alitemwa sana ukubelenga amalyashi ayalanda pa ba bwananyina abaponenwe na masanso. Atile: “Aya amalyashi yalalenga ndemona ifyo icilonganino cesu cafwilisha aba bwananyina abaponenwa na masanso mu kwangufyanya, iya kutemwa, ifyo cibomba bwino uyu mulimo ne fyo balanga ukutemwa ku baponenwe na masanso. Ici cilenga nashininkisha ukuti, ici cilonganino twabamo cilonganino ca kwa Yehova.

 Tulatasha sana pali ifi batwishibisha ifilecitikila aba bwananyina mwi sonde lyonse! Icilenga ukuti tuleishiba ifilecitikila aba bwananyina misangulo intu musangula, kabili iingi musangula ukubomfya inshila shaba pa donate.pr418.com. Tulemutasha pali bukapekape bwenu.