Pa myaka ukucila pali 130, Inte sha kwa Yehova muno nshiku balalongana pamo ukulongana kwa citungu cila mwaka. Pali uku kulongana balalanda amalyashi yalekanalekana ukucila pali 40, palaba inyimbo, ukwipusha e lyo na mavidio. Pa kuti abasangilwe ku kulongana banonkelemo, bafwile ‘ukumfwa no kumona’ bwino bwino. (Luka 2:20) Bushe imisangulo musangula baibomfya shani pa kuti bonse balenonkelamo mu kulongana kwa citungu te mulandu no ko bekala?

 Mu fyalo fimo, mu fibansa ifingi na mu fikuulwa fimbi umubela ukulongana kwa citungu, mwaliba ifya kubomfya pa kukutika ifyebo no kutamba amavidio. Nomba nga twasonkela ifi ififulo pa kuti tulonganinemo ukulongana kwa citungu, tulaibikilamo ifya kubomfya pa kukutika ifyebo no kutamba amavidio. Cinshi tubikilamo? Ba David ababombela mu Dipartimenti ya Broadcasting pa Maofeshi Yakalamba balandile abati: “Fikuulwa fye ifinono pa fyo tusonkela umuba ifya kubomfya pa kukutika ifyebo ifilelandwa pa ma-awala ukucila 6. Ku ca kumwenako, mu fibansa na mu fikuulwa umubela ifyangalo, mwaba fye ifyo babomfya pa kubilisha fimo na pa kulisha inyimbo ishiipi. Ifya kutambilapo amavidio ifyabamo bafibomfya fye pa kulanga utukato uto abaleteya bengishe, pa kusabankanya amakwebo na pa kulanga abantu ifyacicitika. Nomba ifwe tufwaya abantu abalongene baletamba amavidio ayatali kabili baleumfwa bwino bwino fyonse ifilelandwa pa cisebele.”

 Ififulo apabela ukulongana kwa citungu tafiba cimo cine, kanshi ifyo tubomfya pa kukutika ifyebo no kutamba amavidio filapusanapusana ukulingana ne cifulo. Kanshi nga basala ififulo apakabela ukulongana kwa citungu, aba mu ma Dipartimenti ya Broadcasting pa maofesi ya misambo balamona uko abantu bengekalila ukulingana na bantu bale-enekela ukwisa mu kulongana e lyo ne fyo icifulo cakula. Lyena bamunyinefwe balapima apo bengabikila amasipika ne fya kutambilapo amavidio, kabili balamona ne fyo bengapisha intambo. Balalemba na fyonse ifyo balekabila pa kuti bonse abakaba pa kulongana kwa citungu bakalekutika bwino ifyebo no kutamba bwino amavidio.

 Ifya kubomfya pa kukutika ifyebo no kutamba amavidio ifyo tubomfya pa kulongana kwa citungu ukubako mu ndimi ishingi fyena balafisuntinkanya ku fibombelo ifingi. Nga ca kuti ukulongana bakalakupilibwila mu lulimi lumbi, ninshi abakalapilibula bafwile ukulakutika bwino bwino ifyebo no kulatamba amavidio, lyena ifyo bakalapilibula fikalapita mu ntambo shimbi pa kuti abo balepilibwila bakalefyumfwa. Caliwama ifi nomba twakwata ifibombelo ifilenga abali pa kulongana kumo baletamba no kukutika ifyebo mu ndimi ishalekanalekana 8 pa nshita imo ine. Ba David balandile abati, “Kuli ifi ifibombelo balakulikako ifingi sana, kabili abalebombelako balingile ukubasambilisha bwino ifya kufibomfya.”

 Amaofeshi ya musambo ayengi yalikwata ifya kubomfya pa ku kutika na pa kutamba amavidio ifyo babomfya cila mwaka. Kanshi bamunyinefwe balapekanya ukuti abalelongana pa cifulo cimo nga bapwisha ukubomfya ifi fibombelo, batwala ku cifulo cimbi pa kuti nabo bakafibomfyeko. Iofeshi lya musambo ilya ku America cila mwaka libomfya indalama amadola ukucila pali 200,000 a (nelyo ukucila pali K5,000,000) pa kutwala ifi ifibombelo ku fifulo ukubela ukulongana kwa citungu. Na lyo line ishi indalama tubomfya shacepapo nga kushilinganya ku sho twingabomfya pa kushitilapo ifibombelo na fimbi no kulafisakamana. Ba Steven abangalilako dipartimenti ya audio/video pa kulongana kwa citungu mu Canada balandile abati, “Dipartiment yesu ilashininkisha ukuti amanati, tonse utwa kubomfya pa kukaka, intambo na fyonse ifyo tubomfya epo fili kabili tulafisakamana bwino no kufilonga bwino pa kuti na bambi bakafibomfyeko.”

 Ukusonkela ifya kubomfya pa kukutika ifyebo no kutamba amavidio kwalikosa sana umutengo, kabili ifibombelo ifingi ifyo basonkesha tafyakosa kabili tabafisunga bwino. Pa mulandu ne fi twalandapo, tulaishitila ifibombelo tulefwaya. Pali ino nshita, ifya kutambilapo amavidio ifyo tubomfya mu fikuulwa, ifya musango wa LED ifyalepa amamita 5 mu butali kabili amamita yatatu ukuya mu muulu, bafishitisha pa madola mupepi na 24,000 (nelyo mupepi na K600,000), kabili intambo ya kukulika ku cisoselo iyalepa amamita 15 baishitisha mupepi na madola 20 (nelyo mupepi na K500). E ico aba mu Dipartimenti ya Broadcasting balabombela pamo na ba mu Dipartimenti Iishita Ifintu pa kuti ‘bapende ishingapooswapo’ ilyo bashilashita ifya kubomfya ifili fyonse. (Luka 14:28) Ku ca kumwenako, balafwaya ukwishiba, bushe bantu banga bakalabomfya ico cibombelo? Bushe ukushita icibombelo icipya e kwingaba bwino? Bushe natukwata umwa kucisungila, kabili natukwata ifya kubomfya ifingalenga twalacisakamana bwino na bakucisakamana bwino abo basambilisha ifya ku cisunga?

 Pa kuti ifyo tubomfya pa kukutika ifyebo no kutamba amavidio fitwalilile ukubomba bwino pa nshita iitali na pa kuti tulebomfya bwino indalama, libili libili tulaficeeceeta no kufilungisha. Na kabili pa kufitwala ku cifulo cimo tufisendela mu fibokoshi ifyakosa pa kuti fionaika, kabili ifi ifibokoshi nafyo tulafiwamya nga fyaonaika.

 Abantu abashili ba Nte balapapa pa fyo ifyebo fyumfwika bwino sana ne fyo amavidio yatambika bwino pa kulongana kwesu ukwa citungu. Ku ca kumwenako, pa kulongana kwa citungu kumo, umubomfi wa ku mulabasa umo uukalamba sana alandile pa fyo ifyebo fyumfwika bwino sana ne fyo amavidio yatambika bwino sana pa kulongana kwa citungu. Ba Jonathan abafwilishako ukubika ifyo tubomfya pa kukutika no kutamba amavidio pa kulongana kwa citungu balandile pali uyu umuntu abati, “Alipapile ilyo aishibe ukuti abo tubomba nabo bonse tabayapo ku masukulu mu kusambilila ifya kubomfya ifi fintu, lelo babomfi bakuitemenwa fye. Alandile ukuti kampani yabo kuti yapwisha inshiku 5 pa kuti babike ifyo ifwe twabikile fye mu bushiku bumo na hafu.” Pa kulongana kumbi ukwa citungu, umukalamba wa pali ici icifulo alandile ukuti, “Abengi abasambilila sana ifya kubomfya ifya kulishishako inyimbo ne fya kutambishishapo amavidio balesa pali cino cifulo, lelo nshatalamonapo babomba bwino nge fi imwe mulebomba!”

 Bushe munonkelamo shani mu fyo tubomfya pa kukutika ifyebo na pa kutamba amavidio pa kulongana kwa citungu? Nalimo na imwe mumfwa nga ba David abekala ku England. Balandile abati: “Ndi ne myaka 88, kabili ukutula ku bwaice lyonse ndaya mu kulongana kwa citungu. Lelo pali ino nshita e lyo cilenyangukila sana ukubika amano ku fyo tulesambilila pa kulongana. Amavidio yalawama icine cine, ukulongana kulapwa bwangu kabili ifyo basambilisha filomfwika bwino bwino kabili filekatana.” Ba Micheal abekala ku Nigeria balandile abati, “Apo nomba bamunyinefwe tacibakosela ukumfwa ifyo kalanda alelanda no kutamba amavidio, balabikako sana amano ilyo balelongana kabili balakutikisha.”

 Ilyo mukaya mu Kulongana kwa Citungu no Kulongana kwa Citungu Ukwaibela ukwa uno mwaka ukuleti ‘Mulebila Imbila Nsuma’! mukakwateko inshita ya kutontonkanya pa fyo babombeshe pa kuti mulekutika no kutamba bwino bwino amavidio. Tulatasha nga nshi pa misangulo musangula ukubikako na iyo musangula ukubomfya Intaneti pa donate.pr418.com pantu ilalenga twakwata ifya kubomfya ifisuma ifyo tubomfya pa kukutika ifyebo no kutamba amavidio. Tulemutasha.