Yehova Lesa afwaya abantu bonse ukusambilila pali ena na pa Bufumu bwakwe te mulandu ne fyo ifintu fyaba mu mikalile yabo. (1 Timote 2:3, 4) Ici e calenga Inte sha kwa Yehova balepanga ama Baibolo ne mpapulo shilanda pali Baibolo mu ndimi ishalekanalekana, ukubikako fye na mu lulimi lwa bankomamatwi. Na kuba, icilonganino cesu calipanga amavidio a ayengi mu indimi sha bankomamatwi ishalekanalekana ukucila pali 100! Bushe tupanga shani no kusabankanya ishi mpapulo? Kabili finshi twawamyako?

 Amabumba ya bakapilibula mwi sonde lyonse e bapanga impapulo sha mu lulimi lwa bankomamatwi. Bakapilibula abali mwi bumba limo balabelenga bwino bwino no kumfwikisha ulupapulo balepilibula. Lyena balalanshanya ifyo bengapilibula ifyo fyebo mu lulimi lwa bankomamatwi mu nshila ya-anguka. Pa numa, balakopa ifyo fyebo no kupanga vidio. Pali ino nshita kwaba amabumba ya bakapilibula 60 abapilibula lyonse impapulo ishilanda pali Baibolo mu lulimi lwa bakomamatwi, kabili kwaba na mabumba na yambi 40 abapilibula mu nshita mu nshita.

 Kale twalebomfya indalama ishingi pa kupanga amavidio mu lulimi lwa bankomamatwi. Ama kamera ya kubomfya pa kukopa amavidio e lyo na fimbi fyali ifyakosa umutengo ukucila ifyo fyaba pali ino nshita. Cimbi ca kuti aya mavidio twaleyakopela mu muputule wa kukopelamo uo twaleipangila fwe bene, inshita shimo twalewamya ifikuulwa ifyabako kale e fyo twatendeka ukukopelamo. Kanshi pa kuti fye ibumba lya bakapilibula bakwate fyonse ifyo balekabila twalebomfya indalama ukucila pa ndalama sha ku America $30,000 (K489,879.00).

 Pa kuti tulebomfya bwino indalama abantu basangwilako, icilonganino cesu caliwamyako no kwangusha inshila sha kupilibwilamo impapulo. Tulabomfya ifyo bapanga ifibomba bwino sana kabili ifishakosa umutengo. Kabili mu nshita ya kubomfya umuputule wa kukopelamo, aba mwi bumba lya bakapilibula kuti bakopa amavidio mwi ofeshi lyabo. Balabika fye insalu ya katapakatapa ku cibumba e lyo balakopa. Nga ca kuti abalekabilwa ukukopa pa kupanga ulupapulo nabafula, bamunyinefwe na bankashi abo basalile balaikopa mu ofeshi yabo nelyo ku ng’anda ku mwabo ukwabula ukuya ku muputule wa kukopelamo.

 Twalipanga na maprogramu ya pa kompyuta ayafwa abo balekopa muli vidio. Ici calilenga bakapilibula bacefyako inshita bapoosa pa kupanga ulupapulo mu lulimi lwa bakomamatwi. Bamunyinefwe na bankashi balatasha sana ifi ifintu fyawaminako. Munyinefwe umo, Alexander atile: “Ino nshita amavidio ya mu lulimi lwa bankomamatwi yalafuma libili libili ukucila ifyo cali kale. Ndomfwa bwino sana. Ndatamba aya mavidio cila bushiku.”

 Ino nshita tubomfya indalama sha ku America mupepi na $5,000 (K79,784.50) pa kuti ibumba lya bakapilibula bakwate fyonse ifyo balekabila pa kubomba uyu mulimo. Kanshi nomba tulapilibula amavidio ya mu ndimi sha bankomamatwi ishingi.

 Aba mwi bumba lya bakapilibula nga bapwisha ukukopa vidio ya mu lulimi lwa bankomamatwi, balayasabankanya. Kale twalepanga amavidio tepu na ma DVD, nomba ukupanga ama DVD takwayanguka e lyo cilasenda inshita iikalamba pa kupanga kabili twalepoosapo indalama ishingi nga nshi. Twaletuma ifyo twakopa ku kampani pa kuti babike pa mavidio tepu na pa ma DVD. Lyena baleyatuma ku filonganino. Mu 2013 fye mweka mweka indalama twabomfeshe pa kupanga amavidio ya bankomamatwi aya pa ma DVD yalicilile pa madola ya ku America $2,000,000 (K32,034,460.00).

 Bankomamatwi baletasha sana pali ishi mpapulo. Na lyo line te lyonse caleanguka ukubomfya amavidio pantu impendwa ya mavidio tepu ne ya ma DVD yalefulilako. Inshita shimo pa kukopa ibuuku fye limo ilya mu Baibolo, twalekabila ama DVD ayengi. Munyinefwe umo Gilnei uwa ku Brazil atile: “Lyonse nga tulefwaya ukubelenga ilembo, twaletendeka ukufwaya vidio tepu umuli ilyo lembo e lyo twatendeka ukufwaya apali ifyebo tulefwaya. Tacayangwike.” Nkashi umo Rafayane uwalebomfya ama DVD ya mu lulimi lwa bankomamatwi atile: “Nalenaka pa kuisambilisha Baibolo. Twalepoosapo inshita iikalamba ukufwaya amalembo ne fyebo fimbi mu mpapulo.” Ilyo bamunyinefwe na bankashi baleya mu kubila imbila nsuma balesenda ama DVD na mavidio tepu ayo balelisha pali TV ya muntu alefwaya ukusambilila. Bamunyinefwe bamo balesenda na deki ya kulishishapo ama DVD. Pa numa kwaishile utwa kutambishishapo DVD utwa kwenda nato, kabili bamunyinefwe abengi baletubomfya. Ba Bobby abekala ku United States batile: “Nga watambisha umuntu ilembo limo e lyo ulefwaya ukumulanga ilembo limbi, ilingi twalefumyamo ilya DVD no kubikamo imbi. Ukucita ifi kwalesenda inshita kabili kwalelenga twilabomfya sana Baibolo pa kulanshanya na bantu.”

 Mu 2013, icilonganino ca kwa Yehova califumishe JW Library Sign Language app. Bamunyinefwe na bankashi balabomfya iyi app ukukopolola no kutamba amavidio ya mu lulimi lwa bankomamatwi ukubomfya amafoni na matabuleti. Pa kubala yafumine fye mu lulimi lwa bankomamatwi ulwa American Sign Language. Lyena mu 2017, bali-iwemyeko ica kuti indimi shonse isha bankomamatwi balitendeke ukubomfya iyi JW Library Sign Language app. Bamunyinefwe na bankashi mwi sonde lyonse balitemenwe icine cine. Munyinefwe Juscelino uwa ku Brazil atile: “Nalitemenwe icine cine! Nalimwene ukuti aba mwi Bumba Litungulula balitutemwa fwe bankomamatwi kabili balafwaya twaba Abena Kristu abakosa mu fya kwa Lesa, nga filya fine caba ku balanda. Nalyumfwile bwino kabili iyi JW Library yalilengele natemenwako ukuisambilisha Baibolo.”

 Ino nshita amavidio yonse ayo tulapanga mu lulimi lwa bankomamatwi no kuyabika pa webusaiti yesu na pa JW Library Sign Language app. Kanshi impapulo sha mu lulimi lwa bankomamatwi kuti shapilibulwa, ukukopwa, no kusabankanishiwa mu nshiku fye ishinono ukucila ifyo cali kale pantu palepita imyeshi nelyo imyaka pa kuti tusabankanye. Na kuba mu ndimi ishingi isha bankomamatwi impapulo shifumina pa nshita imo ine ne ndimi sha balanda.

 Umfweni ifyo bamunyinefwe na bankashi bankomamatwi bamo balandapo. Nkashi uwe shina lya Klízia atile: “Takwaba icilonganino cimbi icabika sana amano kuli bankomamatwi nge cilonganino cesu, cilatupekanishisha ifyebo ifyo tukabila ifilenga twaba ne citetekelo icakosa mu nshila iya-anguka. Takwaba abengatupeela ifyacila pa fyo icilonganino ca kwa Yehova citupeela.” Ba Vladimir batile: “Amavidio yalalenga nashininkisha ukuti cine cine Yehova alitutemwa nga filya fine atemwa abantu abashili bankomamatwi.”

 Ilingi mu mavidio ya bankomamatwi mulaba ifyebo fya kuti: “Luno lupapulo tulubomfya mu mulimo wa kusambilisha abantu Baibolo mwi sonde lyonse, kabili ubupe bwa kuitemenwa bulatwala pa ntanshi uyu mulimo.” Tulatasha sana pa ndalama musangula, kabili ilingi musangula ukubomfya donate.pr418.com. Imisangulo shenu shilalenga tulepanga ama Baibolo e lyo ne mpapulo shilanda pali Baibolo mu ndimi ishalekanalekana ukubikako fye ne ndimi sha bankomamatwi.