Mu January 2021, Ibumba Litungulula lya lifumishe ulupapulo lwa kusambililamo Baibolo ulupya ulutila, Kuti Mwaba ne Nsansa Umuyayaya! a Bushe mwaumfwile shani ilyo babilishe? Ba Matthew abekala ku Canada batile: “Nalitemenwe sana! Kabili nalicililemo no kutemwa ilyo nakutike amalyashi ayalelanda pa citabo na lintu naletamba amavidio umo balondolwele ico bapangile icitabo ne fyo baceseshepo ilyo fye bacipangile, naliya ndetemenwako. Nalefwaisha sana ukucimona no kutendeka ukucibomfya.”

 Icitabo citila Kuti Mwaba ne Nsansa Umuyayaya! calilenga twatendeka ukubomfya inshila iipya iya kutungulwilamo amasambililo ya Baibolo. Na lyo line ifi te fyeka fye ifyapusana pali ici citabo icipya na filya twalebomfya kale. Nga mulebomfya icitabo citila Kuti Mwaba ne Nsansa Umuyayaya! icapulintwa kuti mwaumfwa ukuti cilomfwika icapusanako. Pa kuti mwishibe ico twalandila ifi lekeni tulandeko pa fyo ici citabo capangwa.

 Amapepala ayatikama. Mulandu nshi twabomfyeshe amapepala ya musango uyu? Icitabo citila Kuti Mwaba ne Nsansa Umuyayaya! calikwata ifikope ifisuma ukucila pali 600 ukucila ifyali mu citabo citila Ico Baibolo Isambilisha! pa miku nalimo 10. Na kabili icitabo icipya calikwata incende apashaba nangu fimo pali cila libula. Ifi fintu fibili twalandapo fyalilengele kwaba ubwafya: Nga ca kuti ipepala nalyanguka ifikope ifili pe buula ilikonkelepo filamoneka. Kanshi pa kupwisha ubu bwafya bamunyinefwe ababombela ku International Printing Department (IPD), ku Wallkill, mu New York, U.S.A., balyeseshe amapepala ayali 4 ayo tubomfya pali ino nshita pa kupulinta impapulo. Komiti ya Kulemba iye Bumba Litungulula yalicecetele amapepala yonse ayo baeseshepo, kabili basalilepo ayalemoneka ayatikama pali yonse. Nangu ca kuti aya mapepala yalikosa sana umutengo nga kuyalinganya kuyo tubomfya pa kupulinta impapulo shesu shimbi, yalalenga abasambi ba Baibolo ukubelenga cila libula mu citabo citila Kuti Mwaba ne Nsansa Umuyayaya! ukwabula ukupumfyanishiwa ku fikope ifili pe bula ilikonkelepo pantu yalitikama.

 Inkupo iyapusanako. Inkupo ya citabo icipya yalipusanako ne nkupo sha fitabo fimbi pantu yena balibikako ka plasitiki . Mu cifulo ca kubomfya ka plasitiki akabeeka ako babomfya lyonse pa kupanga inkupo sha fitabo, kuli iyi nkupo kwena babomfya ka plasitiki akashabeeka ici cilenga icikope icaba pa nkupo cilemonekesha sana. Na kabili aka kaplasitiki babikako kalalenga icitabo ukukanaonaika bwangu nangu umuntu alecibomfya sana. Na lyo line iyi plasitiki iishabeka iyo babika ku nkupo yalikosa sana umutengo ukufika fye na ku miku 5 ukucila iya beeka iyo tubomfya ku fitabo fimbi. Kanshi ama bethel ayalekanalekana yalibombele pamo pa kuti bashite ifya kubomfya pa kuti inkupo tailebeeka, ifya nakako umutengo pa kupanga inkupo ya musango uyu.

 Cinshi calengele ukuti basale ukubomfya ifintu ifyakosa umutengo pa kupanga inkupo ya citabo? Munyinefwe uubomba ku dipartimenti ya IPD alondolwele ukuti: Tule-enekela ici citabo ukubomba sana, kanshi tulefwaya ukuti cikaletwalilila ukumoneka bwino nangu umuntu acibomfya pa nshita iitali. Ba Eduardo ababombela umo bapulintila impapulo pa bethel ya ku Brazil batile: “Natutemwa sana ukumona ifyo icilonganino ca kwa Yehova cibomfeshe ifintu ifyakosa kabili ifisuma pa kuti icitabo cilemoneka bwino, cibe icakosa, kabili icayanguka ukusunga, kabili pa nshita imo ine no kubomfya bwino imisangulo.”

 Twatendeke ukupulinta icitabo citila Kuti Mwaba ne Nsansa Umuyayaya! mu March mu 2021. Pali iyi nshi ninshi kuli icikuko ca COVID-19 kabili ici calilengele twakwata amafya. Mu nshita ya cikuko aba pa Bethel tabalefuma, kabili takwali na bamunyinefwe na bankashi ababomba umulimo wa pa Bethel abafuma ku mayanda baleisa pa Bethel, kabili takwali no kwitilapo aba bwananyina ukwisa mu kubombela pa Bethel. Ici calengele ukuti abakubomba umulimo wa kupulinta bacepa sana kabili ku ncende shimbi ifikuulwa fya kupulintilamo fimo kwali ukufisala pa mulandu wa mafunde ubuteko bwabikileko.

 Bushe twabombele shani nangu ca kuti kwali aya mafya? Ilyo batusuminishe ukutila kuti twabomba mu fikuulwa fya kupulintilamo bamunyinefwe na bankashi ukufuma ku madipartimenti yambi pa Bethel balebapeela umulimo wa kuya mu kwafwilishako ukupulinta. Ba Joel ababomba ku dipartimenti ya IPD batile: “Ifyo aba bwananyina baleipeelesha ne fyo balefwaisha ukusambilila imilimo iyo bashabombapo fyalilengele ukuti umulimo ubombwe bwino.

 Te mulandu na mafya yonse aya, apa twalipulinta amakope ya citabo citila Kuti Mwaba ne Nsansa Umuyayaya! ayengi nga nshi. Pa kupanga ifi fitabo tulabomfya ifintu ifyalekanalekana pamo nga printing plates, laminate film, amapepala, inki, na gulu. Mu mweshi fye 5 iya kubalilapo indalama sha ku America ukucila pa mamilioni 2.3 e shabombele ku kushita fye ifya kubomfya pa kupulinta. Pa kuti tubomfye bwino indalama, tulabikako sana amano pa kuti tupulinte fye ifitabo ifyo ifilonganino filekabila epela.

 Bushe abasambilisha Baibolo e lyo na abo basambilisha bomfwa shani pali ici citabo icipya ica kusambililamo Baibolo? Munyinefwe Paul uwikala ku Australia atile: “Icitabo citila Kuti Mwaba ne Nsansa Umuyayaya! cisuma sana ica kuti ndatemwa nga nshi ukutungulula amasambililo ya Baibolo muli ici citabo. Ici citabo balicipanga bwino sana kabili mwaliba amepusho ayo umuntu alingile ukuyasukila. Ifyabamo balifitantika bwino kabili fyalyanguka ukumfwa, mwaliba amepusho ayafika abasambi pa mutima , amavidio, ifikope, amacharti e lyo ne fyo umusambi engacita. Ala cisuma icine cine, kabili cilalenga ndeishibilako ifya kusambilisha.”

 Umusambi wa Baibolo umwaume uwa ku United States atile: “Nalitemwa sana icitabo icipya. Ifikope filalenga ndeumfwikisha ifishinka fikalamba. Amavidio yalamfika pa mutima kabili yalankoselesha ukucitapo cimo.” Uyu musambi alasambilila imiku ibili mu mulungu kabili alaya lyonse mu kulongana kwa pa cilonganino.

 Icitabo citila Kuti Mwaba ne Nsansa Umuyayaya! cilefwaikwa mu ndimi ishingi. Na kuba ukufika pali ino nshita Ibumba Litungulula lyalisuminisha ukusabankanya ici citabo mu ndimi 710, kanshi nabalundako indimi 340. Ishi indimi basuminishe tabashisuminishe ilyo balepanga icitabo ca Ico Baibolo Isambilisha.

 Bushe tufumya kwisa indalama shakubomfya pa kupulinta ifi fitabo? Shifuma mu misangulo ya mwi sonde lyonse kabili iingi basangula ukubomfya Intaneti pa donate.pr418.com. Tulatasha nga nshi pa fyo mwaba na bukapekape pantu cilalenga tulepanga impapulo sha kusambililamo Baibolo kuli bonse abafwaya ukusambilila pali Yehova no kuba “no mweo umuyayaya.”—Amalumbo 22:26.