Yehova alitemwa ukusambilisha abantu bakwe. Ici calilenga icilonganino ca kwa Lesa ukubikako amasukulu pa kuti abana be sukulu balesambilila ifya kubomba bwino imilimo babapeela. Isukulu limo pali aya, li Sukulu lya Bakabila ba Bufumu (SKE). Mu myaka ya nomba line, icilonganino ca kwa Lesa tacabika fye amano ku kupekanya ifyo basambilisha mu masukulu lelo calibika amano na kukuwamya ifikuulwa apabela amasukulu pa kuti filemoneka bwino. Ico bacitila ifi kulenga abasambilisha e lyo na bana be sukulu ukulabika amano kwi sukulu. Bushe imisangulo musangula yafwilisha shani icilonganino ca kwa Lesa pa kuti cicite ifi?

 Pa myaka iingi, amasukulu ya buLesa yalebeela pa Mayanda ya Bufumu na mu Fikuulwa fya Kulonganinamo Ukulongana Kukalamba. Nomba cinshi calenga tukuule nelyo ukuwamya ifikuulwa na fimbi ifibomba fye ku ma sukulu ya buLesa? Moneni ifintu fitatu ifyalenga:

 Ukukabila abakubomba imilimo. Munyinefwe Christopher Mavor Uwafwilisha Muli Komiti ya Mulimo iye Bumba Litungulula atile: “Amaofesi ya musambo yalekabila sana abakubomba imilimo. Ku ca kumwenako, mu 2019 iofesi lya musambo wa ku Brazil lyalekabila abapwishishe isukulu lya SKE nalimo 7,600, abakubomba imilimo iyalekanalekana mu ncende iyo umusambo wangalila.” Umusambo wa ku United States walandile ukuti balekabila bapainiya abafikapo abengasambilishako bambi ifya kubomba ubunte bwa ku cintubwingi mu misumba iikalamba, ukubila imbila nsuma pa fyabu e lyo na mu fifungo. Kabili kulekabilwa na bamunyinefwe abakubomba mu dipartimenti ya Local Design/Construction Department e lyo na mu Makomiti ya Kumfwaninamo ne Fipatala. Abapwisha isukulu lya SKE kuti ba-afwilishako ukubomba iyi milimo.

 Abalefwaya ukuya ku sukulu balifulilako. Mu misambo iingi balapokelela amaformu ayengi aya bepusha ukuya ku sukulu, amaformu yalafula sana ukucila na pa bantu abo bengakumanisha ukwita. Ku ca kumwenako, umusambo wa ku Brazil wapokelele amaformu nalimo 2,500 aya baleipusha ukuya kwi sukulu lya SKE mu mwaka fye umo. Nomba apo tabakwete ifikuulwa ifingi umwa kukwatila isukulu, bakumanishe fye ukwita abasambi 950.

 Umwakwikala umusuma. Isukulu lya SKE nga lyabela mu Ng’anda ya Bufumu nelyo mu Cikuulwa ca Kulonganinamo Ukulongana Kukalamba, ilingi line abasambi bekala mu mayanda ya bamunyinefwe na bankashi. Ifya musango uyu fibomba fye bwino ku ncende uko bashikwata amasukulu ayengi mu mwaka. Lelo ku ncende ukuba amasukulu ayengi, cilafya ku babwananyina ukusunga abasambi mu mayanda yabo pa myeshi iingi mu mwaka. Kanshi eco tufwaila ukuti apali ifikuulwa fya kusambililamo paba no mwakwikala abasambi.

 Pa kuti tukwate icikuulwa cimo umo abasambi nalimo 30 bengalasambilila, amayanda umwakwikala abasambilisha mu masukulu ya buLesa e lyo no mwakwikala abasambi ukusanshako no mwakubombela imilimo imbi iifwaikwa, palapooswa indalama ishingi nga nshi ukulingana ne ncende uko balekuulila, e lyo ne fintu fimbi.

 Ilingi line ifikuulwa apabeela amasukulu, bafibikila ku ncende iitalwikeko ne tauni lelo ukwaba imyendele iya-anguka. Ilingi line kuti basala ku ncende ukwaba bakasabankanya abengi pa kuti baleafwilishako ukubomba imilimo imo pamo nga ukuwamya ifikuulwa e lyo ne fibombelo fya kubomfya.

 Pa fikuulwa apabela amasukulu palaba amalaibrare, imiputule umwa kuisambilishisha, amakompyuta, amapulinta e lyo ne fintu na fimbi. Ilingi line balabikapo no muputule umwakuliila abana be sukulu pamo na babasambilisha. Kabili palaba ne ncende umwa kutukushisha umubili.

 Umuputule wa kusambililamo balaupanga bwino sana. Munyinefwe Troy uubombela mu Dipartimenti Ilolekesha pa Makuule mwi Sonde Lyonse ku Warwick, mu New York atile: “Twalipwisheko Dipartimenti Ilolekesha pa Masukulu ya BuLesa pa kuti tupange umuputule wa kusambililamo uwali no kulenga abasambi balesambilila bwino. Bamunyinefwe balitwebele ifya kukonka pa kupanga umuputule pamo nga ifyo ufwile ukuba ubukulu, ifyo ufwile ukulamoneka, ifyo ulubuto lufwile ukuba ukubikako ne fyo ifya kutambilako amavidio ne ciunda fifwile ukuba.” Munyinefwe Zoltán uusambilisha mwi sukulu lya SKE ku Hungary, alandile ukuti: “Pa kubala, tatwakwete ifisoselo, kanshi ilingi kwaleba ukwibukishako abasambi ukuti mulelandishako. Nomba ubu ubwafya bwalipwa pantu cila musambi alakwata icisoselo apo ekele!”

 Bushe abasambi e lyo na babasambilisha bomfwa shani ifi babapangila ifikuulwa ifisuma umwa kusambilila? Nkashi Angela uwali mu SKE ku Palm Coast mu Florida ku U.S.A alandile ukuti: “Cifulo icisuma sana kabili apaba umutende. Fyonse balifipanga bwino sana ukubikako no muputule wa kusambililamo e lyo ne miputule ya kwikalamo, kanshi ifi filalenga tulebika sana amano ku kusambilila.” Munyina Csaba uusambilisha mwi sukulu lya SKE ku Hungary, alatemwa sana ukuliila pamo ifya kulya na basambi. Alandile ukuti pa nshita balelya, “abasambi balalanda ifyo baletontonkanya e lyo ne fyabacitikilapo. Ici cilalenga twaishiba bwino abasambi. Kabili cilalenga twaishiba bwino ifyo twingasambilisha abasambi ukulingana no kukabila kwabo.”

 Abasambi e lyo na babasambilisha bamona ifi fikuulwa ifisuma ukuti bupe ukufuma kuli “Kasambilisha wesu Uwapulamo,” Yehova. (Esaya 30:20, 21) Nkashi wa ku Philippines uwasangilwe kwi sukulu lya SKE pa fikuulwa ifyo bawemye, alandile ukuti: “Nga twamona ifyo incende ye sukulu yalemoneka bwino, twaleiluka ukuti tatwali fye abasambi lelo twali abeni ba kwa Yehova abaibela. Afwaya tulesekelela ilyo tulesambilila ifingi pa Cebo cakwe.”

 Imisangulo musangula e ilenga tulekuula, ukuwamya e lyo no kulungisha ifileonaika pa fikuulwa fye sukulu, ilingi line iyi imisangulo isangulwa ukubomfya donate.pr418.com. Tulemutasha nga nshi pa fyo mwaba na bukapekape.