Aba mwi Bumba Litungulula balafwaisha ukubomfya indalama musangula ku kukuula ifikuulwa ifilenga twalabomba bwino umulimo wa kubila pa Bufumu. Ku ca kumwenako, mu mwaka wa mulimo uwa 2023 utubungwe uto twalembesha mwi funde uto amaofesi ya Nte sha kwa Yehova, twabomfeshe amadola ya ku America 500 milioni (nalimo K13,565,000) ku kushita, ukukuula, ukuwamya no kusakamana Amayanda ya Bufumu ne Fikuulwa fya Kulonganinapo Ukulongana Kukalamba. a Kwali indalama na shimbi isho ifilonganino mwi sonde lyonse babomfeshe ku kulungisha ifyaleonaika ku Mayanda ya Bufumu no kuyasunga bwino.

 Na kabili, indalama musangula balashibomfya na ku kukuula amaofesi apa bombela bamunyinefwe abatantika ifyo tulingile ukubomba umulimo wa kubila imbila nsuma mwi sonde lyonse. Twalyangushako imilimo tubomba pa maofesi yesu pa kuti tulekwata indalama ishingi isha kubomfya ku kukuula no kuwamya Amayanda ya Bufumu ne Fikuulwa fya Kulonganinapo Ukulongana Kukalamba. Na lyo line, tucili tulekabila indalama na shimbi isha kubomfya ku kuwamya amaofesi yesu nelyo ukuyakuulila pa cifulo cimbi. Cinshi cicindamine ukubomba iyi imilimo? Bushe amaofesi yesu yatungilila shani umulimo wa cindama uwa kubila imbila nsuma? Natwasuke aya amepusho.

 Napapita imyaka ukucila pali 30 nelyo 40 ukutula apo twakuulile amaofesi yesu ayengi! Ba Nicholas aba mu Dipartimenti Ilolekesha pa Makuule mwi Sonde Lyonse balandile ukuti: “Nangu fye fikuulwa ifyo basunga bwino, mu kuya kwa nshita filonaika. Lelo nga twa fiwamya, fiba fye nga filya fyali ilyo twafikuulile kabili ici cilalenga fyaikala imyaka iingi.”

 Icilonganino ca kwa Lesa nga ca-alulako fimo, tulaalulako imilimo tubomba pa maofesi yesu. Mwi sonde lyonse, ukutula apo twakuulile amaofesi yesu, impendwa ya bakasabankanya yalikulilako sana. Kanshi tulakabila bamunyinefwe na bankashi na bambi aba kuitemenwa ukubombela pali aya amaofesi. Ici calilenga amaofesi ayalemoneka kwati yakalamba, yatendeka ukucepa pa mulandu wa kuti abalefwaikwa ukubomba nabafula!

 Cimbi ico tubikako sana amano kushininkisha ukuti ifikuulwa nafikosa pa kuti tafiletele ubusanso ku bantu. Apo twikala mu nshiku sha kulekelesha, amasanso yabipisha yaleya yalefulilako fye. (Luka 21:11) Ilyo tulewamya nelyo ukukuula cipya cipya ifikuulwa, tulabomfya inshila ishipya pa kukuula ifikuulwa ifyakosa pa kuti ababombela pali ifyo ifikulwa bacingililwa ku masanso ayengesa. Ukukuula ifikuulwa muli iyi nshila kulalenga filaonaika bwangu ica kuti limo tulafibomfya ukupekanishishamo ifya kubomfya pa kusakamana abaponenwe na masanso e lyo no kutungilila aba bwananyina ilyo balebila imbila nsuma nga kwacitika ubusanso.

 Aba mwi Bumba Litungulula bapingwile ukuti kube ukuwamya ifikuulwa fya misambo. E ico mu mwaka wa mulimo uwa 2023, twaliwemye ifikuulwa fya misambo 43. Ici cilolele mu kuti kwali ukuwamya ifikuulwa fya misambo mupepi na hafu ya mpendwa ya misambo yonse iyaba mwi sonde lyonse. Moneni fimo ifilelanga ukuti ukubomba uyu mulimo kwalicindama sana.

 Ku Angola. Munyinefwe Matt, uwaba muli Komiti ya Musambo ku Angola alandile ati: “Tulomfwa bwino sana ukumona uko ubusesemo bwaba pali Hagai 2:7 bulefikilishiwa mu nshila iyaibela. Mu myaka fye 10, bakasabankanya ukucila pali hafu ya mpendwa ya bakasabankanya twakwete balisa mu cilonganino ca kwa Yehova! Pa kuti tuletungilila bakasabankanya aba bonse, twalekabila aba kubombela pa Bethel abengi. Nomba apo ifikuulwa fya Bethel yesu finono, twalifililwe ukwitilapo aba kubombela pa Bethel na bambi. Ici calengele ababombela pa Bethel abengi batendeka ukubomba imilimo iingi e lyo no kubomba ama awala ayengi.”

 Bamunyinefwe balibebele ukutontonkanya pa fyo balingile ukucita pa kuti ubu bwafya bwingapwa. Pa kubala bapingwilepo ukuti icingapwisha ubu bwafya bwangu bwangu kuwamya ifikulwa bakwata kale pa Bethel. Nomba pa numa yu kufwailisha no kupitulukamo bwino sana, basangile ukuti pa kubomfya bwino imisangulo tabalingile ukuwamya umusambo. E ico, bapingwilepo ukushita icikuulwa icali mupepi no musambi no kuciwamya. Ba Matt batile: “Pa kubala ilyo bamunyinefwe baebele aba muli Komiti ya Musambo ukuti baletontonkanya pa kushita icikuulwa no kuciwamya, twamwene kwati tacali no kubomba bwino nge nga fintu icikuulwa ico fwe bene twingaikuulila cingabomba. Nomba natumona ukuti ici cikuulwa cilebomba bwino sana. Yehova alipaalile ifyo twasalilepo ukucita.”

 Mu myaka ya ku ntanshi Bethel ya ku Angola nayo ine, nalimo tukakabila ukuikushako. Na lyo line, ici cikuulwa ico bashitile no kuwamya, ukubikako no tuyanda twa kusesha utwaba ba Bethel e lyo ne fikuulwa fimo ifyo basonkela ifyaba panse ya Bethel apo bamo bekala, filelenga bamunyinefwe batwalilila ukubomba bwino umulimo wabo na lintu impendwa ya bakasabankanya ileya ilekulilako.

 Ku Japan. Napapita imyaka mupepi na 40 ukutula apo ifikuulwa ifikalamba ifyaba pa Bethel ya mu Japan bafikuulile, kabili ifingi tabafiwamyapo. Bamunyinefwe balabombesha ukusunga bwino ifi fikuulwa, na lyo line napapita imyaka iingi kanshi nafibomba ukucila na pa myaka twamwene ukuti eyo fifwile ukubomba ilyo twalefikuula. E co tutendekele umulimo uukalamba uwa kuwamya ifi fikuulwa.

 Ifyo bamunyinefwe ababombela pa Bethel bekala na fyo fyalyaluka mu myaka yapita. Ilyo umwaka wa 2015 ushilafika, ababombela pa Bethel balebepikila fye ifya kulya ku babombela mu kicini ya pa Bethel. Kanshi mu miputule iingi pa Bethel ya mu Japan mwaleba fye kicini iinono umwa kupekanishisha fye ifya kulya fimo fimo. Nomba ino nshita aba pa Bethel balaipekanishisha ifya kulya ifingi. Ifi balewamya ifikuulwa, mu miputule nomba balebikamo kicini iikalamba ababombela pa Bethel baleipika bwino ifya kulya. Nkashi Kumiko, uubombela pa Bethel ya mu Japan atile: “Ndomfwa bwino ifi nomba twakwata umwa kupekanishisha ifya kulya, pantu cilalenga ndetungilila ifi ifintu fya-aluka ukuti tufwile ukuipekanishisha ifya kulya fimo.”

 Umulimo aba bwananyina babomba pa Bethel ya mu Japan walicindama kabili ulafwilisha aba bwananyina mwi sonde lyonse. (Mateo 28:19, 20) Bethel ya mu Japan yaba pa ma Bethel yabili ayapulinta Baibo yonse. Kanshi pa milimo tubombele ilyo kuli ubukuule pali ukushita no kubika ci mashini ica kulakolonganika ulukungu mu cikuulwa umo bapulintila impapulo pa kuti bamunyinefwe ababombelamo balecingililwa ku malwele bengakwata pa mulandu no lukungu. Pa kushita no kubika ici ci mashini twabomfyeshe indalama mupepi na madola 1 milion. Ici calilenga twatwalilila ukupulinta no kusabankanya impapulo ishilenga twakosha icitetekelo cesu.

 Bamunyinefwe balicitile ifyali no kulenga twatwalilila ukupulinta ama Baibo no bukuule pa nshita imo ine. Munyinefwe Trey, uwaba muli Komiti ya Musambo iya ku Japan atile: “Ilyo kwali ubukuule , icilonganino cesu ca lifumishe ama Baibo mu ndimi ishingi kabili impendwa ya bantu abalekabila ama Baibo yaleya ilekulilako fye. Tacayangwike ukutantika programu pa kuti abalebika ci mashini e lyo na balepulinta impapulo bonse batwalilile ukubomba. Kanshi twalibombele pamo na ba mu ma dipartimenti yalekanalekana e lyo na kampani twalebombela pamo nayo pa kutantika inshita.” Te mulandu na ya mafya twakwete, cila mweshi twalepulinta ama Baibo mupepi na 220,000 ukufuma March ukufika mu August 2023. Na kuba muli iyi yine myeshi e lyo umulimo wa bukuule mu cikuulwa ca kupulintila impapulo wakosele sana. Iyi milimo yonse yalipwile ukwabula ukuti tubomfye indalama ukucila pa sho twapendele ukuti esho twali no kubomfya ku bukuule.

 Cimbi ico tubikileko amano ilyo kuli ukuwamya ifikuulwa kubomfya bwino amalaiti. Amasola ayo tukabika yakalenga twilabomfya ukuti ku ndalama isho tubomfya ku kulipila amalaiti cila mwaka ku kafuma indalama amadola nalimo 120,000. Tukabika na mawindo ayakwata ama glasi yatatu a yakambantana. Ici cikalenga twilabomfya sana amalaiti kabili ici cikalenga ukuti ku ndalama isho tubomfya cila mwaka kukulipila amalaiti kukafuma indalama amadola nalimo 10,000. Nangu ca kuti ifi fikalenga tukabomfye indalama ishingi pa kuwamya ifikuulwa, fikatwafwa ukubweshako icipendo ca ndalama ukucila pa madola nalimo 3.5 milioni pa nshita aya amasola na mawindo yakalabomba nga kulinganya kusho twali no kubomfya nga tatwabomfeshe ifi fintu pa kuwamya ifikuulwa. Na kabili inshila tulekulilamo ifi fikulwa ikacefyako filya ifikuulwa fyonaula icifulo pa ncende bafikulila.

 Iyi milimo ya makuule iili pali aya ama Bethel yabili, ilelanga ukuti tulekabila ukubombesha ukupanga ifikuulwa fya pa Bethel mu nshila iikalenga aba ababombela pa Bethel baletungilila bwino aba bwananyina. Na lyo line tucili natukwata umulimo uukalamba. Ba Aaron, ababombela mu Dipartimenti Ilolekesha pa Makuule mwi Sonde Lyonse batile: “Bamunyinefwe na babomba imilimo iingi lelo kuli imilimo na imbi iingi iyo tufwile ukubomba.” Bushe tukakumanisha shani ukubomba imilimo ishele? Ba Aaron batile: “Tulatasha sana pa misangulo aba bwananyina basangula iyafwilisha umulimo wa makuule. Kabili tulatasha na pa fyo bamunyinefwe baipeeleshe ukubombako e lyo na balealulako fimo mu mikalile yabo pa kuti bakabombeko uyu mulimo ku ntanshi. Ifi bamunyinefwe baipeelesha ukusangula indalama no kubombako filanga fye ukuti Yehova alepaala uyu mulimo.”—Amalumbo 110:3.

 Imisangulo aba bwananyina basangula mu kuitemenwa e ilenga tulebomba umulimo wa kukuula ifikuulwa no kufiwamya kabili abengi basangula ukubomfya donate.pr418.com. Tuletasha icine cine pa fyo mwaba na bukapekape.