Inyimbo ca bupe ico Yehova atupeela. Kuti shalenga twayalula ifyo tuletontonkanya, ne fyo tuleumfwa, kabili kuti shatukoselesha. Ukwabula no kutwishika ifi twalandapo e fyo ne nyimbo ishaibela shilenga tuleumfwa. Na kuba ishi inyimbo kuti shalenga twapalama kuli Yehova.

 Ukufuma mu 2014, inyimbo ishaibela ukucila pali 70 shalifuma, kabili nalimo ulwimbo lumo pali ishi e ko lwaba mu ndimi ukucila pali 500! Nomba nalimo kuti mwalayipusha amuti, ‘Ni bani babombela pali ishi inyimbo kabili bashipanga shani?’

 Bamunyinefwe na bankashi ababombela ku nyimbo ababa mu dipartimenti ya Audio/Video Services e bapanga inyimbo ishaibela, kabili Komiti ya Kusambilisha iye Bumba Litungulula e yangalila aba bamunyinefwe. Bamunyinefwe na bankashi ababombela pa nyimbo baba 13 kabili e balemba inyimbo, e bapanga ifyo ifilimba fikalalila e lyo ne milimo imbi ikabilwa pa kuti ulwimbo lupangwe. Na kabili, Komiti ya Kusambilisha yalisuminisha aba bwananyina mwi sonde lyonse, abafwilishako imilimo ya Bethel ababombela ku ng’anda ukubomba uyu mulimo. Pali aba paba abalemba inyimbo, abaishiba ukulisha ifilimba, e lyo na ba kwimba. Aba aba bwananyina balabomfya ifya bupe fyabo pa kubomba uyu mulimo lelo bali-icefya kabili tabafwaya ukuti abantu balebalumbanya nelyo ukubakumbwa.

 Bushe bapanga shani inyimbo ishaibela? Ica kubalilapo, Komiti ya Kusambilisha e isala amalembo umufwile ukufuma ulwimbo e lyo ne fyo lulingile ukulenga abalekutika ukumfwa. Lyena bamunyinefwe ababombela pa nyimbo, balasala abafwile ukupanga ifyo bakulakonka pa kulisha ifilimba, na bafwile ukulemba amashiwi ya lwimbo. Lyena balapangako ulwimbo ulwa kweseshapo kabili balalukopa. Komiti ya Kusambilisha ilakutikako ku lwimbo lwa kweseshapo kabili ilalandapo pa fyo bengaluwamyako. Lyena bamunyinefwe ababombela pa nyimbo balawamya umulekabilwa no kupanga ulwimbo ulufwile ukufuma. Ishi inyimbo bashikopela mu fifulo ifyalekanalekana ukubikako fye na mu ma bethel e lyo na mu mayanda ya bantu umo bakwata ifikabilwa pa kukopa ulwimbo.

 Pa kupanga no kukopa inyimbo ishaibela bamunyinefwe babomfya amaprogramu ya pa kompyuta ayalekanalekana. Na kabili pa kuti babombe uyu mulimo babomfya ifilimba, ifisoselo, amasipika, mixing consoles, na ma amplifier. Umutengo wa microphone imo utendekela pa madola 100 aya ku America kabili ulacila pa madola 1,000 (nelyo K1,766 ukufika kuli K17,660 no kucilapo). Mu 2020, twabomfeshe amadola ya ku America 116,000, (K2,048,560) pa kushita ifya kubomfya pa kukopa inyimbo.

 Tucita shani pa kuti tubomfye bwino imisangulo? Mu nshita ya kubomfya bamuyinefwe na bankashi abengi aba pa Bethel pa kupanga inyimbo, tulabomfya aba bwananyina abafwilishako imilimo ya pa Bethel ababombela ku ng’anda. Na kabili mu nshita ya kuti aba bwananyina abengi bese pamo pa kulisha inyimbo, bamunyinefwe babomfya amaprogramu ya pa kompyuta ayafumya ifiunda ifyalekanalekana pamo nga ifya nsale.

 Bamunyinefwe na bankashi balitemwa sana ukukutika ku nyimbo ishaibela. Ba Tara abekala ku Germany, batile: “Inyimbo shilalenga nateeka umutima nga ni nsakamana. Nga ndekutika ku nyimbo mu lulimi lwandi ngumfwa kwati Yehova na nkumbatila.” Munyinefwe Dmitry uwikala ku Kazakhstan atile: “Ndomfwa bwino ukukutika ku nyimbo shaibela pantu nshisakamana ukutila kuti shalenga nalatontonkanya pa kucita ifyabipa nga fintu inyimbo sha muli ici calo shingacita. Na kuba ishi nyimbo shilalenga nabika sana amano kuli bucibusa bwandi na Lesa.”

 Ba Delia abekala ku South Africa balondolwele ifyo bomfwa pa nyimbo ishaibela, batile: “Shilalenga icitetekelo candi ukukosa. Nga ndeumfwa ububi nelyo nga ndi no bwafya ubukalamba, lyonse kulaba ulwimbo ululingene ne fyo ndeumfwa ulunkoselesha. Ilingi line ifyo inyimbo shilila filalenga natendeka ukumfwako bwino!”

 Kwaliba inyimbo ishaibela shimo isho abantu batemwa sana. Ba Lerato nabo abekala ku South Africa batile: “Ulwimbo ulutila ‘Paradaise Ili Mupepi Sana’ no lutila, ‘Icalo Icipya’ shilangafwa ukwelenganya inshita ilyo nkasengela bamayo. Lyonse nga nakutika kuli ishi nyimbo ndelenganya bamayo baleisa ulubilo mu kunkumbatila.”

 Ulwimbo ulwaibela lumo lwalyafwile umukashana uuli ne myeka 16 uwikala ku calo ca Sri Lanka. Atile: “Abaletufunda sayansi balinjebele amashiwi ayabipa ninshi pali na bana besukulu banandi pa mulandu wa kuti ndi Nte ya kwa Yehova. Nalyumfwile umwenso kabili nshaishibe ne fya kulanda. Ilyo nabwelele ku ng’anda bamayo banjebele ukuti nkutike ku lwimbo ulutila ‘Tuleisambilisha Baibolo.’ Ulwimbo lwalingafwile ukwishiba ukuti nalingile ukulaisambilisha no kupekanya ifyo ningasuka. Ubushiku bwakonkelepo nalilandile na bakafundisha bandi. Balikutike kabili balandile ukuti nomba baumfwikisha ifyo Inte sha kwa Yehova basuminamo. Ndatasha sana icilonganino ca kwa Yehova pa kutupekanishisha inyimbo ishitukoselesha.”

 Ni kwi tufumya indalama sha kubomfya pa kupanga ishi nyimbo? Shifuma ku misangulo ya mulimo wa mwi sonde lyonse kabili iyi imisangulo iingi basangula ukubomfya intarnet pa donate.pr418.com. Tulemutasha pali bukapekape bwenu.