Cila mwaka bamo ababomba umulimo wa nshita yonse uwaibela, balabeta kwi Isukulu lya Baibolo Ilya Gileadi Ilya Watchtower, ilibela ku Watchtower Educational Center mu Patterson ku New York. a Abaya kuli ili isukulu balasambilila ifya kubomba bwino imilimo yalekanalekana mu cilonganino ca kwa Yehova. Ifyo basambilila muli ili isukulu filabafwa ukukosha ifilonganino ne misambo mwi sonde lyonse e lyo no kwafwa aba bwananyina.

 Isukulu lya Gileadi lya bantu abafuma mu fyalo ifyalekanalekana. Ku ca kumwenako Isukulu lya Gileadi ilyalenga 147 ilyaliko mu 2019, lyakwete abasambi 56 abafumine mu fyalo 29 ifyalekanalekana. Abasambi abo beta kwi Isukulu lya Gileadi bantu babomba umulimo wa nshita yonse uwaibela pamo nga babombela pa Bethel, ba kangalila ba muputule, bamishonari, nelyo bapainiya baibela.

 Pa kupekanya ili isukulu batendeka ninshi kucili inshita iikalamba pa kuti likatendeke. Ku ca kumwenako, Dipartimenti Ilolekesha pa Myendele iyaba pa Maofeshi Yakalamba, (WHQ Travel) ilashita amatiketi ya ndeke ya bo betile kuli ili isukulu. Indalama isho balebomfya pa kuti cila musambi aye kwi Isukulu lya Gileadi ilyalenga 147 ku Patterson e lyo no kubwelelamo ku mwabo shaleba nalimo K23,700. Abasambi abafumine ku Solomon Islands, baninine indeke 4 pa kuya ku Patterson e lyo pa kubwelelamo ku mwabo baninine indeke shitatu. Balyendele inshiku ishingi! Umutengo wa matiketi ya ndeke ayo bashitile wafikile kuli K50,700 pali cila musambi. Pa kubomfya bwino imisangulo, aba muli Dipartimenti Ilolekesha pa Myendele iyaba pa Maofeshi Yakalamba, balabomfya programu ya pa compyuta iilenga baleshita amatiketi ayanaka umutengo. Iyi programu ilatwaliila ukwikatila amatiketi ayanakako umutengo uku ninshi ilefwaya na yambi ayanakishe sana umutengo pa milungu iingi nelyo fye pa myeshi iingi. Aba muli iyi dipartimenti balabomfya amapointi ayo aba bwananyina basangula ilyo baleshita amatiketi ya ndeke.

 Abasambi abengi balakabila ifitupa fya kwingililapo mu United States of America. Pa kubafwa ukupoka ifitupa Dipartimenti Ilolekesha pa Milandu iyaba pa Maofeshi Yakalamba ilapokelako abasambi ifitupa. Balabomfya indalama ukufika ku cipendo ca K11,000 pali cila musambi pa kuti bapoke e lyo no kulembesha ifitupa.

 Bushe tunonkelamo shani mu fyo aba abasambi basambilila mwi Isukulu lya Gileadi? Ba Hendra Gunawan baeluda ba ku Southeast Asia, baba mu cilonganino umwaba abaupana bamo abapwishishe Isukulu lya Gileadi. Batile: “Mu cilonganino cesu tamwali ba bapainiya ba nshita yonse. Nomba ukutula fye apo aba baupana baishile ukufuma ku sukulu, balabombesha kabili balaipelesha sana. Ici calengele aba bwananyina na bambi batendeke bupainiya bwa nshita yonse. Tapakokwele, nkashi umo uwatendeke bupainiya bwa nshita yonse balimwitile na kwi Isukulu lya Bakabila ba Bufumu!”

 Ba Sergio Panjaitan ababombela pa Bethel pamo na ba bwananyina abapwishishe Isukulu lya Gileadi ku Southeast Asia batile: “Ifyo aba bamunyinefwe basambilile muli ili isukulu tafibafwa fye beka epela, lelo na ifwe tulanonkelamo. Ala balasambilila ifingi sana! Na lyo line, tabaimona ukuti balicila bambi, lelo balebako bambi ifyo basambilile mwi Isukulu lya Gileadi. Ifi bacita filatukoselesha sana kabili na ifwe tulakoseleshako aba bwananyina bambi.”

 Bushe ni kwi kufuma indalama icilonganino cibomfya kuli ili isukulu? Shifuma ku misangulo ya mwi sonde lyonse iyisangulwa ukubomfya inshila ishalekanalekana ishaba pa donate.pr418.com. Tulatasha sana pa fyo muipeelesha ukutungilila ili isukulu pamo na basambi abafuma mwi sonde lyonse.