Ukulongana kwa Citungu ukwa mu 2020 kulongana uko tushakalabe. E kulongana twabalilepo ukubomfya Intaneti mwi sonde lyonse! Na lyo line bamunyinefwe na bankashi ku Malawi na ku Mozambique bena tabalongene ukubomfya Intaneti. Bushe bacitile shani pa kuti balongane?

 Komiti ya Bakampanya na Komiti ya Kusambilisha aye Ibumba Litungulula yalisuminishe ukuti bamunyinefwe ku Malawi na ku Mozambique bakatambe no kukutika ukulongana pa TV na pa filimba. Mulandu nshi ifi bacitile fyawamine? Icalo ca Malawi caba pa fyalo umo Intaneti yakosa sana umutengo, kanshi banono sana Inte sha kwa Yehova abengakumanisha ukubomfya Intaneti. Ba William Chumbi ababa muli Komiti ya Musambo ku Malawi batile: “Twalingile fye ukubomfya ama TV ne filimba pa kuti aba bwananyina bapokelele ifya kulya fya ku mupashi.” Ba Luka Sibeko aba muli Komiti ya Musambo ku Malawi nabo batile: “Nga takwali ukubabikile ukulongana kwa citungu pa TV na pa cilimba nga banono sana bamunyinefwe abalongene icitungu mu Malawi ukubomfya Intaneti.” Na ku Mozambique nako ba bwananyina fye abanono abengakumanisha ukukwata amafoni, amatabuleti na makompyuta ayengabomba ukutambilapo ukulongana.

 Pa mulandu ne cikuko ca COVID-19, ku milabasa imo balabikako ukulongana kwa pa cilonganino. a Bamunyinefwe balile ku milabasa no kulanshanya nabo ukuti babalundileko inshita pa kuti bakatambisheko no kulongana kwa citungu.

 Bamunyinefwe mu Malawi balikwete ubwafya. Ilingi line aba ku milabasa basuminisha fye amaprogramu ayengapwa mwi awala limo, pantu balasakamana ukuti programu nga yalepa sana abantu kuti balaumfwa icitendwe kanshi te kuti baitemenwe. Lelo bamunyinefwe balilondolwele ukuti umulimo wesu wakwafwa bantu bonse. Na mu nshita ya cikuko ca Korona ilyo abantu balebeba ukwikala pa mayanda, tulefwaya ukubebako imbila nsuma iya mu Baibolo iingabasansamusha no kulenga baba abekala calo abasuma, kabili iingalenga baba ne nsansa mu lupwa. Ilyo aba ku milabasa baumfwile ifyo bamunyinefwe balondolwele, balisumine ukubalundilako inshita ya kubikako ukulongana kwa citungu pa mulabasa.

 Mu Malawi ukulongana kwa citungu bakubikile ku mulabasa umo uwa pa T.V na ku mulabasa umo uwa pa cilimba, abantu abengi nga nshi balakutika kuli iyi milabasa kabili nabekala mu ncende ishabela umutali mu Malawi balakutika kuli iyi milabasa. Mu Mozambique ukulongana kwa citungu kwali pa mulabasa umo uwa pa TV na pa milabasa ya pa filimba 85.

 Mu fyalo fyonse fibili e kutila mu Malawi na mu Mozambique babomfeshe indalama ukufika kuli K479,859 (nelyo $28,227) pa kuti batambishe ukulongana pa TV. Kabili indalama mupepi na K340,000 (nelyo $20,000) pa kuti babike ukulongana pa filimba. Imitengo ku milabasa ya pa filimba yalepusanapusana, nga ca kuti umulabasa ufika fye mu ncende shimo balelipilisha K225 (nelyo $15) lelo nga ca kuti umulabasa ulafika mu ncende shonse balelipilisha ukufika kuli K13,209 (nelyo $2,777).

 Bamunyinefwe balibombeshe pa kuti babomfye bwino imisangulo. Ku ca kumwenako, ku Malawi bamunyinefwe balilanshenye naba ku milabasa ukuti bababwesesheko umutengo kabili aba ku milabasa balisumine. Indalama batubwesesheko shalifikile pali K29,984 (nelyo $1,711). Ku Mozambique imilabasa imo baletufumishako indalama pa mulandu wa kuti tuli ba cishinka kabili tulalipila mu nshita.

 Bamunyinefwe na bankashi balitashishe sana pa kutamba no kukutika ku kulongana kwa citungu. Ba Patrick baeluda aba ku Malawi batile: “Tuletasha sana bamunyinefwe ne Bumba Litungulula pa kutulangulukilako muli iyi inshila, muli ino nshita ya cikuko.” Ba Isaac aba ku Malawi nabo batile: “Tatwakwata foni nelyo tabuleti ayaya pa Intaneti ayo twingabomfya pa kutamba nelyo ukukutika ukulongana pa Intaneti, kanshi twalitemenwe sana pali ifi batupekanishishe ukukutika ukulongana kwa citungu pa filimba. Ici calengele ine no lupwa lwandi lonse tunonkelemo mu kulongana, twalimwene ukuti cine cine Yehova alitutemwa.”

 Kasabankanya umo ku Mozambique abalilepo ukulongana kwa citungu ukwa mu 2020. Atile “Ifi twatambile ukulongana kwa citungu pa TV calengele namona ukuti Yehova ni Lesa wa maka yonse. Icikuko ca COVID-19, tacalengele Yehova afilwa ukutupeela ifya kulya fya ku mupashi kabili fyaishile fye mu ng’anda yandi. Nalimwene ifyo abantu ba kwa Yehova batemwana, kabili ninshininkisha ukuti uku e kupepa kwa cine.”

 Ba Wyson baeluda batile: “Ndefwaya ukutasha sana pa fyo umusha wa cishinka aletusakamana mu nshita ya cikuko. Ifi balebika ukulongana kwa citungu pa TV na pa filimba nacilenga na ifwe fwe bashakwata indalama kabili fwe bekala mu calo icipiina tulenonkelamo mu kulongana kwa citungu.”

 Komiti ya Bakampanya na Komiti ya Kusambilisha nabasuminisha ukuti no kulongana kwa citungu ukwa mu 2021 kukabe pa TV na pa filimba mu ncende shimo shimo. Bushe indalama tulipila pa kuti ukulongana kube pa TV na pa filimba shifuma kwisa? Shifuma ku musangulo abantu basangula uwa kwafwilisha umulimo wa mwi sonde lyonse ukubomfya inshila ishalekanalekana isha kusangwilamo ukubomfya donate.pr418.com. Tulemutasha sana pa misangulo musangula.