Mu March 2020, ilyo akabungwe ka World Health Organization kalandile ukuti kuli icikuko ca COVID-19, abengi tabatontonkenyepo ukuti nalimo icikuko kuti casalangana isonde lyonse, kabili tabale-enekela no kutila kuti cakokola ukucila na pa mwaka umo. Ici cikuko calilenga abantu abengi nga nshi ukusanshako fye ne Nte sha kwa Yehova ukulwala, ukusakamikwa, e lyo no kukanakwata indalama. Finshi icilonganino ca kwa Yehova cicita pa kwafwa abalekabila ubwafwilisho mu nshita ya cikuko?

 Komiti ya Bakampanya iye Bumba Litungulula ilya Nte sha kwa Yehova, yalibikako Amakomiti ya Kwafwilisha Abaponenwe na Masanso Ayakalamba (DRC) ukucila pali 950 mwi sonde lyonse muli iyi inshita ya cikuko. Inshita shimo balapekanya ukuti bamunyinefwe abekala kuli iyo ncende ukuli abalekabila ubwafwilisho ebo babombe uyu mulimo, e lyo inshita shimbi Inte sha kwa Yehova balabafwilishako ku buteko ilyo buleafwilisha abantu kuli iyo incende. Aba mu Makomiti ya Kwafwilisha Abaponenwe na Masanso Ayakalamba (DRC) nabo balapekanya ukwafwa aba bwananyina mwi sonde lyonse.

 Tontonkanyeni pa fyacitike mu calo ca Paraguay. Inyushipepala imo yatile, pa mulandu wa cikuko “abantu abengi ku Paraguay tabalekwata indalama sha kushitamo ifya kulya.” Nomba pali iyi inshita ninshi Komiti ya Kwafwilisha Abaponenwe na Masanso Ayakalamba mu Paraguay yalitendeka ukupeela aba bwananyina ifya kulya ifyo ulupwa umwaba abantu 4 ingalya pa milungu ibili, kabili balebapeela ne fya kubomfya pa kuisunga aba busaka ne fya kubomfya pa kuwamisha apo baleikala. Fyonse ifyo balebapeela baleshita mu ndalama nalimo K510, [nelyo $30 (U.S.)].

 Bushe abafwilisha abaponenwe na masanso baicingilila shani no kucingilila abantu bambi pa kuti tabambwile ubulwele bwa COVID-19 ilyo balebomba uyu mulimo? Balafwala utwa kufimba pa kanwa na pa mona nelyo maski e lyo no kutalukana ilyo bali na bantu. Na kabili balashininkisha ukuti utwampani baleshitako ifya kulya twa busaka kabili tulakonka amafunde yalanda pa busaka na pa kuicingilila. Balashininkisha ukuti bonse abaleikata kuli ifi ifya kulya na bafwala ifya kuicingilila, balewamya imyotoka shabo no kusansamo umuti uwipaya akashishi ka COVID 19, no kubika ifya kulya umo basanshile umuti wa kwipaya utushishi. Na kabili balashininkisha ukuti, abaleleta ifya kulya ne fintu fimbi baletalukana na bamunyinefwe abalepokelela.

 Ilyo calefika mu January 2021, Komiti ya Bakampanya yalisuminishe ukuti indalama ukucila pali K425,000,000, nelyo amadola ya ku America 25,000,000 shikabombe ku kwafwilisha aba bwananyinamu nshita ya cikuko ca COVID-19. Ama Bethel na Makomiti ya Kwafwilisha Abaponenwe na Masanso Ayakalamba yalabomfya bwino imisangulo, yalashininkisha ukuti yashita ifintu ifinakileko umutengo. Ku ca kumwenako, mu calo ca Chile bamunyinefwe abaleangalila umulimo wa kushita ifintu balefwaya ukushita ilanda amakilogramu 750. Nomba mu mweshi fye umo umutengo we landa walininine sana ukucila ifyo baleshita pa kubala! Ilyo papitile ama-awala yabili ukutula apo balanshanishishe na baleshitisha ukuti balashita ilanda pa mutengo uukalamba, abaleshitisha baebele bamunyinefwe ukuti umuntu umbi uwashitile ilanda nabwesha. Kanshi mu cifulo ca kuti bashitishe ilanda pa mutengo uukalamba nga fintu balanshenye, babashitishe pa mutengo uo baleshitisha mu myeshi yafumineko.

 Na lyo line, ilyo bamunyinefwe baile mukusenda ilanda abaleshitisha balefwaya ukukaana ukubapeela, pantu bababepeshe ukuti bali na kapaatulula pa kupeela ifya kulya, tabalecita ifyo utubungwe tumbi twalecita. Pa numa ya kupepa ipepo ilipi mu mutima, munyinefwe umo alondolwele abaleshitisha ukuti balifwailishe mu filonganino pa kuti beshibe indupwa abalekabila sana ubwafwilisho. Bamunyinefwe balondolwele no kuti, apo inkulilo sha ndupwa shali ishapusanapusana, balelonga ifya kulya ne fintu fimbi ukulingana ne fyo cila lupwa lulekabila. Na mu kulekeleshe balondolwele abaleshitisha ukuti, Inte sha kwa Yehova ababomba uyu mulimo tabafola kabili indalama baleshitamo ifya kulya misangulo ya kuitemenwa iyo abantu basangula. Uyu mwaume alitemenwe ilyo aumfwile ifyo bamunyinefwe balondolwele. Alisumine ukushitisha pa mutengo ulya wine basuminishenye kabili ilyo bamunyinefwe babwelele mu kushita ilanda na kabili alisangwilileko ilanda amakilogramu 400.

 Ba Lusu ni ba mukamfwila kabili bakalamba. Bekala ku Liberia, pa ng’anda bekalapo no mwana wabo umwanakashi, umupongoshi wabo umwaume, na beshikulu babo batatu, abalumendo babili no mukashana umo. Bushiku bumo ulucelo ilyo balelya ifya kulya fya kacelo ninshi balebebeta ne lembo lya bushiku, umwishikulu wa ba Lusu uuli ne myaka 7 alimwene ukuti ifya kulya na fipwa mu ng’anda. E ico aipwishe ukuti, “Nomba twakulalya finshi?” Ba Lusu bamwebele ukuti na bapepelapo kale kabili na bacetekela ukuti Yehova alabapeela ifyo balekabila. Bulya bwine bushiku akasuba, ba Lusu balipokelele foni ukufuma kuli baeluda ba mu cilonganino babamo kabili babebele ukuti baleya mukusenda ifya kulya. Ba Lusu balandile abati: “Umwishikulu wandi alandile ukuti nomba naishiba ukuti Yehova alakutika no kwasuka amapepo pantu alyaswike ipepo lyenu.”

 Abena mupalamano aba mwanakashi umo uwikala ku Congo, ulupwa lwa Nte sha kwa Yehova. Ilyo amwene balepokelela ifya kulya ukufuma kuli bamunyinabo atile: “Icikuko nga capwa, na ifwe tukaba Inte sha kwa Yehova pantu balesakamana bamunyinabo muli ino nshita ya cikuko iya-afya. Umwina mwakwe amwebele ati: “Ulefwaya ukaba Inte ya kwa Yehova pa mulandu fye we saka lya mupunga?” abebele ati: “Awe, ili isaka lya mupunga lilelangilila ukuti balitemwana icine cine.”

 Inte sha kwa Yehova balafwilisha bamunyinabo na bankashi abalekabila ubwafwilisho mu inshita ya cikuko pa mulandu ne misangulo musangula mu kuitemenwa. Tulemutasha icine cine pa misangulo musangula ukubomfya inshila ishaba pa donate.pr418.com.