Muli shino nshiku sha kulekelesha tule-enekela ‘ukulaumfwa pa lwa nkondo mupepi no kutali.’ (Mateo 24:6) Na lyo line ilyo aba bwananyina bali na mafya pa mulandu wa nkondo, kulaba ukubafwilisha. Lipoti ya Butatu iye Bumba Litungulula iya mu 2022 yalilandile pa fyo aba bwananyina ku fyalo fya ku kabanga ka Bulaya balebafwilisha bamunyinefwe abalecula pa mulandu ne nkondo iili ku Ukraine. Bushe aba bwananyina baleafwilisha shani bamunyinefwe ili kuli nkondo? Bushe aba aba bwananyina baleumfwa shani ifi balebafwilisha?

 Ilyo inkondo yatendeke ku Ukraine pa 24 February, 2022, Komiti ya Bakampanya yalisuminishe ukuti bafumye indalama sha kwafwilisha aba bwananyina ku Ukraine. Mu kwangufyanya Umusambo wa ku Ukraine walitendeke ukushita ifya kulya ne fintu fimbi no kufituma ku ncende uko fyalekabilwa, kabili yalisontele Amakomiti ya Kwafwilisha Abaponenwe na Masanso Ayakalamba ayali 27 ayalebomba umulimo wa kutwala ifintu baleshita.

 Na kabili pa kutungilila uyu umulimo aba ku Amaofeshi Yakalamba aya Nte sha kwa Yehova mu kwangufyanya balitendeke ukutontonkanya pa fyo bengacita pa kwafwa aba bwananyina. Komiti ya Bakampanya na Komiti ya Kusabankanya aye Bumba Litungulula yaebele Dipartimenti Ishita Ifintu Mwi Sonde Lyonse ukubombela pamo na bamunyinefwe abaleimininako Bethel ya ku Ukraine na Poland kabili balilanshenye ifyo bali no kucita pa kwafwa aba bwananyina. Bamunyinefwe ukufuma ku Dipartimenti Iishita Ifintu, abatuma ifintu, Dipartimenti Ilolekesha pa Milandu iya pa Bethel imo na imo, e lyo na bamunyinefwe ababa mu Komiti ya Musambo mu Ukraine, na baba mu Dipartimenti Ishita Ifintu Mwi Sonde Lyonse balekumana cila bushiku pa kuti balanshanye ifyo bali no kwafwa aba bwananyina.

 Ba Jay Swinney aba muli Dipartimenti Iishita Ifintu Mwi Sonde Lyonse batile, “Ica kubalilapo ico twacitile, kwishiba ifyalekabilwa. Twalefwaya ukulapeela aba bwananyina ifya kulya ifyo babelesha ne fya kubomfya ku busaka ifyo babelesha. Na lyo line, ukwishiba ifyo aba bwananyina balekabila bwali bwafya bumo pa mafya twakwete. Twalingile no kusanga inshila iisuma iishali na kubika aba bwananyina mu busanso kabili iyali no kulenga ifyo twashitile fyafika bwangu mu Ukraine mu nshita ya nkondo.”

 Ilyo calefika pa 9 March 2022, bamunyinefwe balishibe ifyo aba bwananyina mu Ukraine balekabila. Twalitumine ifibokoshi fya fya kulya pamo nga inama ya mu fikopo ne sabi, ingano, umupunga na cilemba, pamo ne fya kubomfya ku busaka pamo nga sopo na mapepala ya kubomfya ku cimbusu. Pali iyi nshita, balebomfya indalama amadola ya ku America $65 (K1,118) pa kushita ifyo umuntu umo engabomfya pa milungu 4. Pa mulandu wa kuti aba bwananyina abengi balekabila ubwafwilisho, Komiti ya Bakampanya yalisuminishe ukuti babomfye indalama ishingi pa kuti bashita ifyo bamunyinefwe ne nkashi balekabila. Nomba bushe bamunyinefwe bali no kutwala shani ifintu ku ba bwananyina ukwabula ukubika ubumi bwabo mu busanso?

 Pa 13 March, bamunyinefwe babili ukufuma ku Poland balyeseshe ukutwala ifya kulya ukufifumya ku Bethel ya ku Poland no kufitwala mu cikuulwa basungila ifya kulya mupepi no musumba wa Lviv, mu Ukraine. Ilyo aba bamunyinefwe bashilaya, aba ku Bethel ya ku Poland na Ukraine balyafwile aba bamunyinefwe babili abaipeeleshe ukupekanya ubulendo. Iofeshi lya musambo lyalipekenye amapepala yonse ayalefwaikwa pa kuti bamunyinefwe bakapite bwino pa mupaka. Balishininkishe ukuti pa myotoka sha bamunyinefwe nabalembapo ifishibilo fya kulangilila ukuti baletwala ifya kwafwa abantu. Kabili balibombele pamo na bamunyinefwe mu Ukraine pa kuti beshibe inshila iisuma kabili iipi iyo bengabomfya nga bapita pa mupaka. Apo balipekenye bwino kabili na Yehova alibafwile, balifishishe ifyo batwele ku Makomiti ya Kwafwilisha Abaponenwe na Masanso Ayakalamba mu ma-awala 24 ukutula apo bafifishishe mu musumba wa Lviv, kabili bamunyinefwe balibwelelemo ku Poland mu mutende.

 Nangu ca kuti uyu muku wa kubalilapo batwelepo ifya kukumbusuka aba babwananyina balyendele fye bwino, ifyo basendele tafyafikile na makilogramu 907. Ifyalekabilwa fyali amakilogramu 199,581! Bushe bali no kutwala shani mu kwangufyanya ifintu fyafula ifi?

 Pa numa ya kubelenga pa jw.org amafya aba bwananyina balekwata pa mulandu ne fyalecitika ku Ukraine, aba bwananyina mwi sonde lyonse balefwaya ukwafwa bamunyinefwe na bankashi. Abengi abekala ukutali balesangwilako indalama ku mulimo wa mwi sonde lyonse pantu balishibe ukuti ishi indalama shikabomba bwino. Bambi abekala mu mipaka ya fyalo ifyaba mupepi na Ukraine, balebomfya inshita, amaka, e lyo ne fyo bakwata ku kwafwa aba bwananyina. Moneni ifya kumwenako fyakonkapo.

 Mu Poland, bakabomba ba kuitemenwa balitumine ifintu ifingi nga nshi, kabili abana abanono balilembele amakardi ayo baipangiile abene. Ba Bartosz Kościelniak ababombela ku Dipartimenti Ishita Ifintu pa Bethel ya mu Poland batile: “Pa miku iingi nalibelenga ilembo lya Amalumbo 110:3 apatila, ‘Abantu ba kwa Yehova bakaipeela abene mu kuitemenwa.’ Nomba ukumona ifyo aba bwananyina abengi baleipeelesha no kuitemenwa ukubomba imilimo, nacilenga naumfwikisha ukuti aya amashiwi ya cine.”

 Munyinefwe umo Inte ya kwa Yehova uwakwata kampani iisenda ifipe ukufitwala ku fyalo fimbi, alibulile imyotoka shakwe ishikalamba abikamo na mafuta ukuti bashibomfye pa kutwala ifintu. Uyu munyinefwe atile: “Ndemona ukuti iyi e nshita fye ningalanga ifyo natemwa aba bwananyina na Yehova. Ningufwa bwino ifi nayafwilisheko.” Munyinefwe asangwile amafuta ukucila pa malita 7,700, kabili bamunyinefwe balibomfeshe inshita yabo na maka ukwenda amakilomita nalimo 48,000 pa kuti bapwishe ukutwala ifintu umo fyalekabilwa.

 Pa mulandu ne fyo bamunyinefwe ne nkashi baipeeleshe ne fyo balangile ukutemwa, ilyo 28 March yalefika ninshi nabatwala amakilogramu 99,790 aya fya kulya, ifya kubomfya ku busaka, e lyo ne miti mu Ukraine, ilyo ninshi papita fye inshiku 15 ukutula apo batwalile ifya kulya ne fintu fimbi pa muku wa kubalilapo! Kabili pa mulandu ne fintu fimbi ifyo aba bwananyina basangwilileko mu kuitemenwa, calengele indalama shalingile ukubomba ku kushitamo fyonse ifi shicepeko. Ukufika pano, Inte sha kwa Yehova na batwala ifya kwafwilisha aba bwananyina mu Ukraine ifingafina ukucila pali pa makilogramu 172,365. Bushe ifi fintu fyafwile shani aba bwananyina ku Ukraine?

 Ilyo ifyo aba bwananyina balongele fyafikile mu musumba wa Lviv, Amakomiti ya Kwafwilisha Abaponenwe na Masanso Ayakalamba yalifitwele kuli bonse abalekabila ubwafwilisho mu Ukraine monse. Ifyo balongele balifitumine mu fitungu ifyapusanapusana, kabili ku fitungu fimo kwalelepa amakilomita ukucila pali 1,300 ukufuma mu musumba wa Lviv. Nangu ca kuti uyu mulimo walibombelwe bwino, palipitile inshita pa kuti bapwe uku-ubomba. a

 Ba Markus Reinhardt ababa muli Komiti ya Musambo mu Ukraine batile: “Muli iyi inshita iyayafya aba bwananyina na bamona ifyo Yehova abatemwa no busuma bwaba mu kukonka ifyo icilonganino cakwe ciletweba na lintu kushilacitika ubusanso. Ku ca kumwenako, bonse batukoselesha ukulasungako ifya kulya ifingapwisha imilungu mu mayanda yesu. Ba Anton baeluda mu musumba wa Kyiv balilandile pa co cacindamina ukukonka ifyo batweba, batile, ‘Icilonganino ca kwa Yehova cilatupekanishisha libela ku fyabipa ifingacitika kabili tulatasha sana pali ifi cicita. Ukukwata ifya kulya na menshi e lyo ne cilimba kwalitupususha.’ Tuletasha sana aba bwananyina pantu balikonkele ifyo icilonganino ca kwa Lesa cilanda ukuti tulesungako ifya kulya na menshi, pantu calilengele iofeshi lya musambo lyakwatako inshita ya kupekanya ifyo aba bwananyina balekabila.”

 Bushe aba bwananyina baumfwile shani ilyo bapokelele ifyo balekabila? Ba Mykola na ba Zinaida abekala mu Kharkiv balandile ukuti: “Tuletasha sana pa fyo mwatubikako amano. Twatasha sana pa fya kulya no muti mwatupeele. Ukwabula no kutwishika natumona ifyo Yehova atusakamana.” Ba Valentyna abekala mu Kharkiv nabo batile: “Ukutula fye apo inkondo yatendekele, ukwa kushita ifintu kwaleba sana imilaini iitali. Inshita shimo caleafya ukushita ifyo tulekabila. Nomba Yehova alishibe kabili alemona amafya twalekwata. Alitumine bamunyinefwe ukutupeela ifyo twalekabila, kabili batulongele filya fine fye twalekabila sana! Muli ishi inshita ishayafya ilyo ifintu filemoneka kwati takuli no wakutwafwa, e lyo tulemona ifyo Yehova ne cilonganino cakwe batusakamana mu nshila yaibela. . . Tuletemwa sana ukumona ifyo Yehova aletwafwa ilyo tulekabila sana ubwafwilisho.”

 Ba Yevhen, ba Iryna, na ba Mykyta abafulumwike ukufuma mu musumba wa Mariupol batile: “Tuletasha sana pa fyo mutusakamene no lupwa lwesu. Ukumweba fye icishinka mwalitwafwile pa nshita yalinga. Pa kubala, twalemona kwati mu fibokoshi mwali fye ifintu twalekabila epela, nomba ilyo twaiswile twalimwene ukuti mwali no kutemwa kwenu!”

 Ukwabula no kutwishika kuti mwamona ifyo Yehova abomfeshe umupashi wa mushilo ukutungulula abantu bakwe pa kuti batwale ifyo aba bwananyina balekabila ilo kuli “nkondo mupepi no kutali.” Indalama musangula ku mulimo wa mwi sonde lyonse, isho musangula ukubomfya donate.pr418.com, shalibombele umulimo uwacindama nga nshi. Tulatasha sana pali bukapekape bwenu!

Ukwafwa Abaponenwe na Masanso Ukwabula Ukupoosa Inshita Kabili mu Inshila Iisuma I-ishabikile Aba Bwananyina mu Busanso

1. Pa 24 February 2022: Komiti ya Bakampanya yalisuminishe ukubomfya indalama ku kwafwa aba bwananyina mu Ukraine, ici calengele iofeshi lya musambo litendeke umulimo wa kwafwa abaponenwe na masanso

2. Pa 24 February–8 March 2022: Iofeshi lya musambo mu Ukraine lyalishitileko ifintu fimo kabili babomfeshe Amakomiti ya Kwafwilisha Abaponenwe na Masanso Ayakalamba pa kupeela aba bwananyina ifi fintu. Na kabili, iofeshi lya musambo lyalitendeke ukuipekanya ukupokelela ifintu ukufuma ku Poland no kupeela aba bwananyina

3. Pa 9 March 2022: Komiti ya Bakampanya yalisuminishe ukuti batwale ifya kwafwilisha aba bwananyina mu Ukraine

4. Pa March 10–12, 2022: Balipekenye ukuti besheko ukutwala ifya kulya ne fintu fimbi ukufifumya ku Poland ukufitwala ku musumba wa Lviv, mu Ukraine

5. Pa 13 March 2022: Balitwele ifya kulya ne fintu fimbi ukufuma ku Poland ukufitwala ku Lviv, mu Ukraine

6. Pa 14–16 March, 2022: Aba bwananyina ababomba umulimo wa makuule uwa kuitemenwa balilongene pa Icikuulwa ca Kulonganinamo Ukulongana Kukalamba mupepi na Poznan mu Poland pa kuti balonganye ifya kulya ne fyakubomfya pamo nga sopo

7. Pa 17 March 2022: Pa numa ya nshiku 4 ukutula apo batwalile ifya kulya ne fintu fimbi pa muku wa kubalilapo, balitendeke ukutwala na fimbi ifya finine amakilogramu 12,700 ku mupaka wa Ukraine

8. Pa 21–27 March 2022: Ifyashelepo bafilongele mu Poland e lyo bafituma ku Ukraine, kabili balifitumine uko fyalekabila ukuya mu ma-awala fye 24

9. Pa 28 March 2022: Mu nshiku fye 20 ukutula apo basuminishishe ukubomfya indalama ku kwafwilisha aba bwananyina ku Ukraine, balitumine ifya kulya ne fya kubomfya ku busaka ne miti ifya finine amakilogramu 99,790

 Ukufika pali ino nshita, Inte sha kwa Yehova na batuma ifintu ifya kwafwilisha aba bwananyina ku Ukraine ukucila pa makilogramu 172,365.