Abapingushi 5:1-31
5 Kabili bulya bwine bushiku Debora+ pamo na Baraki+ mwana Abinoamu+ baimbile ulwimbo,+ abati:
2 “Cindikeni Yehova,+Pa kuposolola umushishi mu Israele, pa mulandu wa mulapo wabo uwa bulwi,Pa mulandu wa kuitemenwa kwa bantu abene.+
3 Umfweni, mwe shamfumu;+ kutikeni, mwe balashi:Ukwimba, nkembila Yehova.Nkembila Yehova amalumbo,+ Lesa wa kwa Israele.+
4 Mwe Yehova, ilyo mwafumine mu Seiri,+Ilyo mwafumine mu mpanga ya kwa Edomu,+Isonde lyalitentele,+ e lyo imyulu yaloseshe imfula iikalamba,+Amakumbi na yo yaponeshe amenshi ayengi.
5 Impili shalikonkolweke ukufuma ku cinso ca kwa Yehova,+Uyu Sinai+ afumine ku cinso ca kwa Yehova,+ Lesa wa kwa Israele.+
6 Mu nshiku sha kwa Shamigari+ mwana Anati,Mu nshiku sha kwa Yaele,+ mu nshila tamwalepita bantu,Kabili abalendo abalepita mu misebo baile mu nshila ishashokoloka.+
7 Abekashi ba mu mishi ya ca nsale* balipwile, balipwile mu Israele,+Nasuka ine, ne Debora,+ naima,Nasuka naima ne nyina mu Israele.+
8 Basalile balesa abapya.+Lilya e lyo kwali inkondo mu mpongolo.+Inkwela tayamoneke nakalya, nangu lifumo,Pa ba makana amakumi yane (40,000) mu Israele.+
9 Umutima wandi uli na bakalamba ba bashilika aba mu Israele,+Abaitemenwe abene pa bantu.+Cindikeni Yehova.+
10 Mwe bendela pa mpunda ishikota ishakashikila,+Mwe bekala pa nsalu shacindama,Na mwe benda mu musebo,Tontonkanyenipo!+
11 Amashiwi ya basalanganya amenshi yaumfwika pa ncende sha kutapapo amenshi,+Palya balashimika imilimo yalungama iya kwa Yehova,+Ifya bulungami fya bekashi bakwe mu mishi ya ca nsale mu Israele.Lilya e lyo abantu ba kwa Yehova baile ku mpongolo.
12 Buuka, buuka, iwe we Debora;+Shibuka, shibuka, imba ulwimbo!+Ima, iwe we Baraki,+ no kutungulula bankole bobe, iwe we mwana wa kwa Abinoamu!+
13 E lyo abapuswike baile ku bakankaala;Abantu ba kwa Yehova baishile kuli ine ku kulwisha aba maka.
14 Abali mu mpanga iyabatama bafumine muli Efraimu,+Bali pamo na iwe, we Benjamini, pamo na bantu bobe.Ukufuma mu Makiri+ abakalamba ba bashilika baliile,Kabili ukufuma ku Sebuluni abasenda ifipe fya kwa kalemba na bo baliile.+
15 Kabili bacilolo muli Isakari+ bali na Debora,Kabili ifyali Isakari, e fyali na Baraki.+Mu mpanga iyabatama e mo atuminwe pa makasa.+Mu mpanga ya kwa Rubene mwali ukufwayafwaya sana mu mutima.+
16 Cinshi waikalile pa kati ka mifuko ya fya kwikalapo fibili ifya pa mpunda,Ku kukutika ku mitolilo balishisha imikuni?+Ku mpanga ya kwa Rubene kwali ukufwayafwaya sana mu mutima.+
17 Gileadi aikele mu ncende yakwe kwi shilya lya Yordani;+Kabili cinshi Dani aikalile mu mato ayakalamba?+Ashere ena aikele fye mu lulamba lwa bemba,Kabili ku fyabu fyakwe e ko aleikala.+
18 Sebuluni bantu abashaletiina ukufwa;+Cimo cine na Naftali+ uwa mu calo ca mpili.+
19 Imfumu shalishile, shalilwile;Lilya e lyo imfumu sha ku Kanaani shalwile+Mu Taanaki+ mu lulamba lwa menshi ya mu Megido.+Tabanonkele silfere nakalya.+
20 Ukufuma ku muulu intanda shalilwile,+Ukufuma umo shipita shalwishishe Sisera.
21 Umumana wa Kishone walibasendele,+Umumana wa kale, umumana wa Kishone.+Iwe wanyantawile aba maka,+ we mweo wandi.
22 E lyo amabondo ya bakabalwe yanyantaula umushili+Pa mulandu wa kutolauka kwa bakabalwe bakwe.
23 ‘Tiipeni+ Merose,’ e fyasosele malaika wa kwa Yehova,+‘Tiipeni pe abekashi bakwe,Pantu tabayafwile Yehova,Ukwafwilisha Yehova pamo na ba maka.’
24 Yaele+ muka Heberi umwina Keni+ akapaalwa nga nshi pa banakashi,Pa banakashi abekala mu matenti akaba uwapaalwa nga nshi.+
25 Alombele amenshi, na o amupeela umukaka;Mu mbale yafonka iikalamba iya bakankaala e mo amupeelele umukaka watikama.+
26 E lyo atambike ukuboko kwakwe no kubuula ulupoopo lwe tenti,Atambike no kuboko kwakwe ukwa ku kulyo no kubuula sando ya babomfi ababombesha.+Awe apampamine Sisera, no kumupusha mu mutwe,+Kabili atobele no kulepula insensematwi shakwe.
27 Aponene pa kati ka makasa ya kwa Yaele, e po awilile, alambalala na pa nshi;Pa kati ka makasa yakwe e po aponene, e po awilile;Apo aponene, e po bamucimfiishe.+
28 Umwanakashi alelengela pe windo kabili alemulolela,Nyina wa kwa Sisera alengeele mu tupunda twa pa capikulwa pe windo,+ aleti,‘Cinshi iceleta lyakwe ilya nkondo lyakokwela ukwisa?+Cinshi inshindo sha bakabalwe ba maceleta yakwe shacelelwa ifi?’+
29 Aba mano pa banakashi bakwe abacindama+ balemwasuka,Umwine na o aleisosha ati,
30 ‘Bushe tabafwile ukusanga, bushe tabafwile ukwakanya ifipe fya kupokolola,+Umwanakashi umo—abanakashi babili ku mwaume onse uwa maka,+Ifipe fya kupokolola ifisuma ifya kwa Sisera,Ica kufwala ico bayemfya, ico bawamya, ifya kufwala ifyo bayemfya fibiliIfya mu mikoshi ya baume bapokolola ifipe?’
31 E fyo abalwani benu bonse balobe,+ mwe Yehova,Kabili abamutemwa+ babe nga filya akasuba kabalika mu maka ya kako.”+Awe icalo cali tondolo imyaka amakumi yane (40).+
Amafutunoti
^ Imishi ya “ca nsale” e mishi iishacingililwako ne linga.
