Amose 2:1-16
2 “Yehova atila, ‘“Pa mulandu wa kupondoka kutatu ukwa kwa Moabu,+ na pa mulandu wa kupondoka kune, nshakaalule ubupingushi bwandi nakalya, pa mulandu wa koca amafupa ya mfumu ya kwa Edomu ukuti yabe impemba.+
2 Kabili nkatuma umulilo muli Moabu, na o ukoca amayanda ya pa malinga aya mu Keriyote;+ na Moabu akafwa ne congo, ne penga lya kusoka, no kulila kwa ntandala.+
3 Kabili nkalofya kapingula mu kati kakwe, na bacilolo bakwe bonse nkabepaila pamo nankwe,”+ e fyo Yehova asosa.’
4 “Yehova atila, ‘Pa mulandu wa kupondoka kutatu ukwa kwa Yuda,+ na pa mulandu wa kupondoka kune, nshakaalule ubupingushi bwandi nakalya, pa mulandu wa kukaana amafunde ya kwa Yehova,+ na pa mulandu wa kuti tabakonkele ifipope fyakwe; lelo ubufi+ bwabo, ubo ifikolwe fyabo fyaendelemo, e bwalebalenga ukululumba.+
5 Kabili nkatuma umulilo muli Yuda, na o ukoca amayanda ya pa malinga aya mu Yerusalemu.’+
6 “Yehova atila, ‘Pa mulandu wa kupondoka kutatu ukwa kwa Israele,+ na pa mulandu wa kupondoka kune, nshakaalule ubupingushi bwandi nakalya, na pa mulandu wa kushitisha uwalungama mu ndalama sha silfere, no mupiina pa mutengo wa ndyato.+
7 Balefwaisha ulukungu lwa pano isonde ukuba pa mitwe ya bapiina;+ kabili baletamfya abafuuka mu nshila;+ umwaume na wishi baya ku mukashana+ umo wine, ku kukowesha ishina lyandi ilya mushilo.+
8 Na pa fya kufwala ifyo bapoka nge ciikatilo e po balambalala+ mupepi ne ciipailo+ conse; no mwangashi wa bantu abo balipilisha e o banwa pa ng’anda ya balesa babo.’+
9 “‘Lelo ine, nalofeshe umwina Amore+ pa mulandu wabo, uwalepele nge miti ya mikedari, kabili uwa maka nge miti iikalamba;+ nalofeshe ne fisabo fyakwe ku muulu ne mishila yakwe kwi samba.+
10 Na ine naninike imwe ukufuma mu calo ca Egupti,+ kabili namulengele ukwenda mu matololo pa myaka amakumi yane (40),+ pa kuti mupoke icalo ca mwina Amore.+
11 Kabili nalemwimisha abana benu bamo ukuba bakasesema+ na balumendo benu bamo ukuba abaNasiri.+ Bushe te fyo cali, mwe bana ba kwa Israele?’ e fyasosa Yehova.
12 “‘Lelo mwalenwesha abaNasiri umwangashi,+ kabili mwaebele bakasesema, amuti: “Mwilasesema.”+
13 Moneni ine ndelenga ifyaba pe samba lyenu ukusunkana, filya iceleta ilyaisulamo imyanshi ya ngano iyo baputula nomba line lisunkana.
14 Kabili takwakabe ukwa kufulumukila umuntu uubutukisha,+ no wakosa takakoshe amaka yakwe, ne mpalume tayakapusushe umweo wa iko.+
15 Uwikata ubuta na o takeminine, no wayanguka amakasa takafulumuke, no unina pali kabalwe takapusushe umweo wakwe.+
16 No washipa umutima pa baume ba maka, akafulumuka ubwamba mu bushiku bulya,’+ e fyasosa Yehova.”
