Amose 4:1-13
4 “Umfweni amashiwi aya, mwe ng’ombe nkota isha ku Bashani,+ mwe baba pa lupili lwa Samaria,+ mwe bebila abapiina,+ mwe bacusha abapiina, mwe basosa kuli bashikulu babo amuti, ‘Leteni tunwe!’
2 Shikulu Mulopwe Yehova nalapa bumushilo+ bwakwe, ati, ‘“Moneni! Inshiku shileisa pali imwe, kabili akamwimisha ku fya kulobelako na bashalako kuli imwe ku ndobo.+
3 Kabili apapongolwa e po mukapita,+ umuntu onse ukuya ku ntanshi; kabili mukapooswa ku Harmone,” e fyo Yehova asosa.’
4 “‘Iseni ku Betele no kucita ifyabipa.+ Mu Gilgali akuciteni ifyabipa lyonse,+ leteni na malambo yenu ulucelo; pa bushiku bwalenga shitatu, leteni ifya pe kumi.+
5 Kabili umukate uwatutumuka e o mutuule ukuba ilambo lya kutootela ukuti lifutumuke,+ kabili bilisheni ku bantu pa mutuulo+ wa kuitemenwa; bilisheni ku bantu, pantu e fyo mwatemwa, mwe bana ba kwa Israele,’+ e fyo Shikulu Mulopwe Yehova asosa.
6 “‘Na ine, namupeele ameno+ ayabuuta mu misumba yenu yonse kabili namulengele ukukanakwata ifya kulya mu ncende shenu shonse;+ lelo tamwabwelele kuli ine,’+ e fyo Yehova asosa.
7 “‘Na ine, nalimutanine imfula ilyo kwashele imyeshi itatu iya kulobolola;+ naloseshe ne mfula mu musumba umo, lelo mu musumba umbi nshaloseshemo imfula. Kwali impanga imo uko imfula yalokele, lelo impanga imbi nshaloseshemo imfula, yena yalyumine.+
8 Na ba mu misumba ibili napamo itatu baile baletalantanta ukuya ku musumba umbi ku kunwa amenshi,+ kabili icilaka tacapwile; lelo tamwabwelele kuli ine,’+ e fyasosa Yehova.
9 “‘Nalengele amabula yenu ukuba ayakonkotana kabili ayafufuma.+ Amabala yenu yalifulile pamo na mabala ya myangashi, lelo ifishimu fyaliliile+ imikunyu yenu ne miolife yenu; lelo tamwabwelele kuli ine,’+ e fyasosa Yehova.
10 “‘Nalimutumiine icikuko nga cilya cali ku Egupti.+ Ku lupanga e ko naipaile abalumendo benu,+ no kusenda bakabalwe+ benu muli bunkole. Nalengele no kununka kwa nkambi shenu ukwingila mu myona+ yenu; lelo tamwabwelele kuli ine,’+ e fyasosa Yehova.
11 “‘Nawishishe icalo cenu, nge fyo nawishishe Sodomu na Gomora.+ Kabili mwaishileba ngo lukuni ulwasompolwa mu mulilo;+ lelo tamwabwelele kuli ine,’+ e fyasosa Yehova.
12 “Awe e fyo nkacita kuli iwe, we Israele. Pa mulandu wa kuti nkacita ici cine kuli iwe, ipekanye ukukumanya Lesa+ obe, we Israele.
13 Pantu moneni! Uwapangile impili+ no Wapangile umwela,+ no Weba umuntunse ifyo amatontonkanyo yakwe yali,+ Uulenga amacaca ukuba imfifi,+ kabili uunyantaula ififulo fya kupepelapo ifya pano isonde,+ Yehova Lesa wa mabumba e shina lyakwe.”+
