Amose 7:1-17
7 E fyo Shikulu Mulopwe Yehova anangile, kabili, moneni! alelenga makanta uwingi pa kutendeka kwa kutanda kwa kulekelesha.+ Kabili, moneni! kwali ukutanda kwa kulekelesha pa numa ya kuputulwa kwa cani ca mfumu.
2 Nomba ilyo apwile ukulya ifimenwa fya mu mushili, natile: “Mwe Shikulu Mulopwe Yehova, shi babeleleni uluse.+ Nga kanshi nani akema muli Yakobo? Pantu alicepesha!”+
3 Na o Yehova alangulwike pali ici.+ “Tacakacitike iyo,” e fyo Yehova asosele.
4 E fyo Shikulu Mulopwe Yehova anangile, kabili, moneni! Shikulu Mulopwe Yehova aleita ifikansa ukubomfya umulilo;+ na o waile ulekamya amenshi ayengi no kulya impanga.
5 E lyo natile: “Mwe Shikulu Mulopwe Yehova, shi lekeni.+ Nga kanshi nani akema muli Yakobo? Pantu alicepesha!”+
6 Yehova alangulwike pali ici.+ “Ici na co tacakacitike iyo,” e fyo Shikulu Mulopwe Yehova asosele.
7 E fyo anangile, kabili, moneni! Yehova aali pa cibumba icapangilwe ne ntambo ya kupiminako,+ na mu minwe yakwe mwali intambo ya kupiminako.
8 E lyo Yehova atile kuli ine: “Cinshi ulemona, Amose?” Na ine natile: “Intambo ya kupiminako.” Na o Yehova atile: “Mona, ndebika intambo ya kupiminako mu kati ka bantu bandi abena Israele.+ Nshakabelele na kabili.+
9 Ne fifulo fya kupepelapo ifya kwa Isaki+ fikonaulwa, na mu ncende ya mushilo+ umwa kwa Israele mukonaulwa;+ kabili nkalwisha aba mu ng’anda ya kwa Yeroboamu ku lupanga.”+
10 Na Amasia shimapepo wa ku Betele+ atumine amashiwi kuli Yeroboamu+ imfumu ya kwa Israele ati: “Amose nakupangila mu kati na nkati ka ba mu ng’anda ya kwa Israele.+ Icalo nacifilwa ukushipikisha imilandile yakwe yonse.+
11 Pantu e fyo Amose atila, ‘Ku lupanga e ko Yeroboamu akafwila; kabili Israele akaya muli bunkole ukufuma mu calo cakwe.’”+
12 E lyo Amasia aebele Amose ati: “We umona ifimonwa,+ kabiye, butukila ku calo ca kwa Yuda, e ko uyelya ifya kulya, kabili e ko usesemene.
13 Lelo mu Betele mwena wisesemenamo+ na kabili, pantu ni ncende ya mushilo iya mfumu+ kabili e ng’anda ya bufumu.”
14 Na o Amose ayaswike Amasia ati: “Ine nshali kasesema, kabili nshali umwana wa kwa kasesema;+ lelo nali kacema+ kabili naletulaula mu fisabo fya mikunyu.
15 Kabili Yehova ambulile uko nalecema impaanga, kabili Yehova atile kuli ine, ‘Kabiye, kaseseme ku bantu bandi abena Israele.’+
16 E ico nomba umfwa icebo ca kwa Yehova, ‘Bushe uleti: “Wisesema pali Israele,+ kabili wisosa+ nangu cimo pa ba mu ng’anda ya kwa Isaki”?
17 E ico Yehova atila: “Umukashi obe akaba cilende mu musumba.+ Kabili abana bobe abaume na bana bobe abanakashi, bakafwila ku lupanga. Ne calo cobe bakacakanishisha ku ntambo ya kupiminako. Na iwe ukafwila+ mu calo icakowela; na Israele, akasendwa muli bunkole ukufuma mu calo cakwe.”’”+