Impendwa 3:1-51
3 Ifi e fyali ulupwa lwa kwa Aarone na Mose pa nshita Yehova alandile na Mose mu Lupili lwa Sinai.+
2 Kabili aya e mashina ya bana baume ba kwa Aarone: Nadabu e beli, na Abihu,+ Eleasari,+ na Itamari.+
3 Aya e mashina ya bana baume ba kwa Aarone, bashimapepo basubwa abapeelwe amaka ya kubomba bushimapepo.+
4 Lelo Nadabu na Abihu bafwiliile pa ntanshi ya kwa Yehova ilyo baletele kuli Yehova umulilo+ uo bashasuminishiwe, mu matololo ya Sinai; kabili tabakwete abana baume. Lelo Eleasari+ na Itamari+ balebomba bushimapepo pamo na shibo Aarone.
5 E lyo Yehova aebele Mose ati:
6 “Palamika umukowa wa kwa Lebi,+ no kubemika pa ntanshi ya kwa Aarone shimapepo, pa kuti balemubombela.+
7 Kabili bakalemubombela no kubombela ulukuta lonse pa ntanshi ya cikuulwa ca kukumaninako ilyo balebomba imilimo iya pa cikuulwa ca mushilo.
8 Kabili bakalesunga ifipe+ fyonse ifya pa cikuulwa ca kukumaninako, no kubombela abana ba kwa Israele ilyo balebomba imilimo ya pa cikuulwa ca mushilo.+
9 Kabili ukapeele abena Lebi kuli Aarone na ku bana bakwe abaume. Bena bantu bapeelwa, bapeelwa kuli ena ukufuma pa bana ba kwa Israele.+
10 Kabili ukabike Aarone na bana bakwe abaume pali bushimapepo, na bo bakalebomba bushimapepo bwabo;+ na umbi umbi uwapalamako akepaiwe.”+
11 Kabili Yehova akonkenyepo ukusosa kuli Mose ati:
12 “Lelo ine, mona! nabuula abena Lebi mu kati ka bana ba kwa Israele ukubapyanika pa mabeli+ yonse aya bana ba kwa Israele; kabili abena Lebi bakaba bandi.
13 Pantu ibeli lyonse lyandi.+ Ubushiku naipeye amabeli yonse mu calo ca Egupti+ naibuulile amabeli yonse aya mu Israele, e kutila amabeli ya bantu na ya nama.+ Yakulaba yandi. Nine Yehova.”
14 Kabili Yehova akonkenyepo ukusosa kuli Mose mu matololo ya Sinai,+ ati:
15 “Lemba abana baume ba kwa Lebi ukulingana na mayanda ya bashibo mu ndupwa shabo. Umwaume onse uuli no mweshi umo no kuya pa muulu umulembe.”+
16 Awe Mose atendeke ukubalemba ukulingana ne fyo Yehova amukonkomeshe, acitile filya fine fye bamwebele.
17 Kabili aba e bana baume ba kwa Lebi+ ukulingana na mashina yabo: Gershone na Kohati na Merari.+
18 Amashina ya bana baume ba kwa Gershone ukulingana ne ndupwa shabo ni aya: Libni na Shimei.+
19 E lyo abana baume ba kwa Kohati+ ukulingana ne ndupwa shabo ni Amramu na Isari,+ Hebrone na Usiele.
20 Na bana baume ba kwa Merari+ ukulingana ne ndupwa shabo ni Maali+ na Mushi.+
Ishi e ndupwa sha bena Lebi ukulingana na mayanda ya bashibo.
21 Muli Gershone mwafumine ulupwa lwa bena Libni+ no lupwa lwa bena Shimei.+ Ishi e ndupwa sha bena Gershone.
22 Abantu babo abalembelwe bali ukulingana ne mpendwa ya baume bonse aba mweshi umo no kuya pa muulu.+ Abantu babo abalembelwe bali amakana cinelubali ne myanda isano (7,500).+
23 Indupwa sha bena Gershone shali ku numa ya cikuulwa ca mushilo.+ Shapangile inkambi ku masamba.
24 Kabili Eliasafi mwana Laele e wali intungulushi ya lupwa lwa bena Gershone.
25 Kabili umulimo wa bana baume ba kwa Gershone+ mu cikuulwa ca kukumaninako, wakumine icikuulwa ca mushilo ne tenti,+ ne ca kufimbapo+ ca liko ne ca kucinga+ pa mwinshi wa cikuulwa ca kukumaninako,
26 ne nsalu sha kucingilako+ ulubansa ne ca kucinga+ pa mwinshi wa lubansa ulwashinguluka icikuulwa ca mushilo ne ciipailo, ne myando+ ya liko, e kutila conse icakumine umulimo wa ciko onse.
27 Kabili muli Kohati mwafumine ulupwa lwa bena Amramu no lupwa lwa bena Isari no lupwa lwa bena Hebrone no lupwa lwa bena Usiele. Ishi e ndupwa sha bena Kohati.+
28 Pa baume bonse abapendelwe ukutampila pa wali no mweshi umo no kuya pa muulu pali abantu amakana cinekonsekonse ne myanda mutanda (8,600), abalebomba umulimo mu ncende ya mushilo.+
29 Indupwa sha bana baume ba kwa Kohati shakuulile inkambi ku kapinda ka ku kulyo aka cikuulwa ca mushilo.+
30 Kabili Elisafani mwana Usiele e wali intungulushi ya ndupwa sha bena Kohati.+
31 Kabili umulimo+ wabo wakumine Icipao+ ne tebulo+ ne ca kutekapo+ inyali ne fiipailo+ ne fipe+ fya mu muputule wa mushilo ifyo balebomfya pa kubomba ne ca kucingilako,+ na conse icakumine uyu mulimo.
32 Kabili Eleasari+ mwana Aarone shimapepo, uwaleangalila abalebombe milimo ya mu muputule wa mushilo, e wali umukalamba wa ntungulushi sha bena Lebi.
33 Muli Merari mwafumine ulupwa lwa bena Maali+ no lupwa lwa bena Mushi.+ Ishi e ndupwa sha bena Merari.+
34 Kabili abantu babo abalembelwe ukulingana ne mpendwa ya baume bonse aba mweshi umo no kuya pa muulu bali amakana mutanda ne myanda ibili (6,200).+
35 Kabili Suriele mwana Abihaili e wali intungulushi pa ndupwa sha kwa Merari mu mukowa wabo. Bapangile inkambi ku kapinda ka ku kuso aka cikuulwa ca mushilo.+
36 Kabili umulimo abana baume ba kwa Merari baleangalila wali wa mafulemu+ ya cikuulwa ca mushilo ne milando+ ya ciko ne nceshi+ sha ciko na mashinte ya ciko ne fipe+ fya ciko fyonse ne milimo ya ciko yonse,+
37 ne fyaimikwa+ fya mu lubansa ukushinguluka, na mashinte+ ya fiko ne mpopo sha fiko ne myando ya fiko.
38 Kabili abapangile nkambi ku ntanshi ya cikuulwa ca mushilo lwa ku kabanga, ku ntanshi ya cikuulwa ca kukumaninako ukulola ukutulila akasuba, ni Mose na Aarone na bana bakwe abaume, abalebomba umulimo wa mu muputule wa mushilo,+ umulimo uo balebombela abana ba kwa Israele. Kabili umbi umbi uwapalamako akepaiwe.+
39 Bonse abalembelwe mu bena Lebi abo Mose na Aarone balembele ukulingana ne fyo Yehova abebele ukulingana ne ndupwa shabo, abaume bonse aba mweshi umo no kuya pa muulu, bali amakana amakumi yabili na yabili (22,000).
40 E lyo Yehova atile kuli Mose: “Lemba abana baume ba kwa Israele bonse amabeli ukutula pa wa mweshi umo no kuya pa muulu,+ upende ne mpendwa yabo.
41 Kabili umbuulile abena Lebi—nine Yehova—bapyane amabeli yonse aya bana ba kwa Israele,+ umbuulile ne fitekwa fya bena Lebi fipyane amabeli yonse aya fitekwa fya bana ba kwa Israele.”+
42 Awe Mose alembele amabeli yonse aya bana ba kwa Israele, nga filya fine fye Yehova amwebele.
43 Ne mpendwa ya baume bonse amabeli ukutula pa wa mweshi umo no kuya pa muulu iya balembelwe yali amakana amakumi yabili na yabili ne myanda ibili na makumi cinelubali na batatu (22,273).
44 Kabili Yehova akonkenyepo ukusosa kuli Mose ati:
45 “Buula abena Lebi ubapyanikishe pa mabeli yonse aya bana ba kwa Israele, ne fitekwa fya bena Lebi ufipyanikishe pa fitekwa fyabo; kabili abena Lebi bakaba bandi.+ Nine Yehova.
46 Kabili pa kulubula+ amabeli imyanda ibili na makumi cinelubali na yatatu (273) aya bana baume ba kwa Israele ayapula pa mpendwa ya bena Lebi,+
47 ukababuulile ibeli limo limo indalama amashekele yasano.+ Ukabuule ayalingene ne shekele lya mu muputule wa mushilo. Ishekele limo magera amakumi yabili (20).+
48 Kabili ukapeele Aarone na bana bakwe abaume indalama sha kulubwilamo abapula pa mpendwa ukubacila.”
49 Awe Mose apokele indalama sha kulubwila ukufuma kuli balya abacilile pa mpendwa iyo abena Lebi bali no kulubula mu ndalama sha cilubula.
50 Ku mabeli ya bana ba kwa Israele e ko apokele indalama amashekele ikana limo ne myanda itatu na makumi mutanda na yasano (1,365) ayalingene ne shekele lya mu muputule wa mushilo.
51 E lyo Mose apeele Aarone na bana bakwe abaume indalama sha kulubwila ukulingana ne cipope ca kwa Yehova, nga filya fine Yehova aebele Mose.
