Mika 3:1-12
3 E lyo nasosele nati: “Shi umfweni, mwe ntungulushi sha kwa Yakobo na mwe bakalamba ba bashilika aba mu ng’anda ya kwa Israele.+ Bushe te mulimo wenu ukwishiba umulinganya?+
2 Mwe bapata icisuma+ no kutemwa ifyabipa,+ mwe bafunda inkanda ya bantu no kufumyako umunofu ku mafupa yabo;+
3 mwalya no munofu wa bantu bandi,+ no kufunda inkanda yabo, no kutobaula amafupa yabo tupimfya tupimfya, no kuyafungaula kwati fintu fili mu mpoto iikalamba kabili kwati munofu uuli mu kati ka mpoto.+
4 Mu nshita ilya bakalilila kuli Yehova ku kubafwa, lelo takabasuke.+ Kabili akafisa icinso cakwe kuli bena muli ilya nshita,+ pantu bacitile ifyabipa.+
5 “Yehova atila kuli bakasesema abalelenga abantu bandi ukulubanta,+ abashinswila ku meno+ yabo no kubila abati, ‘Umutende!’+ lelo umuntu nga tabikile nangu kamo mu tunwa twabo, baimya inkondo ku kumulwisha,+
6 ‘E mulandu wine kuli imwe kukabela ubushiku,+ pa kuti kwikaba icimonwa;+ kabili kuli imwe kukaba imfifi, pa kuti mwikabuka imbuko. Na kasuba kakawila bakasesema, na kuli bena kukafiita inshita ya kasuba.+
7 Na bamona ifimonwa+ bakalengwa insoni,+ na babuka imbuko+ bakekatwa insoni. Bakafimba na pa mwefu wa pa muulu,+ bonse fye, pantu Lesa talebasuka iyo.’”+
8 Lelo ine ninjisulamo amaka no mupashi wa kwa Yehova, no mulinganya na bumpalume,+ pa kuti njebe Yakobo pa kupondoka kwakwe na Israele pa lubembu lwakwe.+
9 Shi umfweni ici, mwe ntungulushi sha mu ng’anda ya kwa Yakobo na mwe bakalamba ba bashilika aba mu ng’anda ya kwa Israele,+ mwe bapata umulinganya, mwe bapondamika conse icatambalala;+
10 mwe bakuulila Sione ku kusumya umulopa na Yerusalemu ku bupondamishi.+
11 Intungulushi sha uko shilapoka amafisakanwa pa kupingula,+ na bashimapepo balafwaya ukubalipila ilyo balefunda,+ na bakasesema balafwaya ukubalipila ilyo balebuka imbuko;+ lelo pali Yehova e po bashintilila ku kubafwa, abati: “Bushe Yehova tali mu kati kesu?+ Ubucushi tabwakese pali ifwe nakalya.”+
12 E ico pa mulandu wa imwe, Sione akalimwa nge bala, na Yerusalemu akashala ifitantaala,+ no lupili lwa ng’anda lukaba kwati fifulo fya kupepelapo ifya mu mutengo.
