Yeremia 13:1-27
13 Yehova anjebele ati: “Kabiye, ubuule umushipi wa nsalu no ku-ukaka mu musana, lelo wiupisha mu menshi.”
2 E ico nabuulile umushipi ukulingana ne fyo Yehova anjebele no ku-ukaka mu musana.
3 Kabili icebo ca kwa Yehova caishile kuli ine umuku walenga bubili, no kutila:
4 “Senda umushipi uo wabuulile, uo ukakile mu musana, ima, kabiye ku Yufrate,+ no ku-ufisa kulya mu lucengo.”
5 E ico naliile no ku-ufisa ku Yufrate, ifyo Yehova anjebele.
6 Lelo ilyo papitile inshiku ishingi, Yehova atile kuli ine: “Ima, kabiye ku Yufrate no kubuula umushipi nakwebele ukuyafisa kulya.”
7 Awe naile ku Yufrate no kwimba no kubuula umushipi umo naufishile, kabili, moneni! umushipi walyonaike ica kuti te kuti ubombe ku cintu nangu cimo.
8 E lyo icebo ca kwa Yehova caishile kuli ine no kutila:
9 “Yehova atila, ‘E fyo nkapwisha ne cilumba ca kwa Yuda+ ne cilumba icikalamba ica kwa Yerusalemu.
10 Bakaba kwati ni uyu mushipi uushingabomba ku cintu nangu cimo, aba bantu ababipa abakaana ukumfwila amashiwi yandi,+ abenda mu kutalama kwa mitima yabo+ no kukonka balesa bambi ku kubabombela no kubakontamina.’+
11 ‘Pantu filya fine umushipi wikata mu musana wa muntu, e fyo nalengele bonse aba mu ng’anda ya kwa Israele na bonse aba mu ng’anda ya kwa Yuda ukulambatila kuli ine,’+ e fyasosa Yehova, ‘ukuti babe abantu bandi+ ne shina+ ne lumbo kabili abantu abayemba kuli ine; lelo tabaumfwilile.’+
12 “Kabili ubebe aya mashiwi auti, ‘Yehova Lesa wa kwa Israele atila: “Umutondo onse uukalamba besushamo umwangashi.”’+ Na bo bakatila kuli iwe, ‘Bushe uleti ukwishiba tatwaishiba ukuti umutondo onse uukalamba besushamo umwangashi?’
13 E lyo ukabebe auti, ‘Yehova atila: “Moneni ndelenga abekashi ba muli cino calo ne shamfumu ishaikaila pa cipuna ca bufumu ica kwa Davidi+ na bashimapepo na bakasesema na bonse abekashi aba mu Yerusalemu ukukolwa.+
14 Kabili nkabatobanya, bawishi na bana pamo,”+ e fyasosa Yehova. “Nshakabalangulukile nangu kumfwa ubulanda, kabili nshakomfwe no luse ulwa kundesha ukubonaula.”’+
15 “Umfweni kabili kutikeni. Mwiba na matutumuko,+ pantu Yehova nasosa.+
16 Peeleni Yehova Lesa wenu ubukata,+ ilyo ashilaleta imfifi+ kabili ilyo amakasa yenu yashilaipununa pa mpili mu nshita ya cungulo bushiku.+ Kabili mukalolela ulubuuto,+ lelo akalulenga ukuba imfifi iikalamba;+ kabili akalulenga ukuba imfifi iyafiitisha.+
17 Kabili nga tamwakomfwe,+ ninshi nkaloosha ukufiseme, pa mulandu wa cilumba cenu, kabili nkalukusha ifilamba; na menso yandi yakatonya ifilamba,+ pantu impaanga+ sha kwa Yehova shikasendwa muli bunkole.
18 “Eba imfumu na namfumu,+ auti, ‘Ikaleni pa nshi,+ pantu icilongwe cenu ica kuyemba cikapona ku mitwe yenu.’+
19 Imisumba ya ku kapinda ka ku kulyo nabaisala, kabili tapali na wa kwisulako. Abena Yuda bonse nababasenda muli bunkole. Nababasenda muli bunkole ukwabula no wa kushalapo.+
20 “Inuna amenso yobe no kumona abaleisa ukufuma ku kapinda ka ku kuso.+ Shili kwi impaanga isho amupeele, impaanga ishisuma?+
21 Nga cinshi ukasosa mu nshita ya kukukanda,+ ilyo iwe walebasambilisha nge fibusa fya pa mutima ukutula pa kutendeka?+ Bushe tawakacule, filya umwanakashi acula pa kupaapa?+
22 Kabili ilyo ukasosa mu mutima obe+ auti, ‘Cinshi ico ifi fintu fyancitikila?’+ Ni pa mulandu wa kuti imembu shobe nashifula e co nakupimpwila ica kufwala cobe;+ kabili amakasa yobe nayacula nga nshi.
23 “Bushe umwina Kushi+ engalula inkanda yakwe, nangu imbwili ukwalula amabala ya iko?+ Ninshi na imwe kuti mwacita ifisuma, mwe basambilila ukucita ifyabipa.+
24 E ico nkabasalanganya+ nge mpimbili ishilepita mu mwela ukufuma mu matololo.+
25 Ici e co nakupendwila, e co nakupimina,”+ e fyasosa Yehova, “pantu walindaba+ kabili watetekela mu bufi.+
26 Na ine nkapimpula ica kufwala cobe no kucifimba ku menso yobe, ne nsoni shobe shikamoneka,+
27 e kutila ubucende bobe+ no kulila kobe,+ imibele yobe iya nsoni iya bucilende. Nalimona ifya bunani fyobe+ pa tupili, na mu mpanga. We bulanda kuli iwe, we Yerusalemu! Teti usanguluke+—kufika lilali ukaba ifi fine?”+