Yeremia 15:1-21
15 E lyo Yehova atile kuli ine: “Nangu fye Mose+ na Samwele+ abeminina ku cinso candi, na lyo line te kuti mpaale aba bantu.+ Kuti nabatamfya ku cinso candi, no kuleka baye.+
2 Nomba nga bakwipusha abati, ‘Ni kwi uko tuleya?’ ukabebe auti, ‘Yehova atila: “Abakafwa ku cikuko icabipa nga nshi, baye ku cikuko icabipa! Abakafwa ku lupanga, baye ku lupanga! Abakafwa ku cipowe, baye ku cipowe!+ Abakaya muli bunkole, baye muli bunkole!”’+
3 “‘Kabili nkatuma imisango ine (4) iya fintu pali bena,’+ e fyasosa Yehova, ‘ulupanga lwa kwipaya, ne mbwa sha kukululula, ne fyuni fya mu lwelele+ ne nama sha pano isonde pa kuti shilye no konaula.
4 Kabili nkabaleka batelentenshiwe ku mabufumu yonse aya pe sonde+ pa mulandu wa kwa Manase mwana Hisekia imfumu ya kwa Yuda, pa mulandu wa fyo acitile mu Yerusalemu.+
5 Pantu nani akakulangulukila, we Yerusalemu, nani akakumfwila uluse,+ kabili nani akesa kuli iwe no kukwipusha nga uli umutende?’
6 “‘Pantu namunsha,’+ e fyasosa Yehova. ‘Mwenda mulebwelela ku numa.+ Kabili nkatambalika ukuboko kwandi pali imwe no kumonaula.+ Nintendwa ukumfwa ubulanda.+
7 Kabili nkabelela ku ca kwelelako+ mu mpongolo sha calo. Nkabalenga ukufwilwa abana.+ Nkonaula abantu bandi, pa mulandu wa kuti tabafuma ku mibele yabo.+
8 Kuli ine bamukamfwilwa babo nabafula ukucila umucanga wa pali bemba. Nkaleta pali bena uwa kubapokolola ifipe mu nshita ya kasuba,+ nkamuleta pali banyina, na pa balumendo. Kabili nkalenga icimfulunganya ukwisa pali bena mu kupumikisha.+
9 Umwanakashi uwafyala abana cinelubali (7) aleshikila; kabili alepeemashika fye.+ Akasuba kakwe nakawa nangu ca kuti ni nshita ya kasuba;+ nakomfwa insoni no kuseebana.’ Kabili nkapeela abakashalapo ku lupanga pa ntanshi ya balwani babo,’+ e fyasosa Yehova.”
10 We bulanda kuli ine,+ mayo, pantu mwalimfyele, ne muntu uo bakansaninapo kabili umuntu uo aba pano isonde bonse bomaninapo.+ Nshabakongwesha, na bo tabankongwesha. Kabili bonse balentiipwila.+
11 Yehova atila: “Cine cine, nkakubombela bwino bwino.+ Nkakwafwilisha mu nshita ya macushi+ na mu nshita ya bulanda, pa mulandu wa balwani.+
12 Bushe umuntu kuti atobaula icela, icela icafuma ku kapinda ka ku kuso, no kutobaula umukuba?
13 Ubukumu bwenu ne fyuma fyenu nkafipeela ku ba kupokolola ifipe+ mu fitungu fyenu fyonse, te ku kushitisha, lelo pa membu shenu shonse.+
14 Kabili nkabalenga ukuya na balwani mu calo ico bashaishiba.+ Pantu ubukali bwandi bulepya ngo mulilo.+ Ni mwe ubukali bwimine.”
15 Kabili imwe mwalishiba.+ Mwe Yehova, njibukisheni+ no kubika amano kuli ine kabili kandeni abancusha.+ Apo mulakokola ukukalipa, mwinjipaya.+ Moneni ifyo nshipikisha umuseebanya pa mulandu wenu.+
16 Nasangile amashiwi yenu, na ine naliyaliile,+ kabili amashiwi yenu yanenga ukutemwa+ no kusekelela mu mutima wandi;+ pantu nainikwa ishina lyenu,+ mwe Yehova Lesa wa mabumba.+
17 Nshikala na batemwa imipuulwe+ kabili abatendeka ukusamwa.+ Njikala fye neka pa mulandu wa kuboko kwenu,+ pantu mwalibika muli ine ubukombe bwa bupingushi bwenu.+
18 Nga kanshi cinshi ico ukukalipwa kwandi takulekela+ ne mpumo yabela iya mutatakuya?+ Yakaana ukupola. Imwe muli ngo muntu uwa bucenjeshi kuli ine,+ nga menshi ayashingacetekelwa.+
19 E ico Yehova atila: “Nga wabwela, na ine nkakubwesha.+ Ukeminina ku cinso candi.+ Kabili nga wafumya ifyawamisha ku fya fye, ni we nkalalandilamo. Bakabwela kuli iwe, lelo iwe tawakabwelele kuli bena.”
20 “Kabili nakulenga ukuba kuli aba bantu ilinga lya mukuba;+ na bo bakalwa na iwe, lelo bakakufilwa.+ Pantu ndi na iwe, pa kuti nkupusushe kabili pa kuti nkupokolole,”+ e fyasosa Yehova.
21 “Kabili nkakupokolola mu minwe ya babipa,+ no kukulubula mu minwe ya aba bantu abankalwe.”
