Yeremia 19:1-15
19 Yehova atila: “Kabiye, kasende umutondo we bumba uwa kwa nakabumba,+ usende na bakalamba bamo pa bantu na bakalamba bamo pali bashimapepo.
2 Kabili uye ku mupokapoka wa mwana wa kwa Hinomu,+ uwabela ku Mpongolo ya Fi-inga. Kabili kulya e ko ubilishe ifyo ndekweba.+
3 Kabili usose auti, ‘Umfweni icebo ca kwa Yehova, mwe shamfumu sha kwa Yuda na mwe bekashi ba mu Yerusalemu.+ Yehova wa mabumba,+ Lesa wa kwa Israele, atila:
“‘“Moneni, ndeleta ububi pali cino cifulo ubwa kuti umuntu nga aumfwa, cikamupesha amano;*+
4 pa mulandu wa kuti nabansha+ no kufulunganya cino cifulo+ no kufutumwinamo icushi ce lambo kuli balesa bambi abo bashaishibe,+ bena ne fikolwe fyabo ne shamfumu sha kwa Yuda; kabili nabesusha umulopa wa ba kaele muli cino cifulo.+
5 Kabili balikuula ififulo fya kupepelapo ifya kwa Baali pa kuti boce abana babo mu mulilo ngo mutuulo wa koca kuli Baali,+ icintu ico nshabebele kabili ico nshasosele,+ kabili icishaishile na mu mutima wandi.”’+
6 “‘“E ico, moneni! inshiku shileisa,” e fyasosa Yehova, “ilyo cino cifulo tacaketwe kabili ati Tofete+ nangu ati umupokapoka wa mwana wa kwa Hinomu.+
7 Kabili nkafulunganya amapange ya kwa Yuda na Yerusalemu muli cino cifulo,+ kabili nkabalenga bakafwe ku lupanga pa menso ya balwani babo na ku kuboko kwa balefwaya imyeo yabo.+ Nkapeela ne fitumbi fyabo ku fyuni fya mu lwelele na ku nama sha mu mpanga ku kuba ifya kulya.+
8 Nkalenga no yu musumba ukuba ica kupapa kabili ica kulishisha umunsoli.+ Onse uulepitapo akapapa no kulisha umunsoli pa finkunka fya uko fyonse.+
9 Nkabalenga bakalye imibili ya bana babo abaume ne mibili ya bana babo abanakashi; kabili umuntu onse akalya umubili wa munankwe, pa mulandu wa macushi na pa mulandu wa mafya ayo bakabaletela ku balwani babo na balefwaya imyeo yabo.”’+
10 “Kabili utobe umutondo pa ntanshi ya baume abaleya nobe.
11 Kabili ubebe auti, ‘Yehova wa mabumba atila: ‘Ifi fine e fyo nkatoba aba bantu no musumba uno, filya umuntu atoba icipe ca kwa nakabumba ica kuti teti na kabili bacipange icituntulu;+ kabili bakashiika ifitumbi mu Tofete+ mpaka kukabule apa kushiika.”’+
12 “‘E fyo nkacita kuli cino cifulo,’ e fyasosa Yehova, ‘na ku bekashi abalimo, no kucita uno musumba nga Tofete.+
13 Na mayanda ya mu Yerusalemu na mayanda ya shamfumu sha kwa Yuda yakaba ayakowela kwati ni Tofete,+ amayanda yonse ayo balefutumwinapo icushi ca malambo pa mitenge ya yako ku fya mu muulu,+ kabili apaleitulwilwa umutuulo wa mwangashi kuli balesa bambi.’”+
14 E lyo Yeremia abwelele ukufuma ku Tofete,+ uko Yehova amutumine ukuyasesema, no kwiminina mu lubansa lwa ng’anda ya kwa Yehova no kweba abantu bonse+ ati:
15 “Yehova wa mabumba, Lesa wa kwa Israele, atila, ‘Moneni ndeleta pali uno musumba na pa mishi ya uko yonse ububi bonse ubo nasosa pali wena, pantu nabatalamika imikoshi yabo pa kuti beumfwila amashiwi yandi.’”+
Amafutunoti
^ Mu ciHebere paba ati, “amatwi yakawela.”
