Yeremia 2:1-37
2 Kabili icebo ca kwa Yehova caishile kuli ine+ no kutila:
2 “Kabiye, ubilikishe kuli Yerusalemu, auti, ‘Yehova atila:+ “Ndeibukisha bwino icikuuku cobe ica ku bukashana bobe,+ no kutemwa kobe ilyo wakobekelwe,+ ne fyo walenkonka mu matololo, mu calo umushabyelwe imbuto.+
3 Israele ali uwa mushilo kuli Yehova,+ ali e fisabo fyakwe ifya ntanshi.”’+ ‘Bonse abaeseshe ukumulya, baleba no mulandu.+ Ububi bwalebaponena,’ e fyasosele Yehova.”+
4 Umfweni amashiwi ya kwa Yehova, mwe ba mu ng’anda ya kwa Yakobo,+ na mwe ndupwa shonse isha mu ng’anda ya kwa Israele.+
5 Yehova atila: “Lufyengo nshi bashinwe basangile muli ine,+ pa kuti baitalushe kuli ine,+ balakonka no tulubi twa fye,+ na bena basanguka aba fye?+
6 Kabili tabasosele, abati, ‘Ali kwi Yehova, uwatufumishe mu calo ca Egupti,+ uwatwenseshe mu matololo, ukupita mu calo ca ciswebebe+ kabili umwaba ifilindi, mu calo umushaba amenshi+ kabili umwafiita nga nshi,+ mu calo umo umuntu ashabalile apita kabili umo ashabalile ekala?’
7 “Kabili namuletele mu calo ca miti ya fitwalo, pa kuti mulye ifisabo fya ciko ne fisuma fya ciko.+ Lelo mwalishile no kukowesha icalo candi; no bupyani bwandi mwalengele bube ubwa bunani.+
8 Na bashimapepo tabasosele abati, ‘Ali kwi Yehova?’+ Na balesambilisha amafunde tabanjishibe;+ na bakacema balimembukile,+ na bakasesema basesemene mwi shina lya kwa Baali,+ bakonkele abashali no kubaafwa.+
9 “‘E ico nkalwa na imwe na kabili,’+ e fyasosa Yehova, ‘kabili nkalwa na bana ba bana benu.’+
10 “‘Lelo abukileni ku fishi fya mu lulamba lwa Kitimu+ no kumona. Kabili tumeni bamo ku Kedari+ no kutontonkanyapo sana, kabili mumone ica musango yu nga calicitikapo.+
11 Bushe kwaliba uluko ulwasha lesa lupepa,+ no kuya kuli balesa abashili balesa bene bene?+ Lelo abantu bandi nabasha ubukata bwandi no kuya ku fishingabaafwa.+
12 Lolesheni no kupeshiwa amano pali ici, mwe myulu; kabili tutumeni nga nshi,’ e fyasosa Yehova,+
13 ‘pantu kuli ifyabipa fibili ifyo abantu bacitile: Nabasha ine,+ ne kamfukumfuku ka menshi ya mweo,+ pa kuti baimbile ifishima, ifishima ifyalepuka, ifishingekalamo amenshi.’
14 “‘Bushe Israele mubomfi,+ nelyo musha uwafyalilwa mu ng’anda? Nga cinshi abela icipe ica kupokolola?
15 Abana ba nkalamo balemubulumina;+ kabili ukubuluma kwabo kuleumfwika.+ Nabacita ne calo cakwe ukuba ica kulenga ukupapa. Imisumba yakwe naboca, kabili tamuli umwikashi nangu umo.+
16 Na bana ba kwa Nofu+ na Tafne+ balekulya pa mutwe obe.+
17 Bushe ifi te fyo waicitile we mwine pa kusha Yehova Lesa obe+ mu nshita alekwensha mu nshila?+
18 Nomba cinshi wingaila mu nshila ya ku Egupti+ ku kunwa amenshi ya Shihore?+ Nomba cinshi wingaila mu nshila ya ku Asiria+ ku kunwa amenshi ya mu Mumana?
19 Ububi bobe bufwile ukukulungika,+ no lubembu lobe lufwile ukukukalipila.+ E ico wishibe ukuti ifi washile Yehova Lesa wacitile icabipa kabili ica bulanda,+ kabili taulentiina,’+ e fyasosa Shikulu Mulopwe+ Yehova wa mabumba.
20 “‘Pantu kale natobawile ikoli lyobe;+ naputawile ne fikakilo fyobe. Lelo watile: “Nshakamubombele,” kabili walesenama+ pa kapili konse na mwi samba lya muti onse uwalelema,+ no kucita bucilende.+
21 Lelo ine nakulimbile ukuba umwangashi uwakashika kabili uusuma,+ uwali ulubuto lwine lwine. Nga kanshi wansangukila shani no kuba imisambo iyabipa iya mwangashi umbi umbi?’+
22 “‘Nangu usambe shani ne fishikisa nangu ubuule sopo iingi,+ ine nkalakumona fye uwa fiko pa mulandu wa membu shobe,’+ e fyasosa Shikulu Mulopwe Yehova.
23 Kuti wasosa shani auti, ‘Nshaikowesha+ kabili nshakonka baBaali’?+ Mona inshila wapitilemo mu mupokapoka.+ Mona ifyo wacitile. Uli mwana wa ngamila umukota uubutukisha kabili uulelubanta mu nshila ya uko;
24 uli colwa+ uwabelela mu matololo, mu nshita ali ne cilaka ca menshi, ilyo alepemashika;+ kabili pa nshita alefwaya iilume, nani engamulesha? Ishilume ishilemufwaya tashakashupikwe. Mu mweshi wakwe shikamusanga.
25 Wileka inkasa shobe shende ukwabula indyato, nangu kuleka ku mukoshi kuume ku cilaka.+ Lelo watile, ‘Takuli isubilo nakalya!+ Pantu nintemwana na bantu bambi bambi,+ kabili e bo nakulakonka.’+
26 “Filya umupupu omfwa insoni ilyo bamusanga, e fyo aba mu ng’anda ya kwa Israele bomfwile insoni,+ bena, ishamfumu shabo, bacilolo babo na bashimapepo babo na bakasesema babo.+
27 Balesosa ku cimuti, abati, ‘Ni we tata,’+ kabili beba ilibwe abati, ‘Ni we wamfyele.’ Kabili balosha ne numa kuli ine no kufumyako icinso.+ Nomba ilyo ubucushi bukabaponena, bakatila, ‘Imeni mutupusushe!’+
28 “Lelo bali kwi balesa bobe abo waipangila?+ Leka beme tumone nga kuti bakupususha mu nshita ya bucushi bobe.+ Pantu balesa bobe nabafula nge misumba yobe, we Yuda.+
29 “‘Cinshi ico mulekansanina na ine?+ Cinshi ico mwabembukila ine imwe bonse?’+ e fyasosa Yehova.
30 Ninkanda abana benu+ lelo tapali ifyo bacitilepo.+ Balikeene ukusalapula. Ulupanga lwenu nalonaula bakasesema kwati ni nkalamo iyonaula.+
31 Mwe nkulo, tontonkanyeni pa mashiwi ya kwa Yehova.+
“Bushe ninsanguka amatololo kuli Israele+ nelyo icalo umwaba imfifi iikalamba? Nga cinshi ico abantu bandi balesosela, abati, ‘Natulubanta. Tatwakabwele na kabili kuli imwe’?+
32 Bushe nacisungu kuti alaba ifibekobeko fyakwe, na nabwinga ifya kukaka pa cifuba? Lelo abantu bandi bena balindaba pa nshiku ishishingapendwa.+
33 “Nga cinshi kanshi, we mwanakashi ulewamisha imicitile yobe pa kuti utemwikwe? Kabili nauisambilisha imibele yabipa.+
34 Kabili mu fya kufwala fyobe namusangwa umulopa wa balanda+ aba kaele.+ Te pa mulandu wa kuti baishile mu kukwibila, lelo nausangile pa fya kufwala fyobe fyonse.+
35 “Lelo utila, ‘Ndi wa kaele. No bukali bwakwe bwalifuma pali ine.’+
“Mona ndekulubulwisha pa mulandu wa kusosa ukuti, ‘Nshabembuka.’+
36 Cinshi umwena ukwaluka kwa mibele yobe nga kantu akanono?+ Insoni shikakwikata pali Egupti na po,+ ifyo shakwikete na pali Asiria.+
37 E mulandu wine pa kuya ukaya naubika iminwe pa mutwe,+ pantu Yehova nakaana ifyo wacetekelamo, kabili tawakatunguluke na bo nakalya.”