Yeremia 22:1-30
22 Yehova atila: “Kabiye ku ng’anda ya mfumu ya kwa Yuda, kabili uyesosa kulya aya mashiwi.
2 Usose auti, ‘Umfwa icebo ca kwa Yehova, we mfumu ya kwa Yuda we waikala pa cipuna ca bufumu ica kwa Davidi,+ iwe na babomfi bobe na bantu bobe, abengilila pa mpongolo ishi.+
3 Yehova atila: “Muleba no mulinganya no bulungami, kabili mulepokolola mu maboko ya ncenjeshi umuntu uo bebile; kabili mwilacusha umulebeshi, no mwana wa nshiwa nangu ni mukamfwilwa.+ Mwilaba no bunkalwe kuli bena.+ Kabili mwilasumya umulopa wa kaele muli ino ncende.+
4 “‘“Pantu nga mwaumfwila aya mashiwi, ninshi pa mpongolo sha uno musumba pakengila ishamfumu ishikekala pa cipuna ca bufumu ica kwa Davidi,+ ishikanina mu maceleta na pali bakabalwe, cila mfumu na babomfi ba iko na bantu ba iko.”’+
5 “‘Lelo nga tamumfwilile aya mashiwi, nailapa ne mwine,’+ e fyasosa Yehova, ‘ukuti iyi ng’anda ikonaulwa.’+
6 “Pantu e fyasosa Yehova pa ng’anda ya mfumu ya kwa Yuda ati, ‘Waba nga Gileadi kuli ine, nga pa muulu wa Lebanone.+ Lelo nkakusangula amatololo;+ kabili takuli umusumba nangu umo uukekalwamo.+
7 Kabili nkamwimisha aba kumonaula,+ umuntu onse ne fyanso fyakwe;+ na bo bakatema imiti yobe iya mikedari+ iyawamisha no kuipoosa mu mulilo.+
8 Ne nko ishingi shikapita pali uno musumba no kulanshanya abati: “Nga cinshi ico Yehova acitila ifi ku musumba uyu ukalamba?”+
9 Kabili bakatila: “Ni pa mulandu wa kuti bashile icipangano ca kwa Yehova Lesa wabo+ no kukontamina balesa bambi no kubabombela.”’+
10 “Mwiloosha uwafwa,+ kabili mwimumfwila ubulanda. Loosheni uuleya muli bunkole, pantu takabwele kabili takamone icalo ca bantu bakwe.
11 Pantu e fyo Yehova asosa pali Shalumu+ mwana Yoshia, imfumu ya kwa Yuda uwaleteka mu cifulo ca kwa Yoshia wishi,+ uwafuma pa cifulo cakwe no kuya ati, ‘Takabwelele ku calo cakwe na kabili.
12 Pantu ku calo uko bamusenda muli bunkole e ko akafwila, kabili takamone ici calo na kabili.’+
13 “We bulanda ku ulekuula ing’anda yakwe,+ lelo apabula ubulungami, ne miputule yakwe iya pa muulu, apabula umulinganya, no kubomfya umunankwe apa fye, ukwabula ukumupeela amalipilo yakwe;+
14 uutila, ‘Ndi no kuikuulila ing’anda iikalamba ne miputule ya pa muulu iikalamba;+ kabili amawindo yandi yakaba ayakalamba, ne mbao sha ku fibumba shikaba isha mikedari+ ishasubwako ifyakashika.’+
15 Bushe ukatwalilila ukuteka pa mulandu wa kuti ulebomfya imbao sha mukedari? Bushe wiso talelya no kunwa no kuba no mulinganya no bulungami?+ Ena ifintu fyalimuwamine.+
16 Apingwile umulandu wa mulanda no mupiina.+ Ne fintu fyaliweme. ‘Bushe uku takwali e kunjishiba?’ e fyasosa Yehova.
17 ‘Lelo amenso yobe no mutima obe fyaba pa bunonshi bwa bufumfuntungu,+ na pa mulopa wa muntu wa kaele ku ku-usumya,+ na pa kucita ubucenjeshi na pa kwiba ifintu no kufisenda.’
18 “E ico e fyo Yehova asosa pali Yehoyakimu+ mwana Yoshia, imfumu ya kwa Yuda ati, ‘Tabakamulooshe abati: “Iye, munyinane! Iye, nkashi yandi!” Nangu ukumuloosha abati: “Iye, mwe shikulu! Iye, mwe bakankaala!”+
19 Akashiikwa filya impunda ishiikwa.+ Bakamukululula no kumupoosa ku nse ya mpongolo ya Yerusalemu.’+
20 “Nina pali Lebanone+ no kupunda, na pali Bashani+ usansule ishiwi lyobe. Kabili punda na ku Abarimu,+ pantu bonse abakutemwa sana nabonaulwa.+
21 Nalandile na iwe mu nshita ushali na masakamika.+ Na iwe watile, ‘Nshaumfwe.’+ E fyaba imibele yobe ukufuma ku bwaice, pantu tawaumfwile kwi shiwi lyandi.+
22 Umwela ukacema bonse abacemi bobe;+ na bakutemwa sana bakaya muli bunkole.+ Pantu ilya nshita ukomfwa insoni no kuseebana pa mulandu wa bucushi bobe bonse.+
23 We waikala mu Lebanone,+ we waikala mu cinsa mu miti ya mikedari,+ ifyo ukateta ilyo ubucushi bukesa pali iwe, no kukomwa ifumo+ ngo mwanakashi uulepaapa!”+
24 “‘Na pali ne mwine,’ e fyasosa Yehova, ‘nangu fye nga ca kuti Konia+ mwana Yehoyakimu+ imfumu ya kwa Yuda aali e nindaminwe ya kufwatikilako+ ku kuboko kwandi ukwa ku kulyo, kuti namufuulako!+
25 Kabili nkakupeela mu minwe ya balefwaya umweo obe+ na mu minwe ya balya utiina na mu minwe ya kwa Nebukadresari imfumu ya ku Babiloni na mu minwe ya bena Kaldi.+
26 Kabili nkapoosa iwe na noko+ uwakufyele ku calo cimbi uko mushafyalilwe, kabili mukafwila kulya kwine.+
27 Kabili tabakabwelele ku calo uko umutima wabo ukalafuluka ukubwelela.+
28 Bushe uyu muntu Konia+ ni nongo iyasuulwa, kabili iyatobaulwa,+ kabili icipe ico bashingatemwa?+ Nga cinshi kanshi ena na bana bakwe balebafuntwila no kubapoosa mu calo ico bashaishibe?’+
29 “We calo we, we calo we, we calo we, umfwa icebo ca kwa Yehova.+
30 Yehova atila, ‘Lembeni ukuti uyu muntu ni mbula bana,+ umuntu uushakatunguluke mu nshiku shakwe; pantu tapali uwa mu bana bakwe uukatunguluka,+ no kwikala pa cipuna ca bufumu ica kwa Davidi+ no kuteka na kabili mu Yuda.’”