Yeremia 25:1-38
25 Icebo icaishile kuli Yeremia pa baYuda bonse mu mwaka walenga ine (4) ukutula apo Yehoyakimu+ mwana Yoshia, imfumu ya kwa Yuda, atendekeele ukuteka, e kutila, mu mwaka wa ntanshi uwa kuteka kwa kwa Nebukadresari imfumu ya ku Babiloni;
2 ico Yeremia kasesema alandile pa baYuda bonse na pa bekashi bonse aba mu Yerusalemu, aciti:
3 “Ukufuma mu mwaka walenga ikumi na itatu (13) ukutula apo Yoshia+ mwana Amone, imfumu ya kwa Yuda, atendekeele ukuteka, ukufika no bwa lelo, muli iyi myaka amakumi yabili na itatu (23), icebo ca kwa Yehova caleisa kuli ine, kabili lyonse nalemweba, nalecelela no kulalanda, lelo tamwaumfwile.+
4 Kabili Yehova atumine kuli imwe ababomfi bakwe bonse bakasesema, ukucelela no kubatuma, lelo tamwaumfwile,+ nangu ukukutika pa kuti mumfwe,+
5 na bo balesosa abati, ‘Umuntu onse afume ku mibele yenu iyabipa na ku micitile yenu iyabipa,+ no kutwalilila ukwikala mu calo ico Yehova amupeele imwe ne fikolwe fyenu ukufuma na kale no kuya umuyayaya.+
6 Kabili mwilakonka balesa bambi pa kuti mulebabombela no kubashinshimuna, pa kuti mwinkalifya ku milimo ya minwe yenu, kabili pa kuti nikamuletela ubucushi.’+
7 “‘Lelo tamwaumfwile kuli ine,’ e fyasosa Yehova, ‘pa kuti fye munkalifye ku milimo ya minwe yenu, no kuiletela ubucushi mwe bene.’+
8 “E ico Yehova wa mabumba atila, ‘“Pa mulandu wa kuti tamwaumfwilile amashiwi yandi,
9 moneni ndetuma ubukombe kabili nkaleta indupwa shonse isha ku kapinda ka ku kuso,”+ e fyasosa Yehova, “kabili ndetuma ubukombe kuli Nebukadresari imfumu ya ku Babiloni, umubomfi wandi,+ kabili nkabaleta ku kulwisha ici calo+ na bekashi ba ciko ne nko ishi shonse ishashingulukako;+ kabili nkabonaula no kubalenga ukuba ica kupapa kabili icintu ica kulishishishapo umunsoli,+ no kuba icibolya umuyayaya.+
10 Kabili nkafumya muli bena icongo ica kusangalala ne congo ica kusekelela,+ ishiwi lya kwa shibwinga ne shiwi lya kwa nabwinga,+ ukulila kwa mpelo+ no lubuuto lwa nyali.+
11 Ne calo conse ici cikaba icibolya, ica kupapa, ne nko ishi shikabombela imfumu ya ku Babiloni imyaka amakumi cinelubali (70).”’+
12 “‘Nomba pa numa ya myaka amakumi cinelubali (70)+ nkalubulwisha imfumu ya ku Babiloni no luko+ lulya pa membu shabo,’ e fyasosa Yehova, ‘ne calo ca bena Kaldi,+ nkacilenga ukuba umwabula akantu umuyayaya.+
13 Kabili nkaleta pali cilya calo ifi fyonse ifyo nasosa pali cena, na fyonse ifyalembwa mwi buuku ili ifyo Yeremia aseseme pa nko shonse.+
14 Pantu inko ishingi ne shamfumu ishikalamba+ shabalenga ukuba ababomfi;+ kabili nkashilambula ukulingana ne micitile ya shiko kabili ukulingana ne milimo ya minwe ya shiko.’”+
15 Pantu Yehova, Lesa wa kwa Israele, atile kuli ine: “Buula mu minwe yandi kapu iyi iya mwangashi wa bukali bwandi, kabili unwenshe inko shonse isho ndekutumako.+
16 Kabili bali no kunwa no kutalantanta no kuba nga bantu abapena pa mulandu wa lupanga ulo ndetuma mu kati kabo.”+
17 Na ine nabuulile kapu mu minwe ya kwa Yehova no kunwensha inko shonse isho Yehova antumineko:+
18 e kutila, Yerusalemu ne misumba ya kwa Yuda ne shamfumu sha uko, na bacilolo ba uko, no kubalenga ukuba icibolya, ica kupapa,+ icintu ica kulishishapo umunsoli kabili icitiipu, nge fyo caba na buno bushiku;+
19 na Farao imfumu ya ku Egupti na babomfi bakwe na bacilolo bakwe na bantu bakwe bonse;+
20 na cintobentobe onse uwa bantu ne shamfumu shonse isha ku calo ca Usi,+ ne calo conse ica baPelishiti+ na Ashkelone+ na Gasa+ na Ekrone+ na bashalapo aba mu Ashidode;+
21 Edomu+ na Moabu+ na bana ba kwa Amone;+
22 ne shamfumu shonse isha kwa Turi+ ne shamfumu shonse isha kwa Sidone+ ne shamfumu sha pa cishi icabela mu citungu ca bemba;
23 na Dedani+ na Tema+ na Busi na bonse ababeya umushishi mu nsensematwi;+
24 ne shamfumu shonse isha baArabu+ ne shamfumu shonse isha cintobentobe wa bantu abaikala mu matololo;
25 ne shamfumu shonse isha ku Simri ne shamfumu shonse isha ku Elamu+ ne shamfumu shonse isha bena Madai;+
26 ne shamfumu shonse isha ku kapinda ka ku kuso ishabela mupepi ne shabela ukutali, imo na imo, na mabufumu yonse yambi aya pe sonde ayaba pano nse; ne mfumu ya ku Sheshaki+ e ikakonkapo ukunwa pali bena.
27 “Kabili ukabebe auti, ‘Yehova wa mabumba, Lesa wa kwa Israele atila: “Nweni no kukolwa no kuluka no kupona ica kuti mufilwe no kwima+ pa mulandu wa lupanga ulo ndetuma mu kati kenu.”’+
28 Nomba nga bakaana ukubuula kapu mu minwe yobe no kunwa, na iwe ubebe auti, ‘Yehova wa mabumba atila: “Ukunwa kwena mulenwa.+
29 Pantu, moneni! nkabalilapo ukuleta ubucushi+ pa musumba uwainikwa ishina lyandi, bushe imwe mukalekwa fye ukwabula ukukandwa?”’+
“‘Tamwakalekwe fye ukwabula ukukandwa; pantu kuli ulupanga ulo ndeita ukuti lwise pa bekashi bonse aba pe sonde,’ e fyasosa Yehova wa mabumba.
30 “Lelo iwe useseme kuli bena amashiwi yonse aya, no kubeba auti, ‘Yehova akabuluma+ ukufuma mu muulu, no kusansula ishiwi lyakwe+ ukufuma uko aikala ukwa mushilo. Akabuluma ukufuma uko aikala. Akapunda pa bekashi bonse aba pano isonde,+ ngo kupunda kwa balenyantaula imyangashi.’
31 “‘Icongo cikafika na ku mpela ya pe sonde, pantu Yehova ali no mulandu wa kushinina inko.+ Akapingula abantunse bonse.+ Kabili ababipa akaleka bakepaiwe ku lupanga,’+ e fyasosa Yehova.
32 “Yehova wa mabumba atila, ‘Moneni! Ubucushi bukafuma ku luko lumo no kuya ku luko lumbi,+ kabili icipuupu ca mwela icikalamba cikema ukufuma ukwalepesha pe sonde.+
33 Mu bushiku ubo abakepaiwa kuli Yehova, bakakumana pano isonde, ukufuma ku mpela ukufika na ku mpela.+ Tabakabalooshe, kabili tabakabalonganike nangu ukubashiika.+ Bakaba umufundo pa mushili.”+
34 “Loosheni, mwe bacemi, no kupunda!+ Kabili ifumfunyeni mu mito,+ mwe bakanabesa ba mu mukuni,+ pantu inshiku shenu isha kumwipaya no kumusalanganya nashifika,+ kabili mukonaulwa nge cipe icisuma!+
35 Ukwa kufulumukila abacemi nakuloba, ne nshila ya kupusukilamo abakankaala aba mu mukuni nailoba.+
36 Umfweni! Ukupunda kwa bacemi, ne misowa ya bakankaala ba mu mukuni, pantu Yehova aleonaula umulemfwe wabo.
37 Na mu fifulo fya mutende tamuli ica mweo pa mulandu wa bukali bwa kwa Yehova ubulepya ngo mulilo.+
38 Nafuma umwa kufisama mwakwe ngo musepela wa nkalamo,+ pantu icalo cabo nacisanguka ica kupapa pa mulandu wa lupanga ulukali na pa mulandu wa bukali bwakwe ubulepya ngo mulilo.”+
