Yeremia 3:1-25
3 Kwaba insoselo iitila: “Nga ca kutila umwaume atamfya umukashi wakwe, na o afuma kuli ena no kuyaupwa ku mwaume umbi, bushe umwaume kuti abwelela kuli uyo mwanakashi na kabili?”+
Bushe cilya calo ninshi tacakowela?+
“Kabili iwe walicita bucilende ku fibusa ifingi;+ nomba bushe kuti wabwelela kuli ine?”+ e fyo Yehova asosa.
2 “Lolesha mu nshila ishasebeka no kumona.+ Ni pi apo abaume bashakulaala ku maka?+ Mu mbali ya nshila e mo walebekalila, ngo mwina Arabia mu matololo;+ kabili ulakowesha icalo kuli bucilende bobe no bubi bobe.+
3 E ico takuli imfula iikalamba,+ nangu ni mfula ya kulekelesha.+ Kabili uli ne cinso ca mukashi uucita bucilende. Wakaana ukumfwa insoni.+
4 Bushe nomba ulenjita auti, ‘Tata,+ imwe ni mwe cibusa wandi uwa pa mutima ukufuma ku bwaice bwandi!’+
5 Bushe umuntu kuti akalipa umuyayaya, nelyo ukulolesha pa cintu umuyayaya?’+ Mona! Naulanda, kabili waile mu kucita ifyabipa kabili tawafililwe.”+
6 Kabili mu nshiku sha kwa Yoshia imfumu,+ Yehova atile kuli ine: “Bushe naumona ifyo Israele wabula icishinka acitile?+ Aleya pa lupili lonse ulutali+ na mwi samba lya muti onse uwalelema,+ pa kuti acite bucilende kulya.+
7 Na pa numa ya kucita fyonse ifi, nalemweba lyonse ukuti abwelele kuli ine, lelo tabwelele;+ kabili Yuda alelolesha pali nkashi yakwe uwaba no bucenjeshi.+
8 Ilyo namwene ifi, pa mulandu wa kuti Israele wabula icishinka acitile ubucende, nalimutamfishe+ no kumupeela kalata wa kumulekelapo,+ lelo Yuda inkashi nankwe iya bucenjeshi tatiinine iyo, na o aile ku kucita bucilende.+
9 Kabili acitile bucilende pa mulandu wa kuilekelesha, kabili alekowesha icalo+ no kucita ubucende na mabwe ne fimuti;+
10 na lyo line Yuda, nkashi inankwe iya bucenjeshi, tabwelele kuli ine no mutima wakwe onse,+ lelo abwelele bufi bufi fye,’+ e fyasosa Yehova.”
11 E lyo Yehova atile kuli ine: “Israele uwabula icishinka nalungamika umweo wakwe ukucila Yuda uwa bucenjeshi.+
12 Kabiye, uyebilisha aya mashiwi ku kapinda ka ku kuso,+ auti:
“‘“Bwela, we Israele, we cipondoka,” e fyasosa Yehova.’+ ‘“Nshakamuloleshe bukali bukali+ pantu ndi wa cishinka,”+ e fyasosa Yehova.’ ‘“Nshakakalipe umuyayaya.+
13 Lelo mwishibe icilubo cenu, pantu ni Yehova Lesa wenu e o mubembukile.+ Kabili mwalesalanganya inshila shenu ku bantu bambi bambi+ mwi samba lya muti onse uwalelema,+ lelo tamwaumfwile kwi shiwi lyandi,” e fyasosa Yehova.’”
14 “Bweleni, mwe bana abapondoka,”+ e fyasosa Yehova. “Pantu ine nimba umulume wenu;+ kabili nkabuula imwe, umo mu musumba na babili mu lupwa, nkamuleta na ku Sione.+
15 Nkamupeela na bakacema abo umutima wandi ukasekelelamo,+ kabili bakamupeela amano no kumulenga ukwiluka.+
16 Awe mu nshiku shilya mukaba abengi no kutwala ifisabo mu calo,” e fyasosa Yehova.+ “Tabakasose na kabili abati, ‘Icipao ca cipangano ica kwa Yehova!’+ kabili tacakese na mu mutima, kabili tabakacibukishe+ nangu ukucifuluka, kabili tacakapangwe na kabili.
17 Mu nshita ilya baketa Yerusalemu ati, icipuna ca bufumu ica kwa Yehova;+ kabili ku Yerusalemu+ e ko inko shonse shikalonganikwa+ pa kuti bacindike ishina lya kwa Yehova, kabili tashakende mu bumankonso bwa mitima ya shiko na kabili.”+
18 “Mu nshiku shilya aba mu ng’anda ya kwa Yuda na ba mu ng’anda ya kwa Israele+ bakendela pamo,+ kabili bakafumina capamo mu calo ca ku kapinda ka ku kuso no kwingila mu calo ico napeele ku fikolwe fyenu ukuba ubupyani.+
19 Kabili natile, ‘Iye, ifyo namubikile mu kati ka bana abaume no kumupeela icalo icisuma,+ icalo ico inko ishingi shikumbwa!’ Nasosele no kuti, ‘Mwakulanjita ati, “Tata!”+ kabili tamwakaleke ukunkonka.’
20 ‘Filya fine umukashi acita ubucenjeshi no kufuma ku mulume wakwe,+ e fyo na imwe mwacita ubucenjeshi kuli ine,+ mwe ba mu ng’anda ya kwa Israele,’ e fyo Yehova asosa.”
21 Pa nshila apasebeka paleumfwika ishiwi, ukulila, no kupapaata kwa bana ba kwa Israele. Pantu nabapondamika inshila shabo;+ nabalaba Yehova Lesa wabo.+
22 “Bweleni, mwe bana abapondoka.+ Nkamuposha kuli bucipondoka bwenu.”+
“Moneni tuli pano! Twaisa kuli imwe, pantu ni mwe Lesa wesu, mwe Yehova.+
23 Ca cine utupili ne cimfulumfulu ca pa mpili+ fya bufi.+ Cine cine ipusukilo lya kwa Israele lyaba muli Yehova Lesa wesu.+
24 Lelo ica museebanya+ nacilya ifyo ifikolwe fyesu fyaleculila ukufuma ku bwaice bwesu, impaanga shabo ne ng’ombe shabo, abana babo abaume na bana babo abanakashi.
25 Natulaala pa nshi pa mulandu wa nsoni,+ kabili umuseebanya nautufimba pe;+ pantu twabembukila Yehova Lesa wesu,+ ifwe ne fikolwe fyesu ukufuma ku bwaice bwesu ukufika na lelo,+ kabili tatwaumfwa kwi shiwi lya kwa Yehova Lesa wesu.”+
