Yeremia 35:1-19
35 Icebo caishile kuli Yeremia ukufuma kuli Yehova mu nshiku sha kwa Yehoyakimu+ mwana Yoshia, imfumu ya kwa Yuda, aciti:
2 “Kabiye ku ba mu ng’anda ya bena Rekabu,+ kabili ulande na bo no kubaleta mu ng’anda ya kwa Yehova, mu muputule umo uwa kuliilamo; kabili ubapeele umwangashi pa kuti banwe.”
3 E ico nasendele Yaasania mwana Yeremia mwana Habasinia na bamunyina, na bana bakwe bonse abaume, na bonse aba mu ng’anda ya kwa Rekabu,
4 nabengishe na mu ng’anda ya kwa Yehova, mu muputule wa kuliilamo+ uwa bana ba kwa Hanani mwana Igidalia, umuntu wa kwa Lesa wa cine, umuputule uwali mupepi no muputule wa kuliilamo uwa bacilolo uwali pa muulu wa muputule wa kuliilamo uwa kwa Maaseya mwana Shalumu+ umulinshi wa pa mwinshi.
5 Kabili natekele ku cinso ca ba mu ng’anda ya bena Rekabu amakapu ayaisulamo umwangashi e lyo ne fya kunwenamo, kabili nabebele nati: “Nweni umwangashi.”
6 Lelo batile: “Tatwanwe umwangashi iyo, pantu Yonadabu mwana Rekabu,+ icikolwe cesu, e watwebele, ati, ‘Mwilanwa umwangashi, imwe na bana benu, umuyayaya.+
7 Kabili mwilakuula amayanda, nangu kubyala imbuto; mwilalima amabala ya myangashi, nangu ukukwata amabala ya myangashi. Lelo muleikala mu matenti inshiku shenu shonse, pa kuti mukekale inshiku ishingi mu calo umo mwikala nga balebeshi.’+
8 E ico ifwe tumfwila ishiwi lya kwa Yehonadabu mwana Rekabu icikolwe cesu muli fyonse ifyo atwebele+ no kukananwa umwangashi inshiku shesu shonse, ifwe, abakashi besu, abana besu abaume na bana besu abanakashi,+
9 kabili tatukuula amayanda aya kwikalamo, nangu ukukwata amabala ya myangashi, nangu amabala fye nangu imbuto.
10 Kabili twikala mu matenti no kumfwila fyonse ifyo Yonadabu+ icikolwe cesu atwebele, no kucita ukulingana na fyonse ifyo atwebele.+
11 Nomba ilyo Nebukadresari imfumu ya ku Babiloni yaishile ku kulwisha icalo,+ twatile, ‘Tuleyeni twingile mu Yerusalemu pa mulandu we bumba lya bashilika ilya bena Kaldi na pa mulandu we bumba lya bashilika ilya bena Siria, kabili lekeni twikale mu Yerusalemu.’”+
12 Ne cebo ca kwa Yehova caishile kuli Yeremia, no kutila:
13 “Yehova wa mabumba, Lesa wa kwa Israele, atila, ‘Kabiye, kasose ku baYuda na ku bekashi ba mu Yerusalemu auti: “Bushe nshalemukonkomesha lyonse ukumfwila amashiwi yandi?”+ e fyasosa Yehova.
14 “Amashiwi ya kwa Yehonadabu mwana Rekabu+yena balayakonka, ayo aebele abana bakwe, ukuti belanwa umwangashi, kabili tabanwa mwangashi ukufika na buno bushiku, pantu balyumfwila ifunde lya cikolwe cabo.+ Nomba ine nalilanda na imwe, nalecelela no kulanda,+ lelo tamwang’ufwila nakalya.+
15 Kabili nalemutumina ababomfi bandi bonse bakasesema,+ ukucelela no kubatuma, nati, ‘Cila muntu aleke imibele yakwe iyabipa,+ no kuwamya imicitile yenu,+ kabili mwikonka balesa bambi no kubabombela.+ Ikaleni na mu calo ico namupeela ne fikolwe fyenu.’+ Lelo tamwakutike, nangu ukumfwa kuli ine.+
16 Lelo abana ba kwa Yehonadabu mwana Rekabu+ bena balekonka ifunde ilyo icikolwe cabo cabebele;+ lelo aba bantu tabomfwa kuli ine.”’”+
17 “E ico Yehova, Lesa wa mabumba, Lesa wa kwa Israele, atila, ‘Moneni, ndeleta pali Yuda na pa bekashi bonse aba mu Yerusalemu ubucushi bonse ubo nasosele pali bena,+ pa mulandu wa kuti nalilandile na bo lelo tabaumfwile, kabili nalebeta lelo taba-aswike.’”+
18 Na ku ba mu ng’anda ya kwa Rekabu Yeremia atile: “Yehova wa mabumba, Lesa wa kwa Israele, atila, ‘Pa mulandu wa kuti mwalyumfwila ifunde lya kwa Yehonadabu+ icikolwe cenu kabili mutwalilila ukusunga amafunde yakwe yonse no kucita ukulingana na fyonse ifyo amwebele,+
19 e ico Yehova wa mabumba, Lesa wa kwa Israele atila: “Lyonse takwakabulwe umuntu kuli Yonadabu mwana Rekabu uwa kwiminina+ ku cinso candi.”’”+
