Yeremia 42:1-22
42 E lyo abakalamba bonse aba mabumba ya bashilika na Yohanani+ mwana Karea na Yesania+ mwana Hoshaya+ na bantu bonse, ukutendekela ku munono ukufika na ku mukalamba, bapaleme
2 no kusosa kuli Yeremia kasesema abati: “Shi umfwa ukupapaata kwesu, kabili tupepeleko kuli Yehova Lesa obe,+ upepeleko abashalapo bonse aba, pantu twali abengi nomba tushele fye abanono,+ ifyo uleimwena na menso yobe.
3 Kabili Yehova Lesa obe atwebe inshila iyo tufwile ukukonka ne co tufwile ukucita.”+
4 E lyo Yeremia kasesema atile kuli bena: “Naumfwa. Moneni, nalamupepelako kuli Yehova Lesa wenu ukulingana ne fyo mwalanda;+ kabili conse ico Yehova amwasuka, nkamweba.+ Nshakafise nangu cimo kuli imwe.”+
5 Na bo batile kuli Yeremia: “Yehova nabe inte+ ya cine kabili iya cishinka kuli ifwe nga tatwakacite ukulingana na conse ico Yehova Lesa obe akutuma ukwisatweba.+
6 Nangu cibe icisuma nelyo icibi, tukomfwila ishiwi lya kwa Yehova Lesa wesu uo tulekutumako, pa kuti tube no mutende pantu twaumfwila ishiwi lya kwa Yehova Lesa wesu.”+
7 Nomba pa mpela ya nshiku ikumi (10), icebo ca kwa Yehova caishile kuli Yeremia.+
8 E ico aitile Yohanani mwana Karea na bakalamba bonse aba mabumba ya bashilika abali nankwe na bantu bonse, ukutendekela ku munono ukufika na ku mukalamba;+
9 kabili atile kuli bena: “Yehova Lesa wa kwa Israele, uo mwantumineko ukuti mfishe ukupapaata kwenu kuli ena ukwa kuti amupaale,+ atila,
10 ‘Ukwikala nga mukekala muli cino calo,+ nkamukuula kabili nshakamubongolole nakalya, nkamulimba kabili nshakamunukule nakalya;+ pantu nkomfwa ubulanda pa bucushi ubo namuletela.+
11 Mwitiina pa mulandu wa mfumu ya ku Babiloni, iyo muletiina.’+
“‘Mwitiina pa mulandu wa iyi mfumu,’+ e fyasosa Yehova, ‘pantu ndi na imwe, ku kumupususha na ku kumupokolola mu minwe ya iko.+
12 Kabili nkamumfwila nga nshi uluse, na yo ikamumfwila uluse no kumubwesesha ku calo cenu.+
13 “‘Lelo nga muletila: “Iyo; ifwe tatwakekale muli cino calo!” pa kuti mwiumfwila ishiwi lya kwa Yehova Lesa wenu,+
14 amuti: “Iyo, tukaya ku calo ca ku Egupti,+ uko tushakamone inkondo nangu ukumfwa ukulila kwa ntandala nangu ukubulwa ifya kulya; kabili tukekala kulya kwine”;+
15 e ico ndeti umfweni icebo ca kwa Yehova, mwe bashalapo ba kwa Yuda. Yehova wa mabumba, Lesa wa kwa Israele, atila: “Nga ca kuti mwapama ukuya ku Egupti no kwingila mulya no kwikalamo nga balebeshi,+
16 ulupanga ulo muletiina lukamusanga mulya mwine mu calo ca Egupti,+ ne cipowe ico muletiina cikamukonka ku Egupti;+ kabili mukafwila kulya kwine.+
17 Kabili abantu bonse abakapama ukuya ku Egupti no kwikala kulya nga balebeshi, e bakafwa ku lupanga, ku cipowe na ku cikuko;+ kabili tapakabe uukapusuka nangu uukafulumuka pali bena, pa mulandu wa bucushi ubo nkaleta pali bena.”’+
18 “Pantu Yehova wa mabumba, Lesa wa kwa Israele, atila, ‘Filya fine ubukali bwandi ne cipyu fyaishile pa bekashi ba mu Yerusalemu,+ e fyo ne cipyu candi cikesa pali imwe pa mulandu wa kuya ku Egupti, kabili mukaba abatiipwa, kabili ica kupapa kabili abo balapisha kabili mukaseebana,+ kabili tamwakamone cino cifulo na kabili.’+
19 “Yehova namusoka mwe bashalapo ba kwa Yuda. Mwiya ku Egupti.+ Kabili mwishibe ukuti ine namusoka buno bushiku,+
20 ukuti namubembukila imyeo yenu;+ pantu ni mwe mwantumine kuli Yehova Lesa wenu, amuti, ‘Tupepeleko kuli Yehova Lesa wesu; kabili ukulingana na fyonse ifyo Yehova Lesa wesu akatweba, e fyo ukasose kuli ifwe, na ifwe tukacita ifyo fine.’+
21 Kabili ndemweba buno bushiku, lelo tamwakomfwile ishiwi lya kwa Yehova Lesa wenu nangu ni fyonse ifyo antumine kuli imwe.+
22 Nomba mwishibe ukuti mukafwa ku lupanga,+ ku cipowe na ku cikuko mu calo umo mulefwaya ukuyaikala.”+