Yeremia 48:1-47
48 Yehova wa mabumba, Lesa wa kwa Israele, asosa pali Moabu,+ ati:+ “We bulanda kuli Nebo,+ pantu nabamonaula! Kiriataimu+ naseebana, kabili napokwa. Icubo cesu naciseebana kabili cili mu mwenso.+
2 Moabu+ tabakalemutatakula na kabili. Ku Heshebone+ nabapanga ukumuletela ubucushi abati: ‘Iseni tulofye Moabu pa kuti aleke ukuba uluko.’+
“Na iwe, we Madmeni, talala. Pantu ulupanga lulekukonka.
3 Kuli ukulila ku Horonaimu,+ ukonaulwa no kubongoloka ukukalamba.
4 Moabu nabongololwa.+ Abanono bakwe nabalenga ukulila ukumfwika.
5 Pantu aleya alelila pa kunina ukuya ku Luhiti+—kabili kuli ukulila. Pantu pa kufuma ku Horonaimu pali ukulila kwa bulanda pa kubongoloka+ uko abantu bomfwile.
6 “Fulumukeni; pususheni imyeo+ yenu, kabili mube ngo muti wa mukupri mu matololo.+
7 Pantu watetekela imilimo yobe ne fyuma fyobe, na iwe wine bakakwikata.+ Na Kemoshe+ akaya muli bunkole,+ pa nshita imo ine na bashimapepo bakwe na bacilolo bakwe.+
8 Kabili uwa konaula akesa mu musumba onse,+ kabili takwakabe umusumba uukapusuka.+ Ne lungu likaloba ne mpanga yabatama ikonaulwa, ifyo Yehova asosele.
9 “Peeleni kuli Moabu ifya kulangilila inshila, pantu ilyo akawa no kuba ifitantala, akaya;+ kabili imisumba yakwe ikaba ica kupapa, tamwakabe na wa kwikalamo.+
10 “Abe uwatiipwa uulebomba umulimo wa kwa Yehova no mulekelesha;+ kabili abe uwatiipwa uulekaanya ulupanga lwakwe ku mulopa!
11 “Abena Moabu baikala fye umutende ukutula ku bwaice bwabo,+ kabili baba fye ne cibote ngo mwangashi pa fiseekwa fyabo.+ Kabili tabaitululwapo ukufuma mu mutondo umo ukubabika mu mutondo umbi, kabili tabayapo na muli bunkole. E mulandu wine ukununkila kwabo kwaba fye cimo cine, na kacena kabo akasuma taka-aluka.
12 “E ico, moneni! inshiku shileisa,’ e fyasosa Yehova, ‘ilyo nkabatumina aba kubetulula ngo mwangashi, kabili bakabetulula;+ baketulula ne fili mu mitondo yabo, no kutoba imitondo yabo iikalamba.
13 Kabili abena Moabu bakomfwa insoni pali Kemoshe,+ ifyo na ba mu ng’anda ya kwa Israele baumfwa insoni pali Betele uo bacetekela.+
14 Kuti mwalanda shani amuti: “Tuli impalume kabili abaume aba maka+ sana ku kulwa ubulwi”?’
15 “‘Moabu naonaulwa, kabili nabaya ku kulwisha imisumba yakwe.+ Na balumendo bakwe abene bene nabatwalwa ku kwipaiwa,’+ e fyasosa Imfumu, uo ishina lyakwe ni Yehova wa mabumba.+
16 “Ubucushi buli mupepi no kwisa pa bena Moabu, kabili ukucula kwabo kuleangufyanya.+
17 Na bantu bonse ababashinguluka bakabalilila ubulanda, na bonse abaishiba ishina lyabo.+ Soseni amuti, ‘Iye, ifyo inkonto ya maka yakontaulwa, umutambu wa kuyemba!’+
18 “Ika pa bukata, no kwikala ne cilaka, we mwikashi wa mwana mwanakashi+ wa mu Dibone;+ pantu uwaonaula Moabu naisa ku kukulwisha. Kabili akonaula ififulo fyobe ifya malinga.+
19 “Iminina no kulolesha ku nshila, we mwikashi wa mu Aroere.+ Ipusha uulefulumuka no ulefyuka, no ufyukile, auti, ‘Cinshi cicitike?’+
20 Moabu naseebana, pantu nalengwa ukuba no mwenso.+ Lileni imisowa no kupunda. Bilisheni mu Arnone,+ ukuti Moabu naonaulwa.
21 Kabili ubupingushi nabwisa pa calo icabatama,+ pali Holone na pali Yahasi+ na pali Mefaati,+
22 na pali Dibone+ na pali Nebo+ na pali Bete-diblataimu,
23 na pali Kiriataimu+ na pali Bete-gamuli na pali Bete-maone+
24 na pali Keriote+ na pali Bosera+ na pa misumba yonse iya mu calo ca Moabu, iya kutali ne ya mupepi.
25 “‘Ulusengo lwa kwa Moabu naluputulwa,+ no kuboko kwakwe nakukontolwa,’+ e fyasosa Yehova.
26 ‘Lengeni akolwe,+ pantu alaitutumuna kuli Yehova;+ kabili Moabu alealangana mu malushi yakwe,+ kabili akasekwa.
27 “‘Bushe Israele aba ica kupumya kuli iwe?+ Nangu bushe asangilwe pa bapuupu bene bene?+ Pantu waleipukunya no kupumya lyonse ilyo ulelanda pali ena.
28 “‘Sheni imisumba no kuyaikala mu cilibwe,+ mwe bekashi ba kwa Moabu, kabili beni nge nkunda iipanga icinsa mu mbali ya filindi.’”+
29 “Twalyumfwa icilumba ca kwa Moabu+—wa matutumuko sana—twalyumfwa ukuituntumba kwakwe ne cilumba cakwe na matutumuko yakwe no kuibililika kwa mutima wakwe.”+
30 “‘Ine nalishiba icipyu cakwe,’ e fyasosa Yehova, ‘kabili te fyo cikaba; ifyo balelanda fya fye;+ tabakacite ukulingana ne fyo baleitakisha.+
31 E mulandu wine nkalilila umusowa pali Moabu, kabili nkapunda pali Moabu onse.+ Kukaba ukuloosha abena Kiri-herese.+
32 “‘Ukulila ukwacila pa kulila Yasere,+ e ko nkalila pali iwe, we mwangashi wa ku Sibma.+ Utumisambo tobe utwalelema natwabukila kwi shilya lya bemba. Natufika kuli bemba—na ku Yasere.+ Abapokolola ifipe nabasansa ifisabo fyobe ifya mu lusuba+ ne myangashi yobe iyo walobolola.+
33 Tamuli ukusekelela ne nsansa mwi bala lya miti ya fisabo na mu calo ca Moabu.+ Kabili ninenga ukuti mwiba umwangashi mu fya kukaminamo imyangashi.+ Takwakabe uukalanyantaula imyangashi no kubilikisha. Takwakabe ukubilikisha kwa nsansa.’”+
34 “‘Ishiwi lyabo lyalyumfwikike, ukulila kwabo ukufuma ku Heshebone+ ukufika na ku Eleale,+ e lyo no kwisafika ku Yahasi+ balepunda,+ ukufuma ku Soari+ ukufika na ku Horonaimu,+ na ku Egelati-shelisha;+ pantu na menshi ya mu Nimrimu+ yakonaika.
35 Kabili nkalofya muli Moabu,’ e fyasosa Yehova, ‘uwa kuleta umutuulo pa fifulo fya kupepelapo no wa kufutumwina lesa wakwe icushi ce lambo.+
36 E mulandu wine umutima wandi ukaloosesha pali Moabu, nge fimpeeta;+ kabili umutima wandi ukaloosha pa bena Kiri-herese,+ nge fimpeeta. E co fikalobela ifingi ifyo akwata.+
37 Pantu pa mutwe onse pali ipala,+ no mwefu onse nabaubeya.+ Ku minwe yonse nakutetaulwa,+ na mu musana muli insamu!’”*+
38 “‘Kuli ukulila imisowa konse konse pa mitenge+ ya kwa Moabu yonse na mu mansa shakwe shonse; pantu nintoba Moabu nge cipe ico bashatemwa,’+ e fyasosa Yehova.
39 ‘Iye, ifyo umwenso umwikete! Lileni imisowa, mwe bantu! Iye, ifyo Moabu afulumuka! Insoni nashimwikata.+ Kabili Moabu naba ica kupumya kabili ali ica kutiinya kuli bonse abamushinguluka.’”
40 “Pantu Yehova atila, ‘Filya kapumpe afooka,+ e fyo umo akafungulwila amapindo yakwe pali Moabu.+
41 Imisumba ikapokwa, ne fifulo fyakwe ifya malinga fikapokwa. Ne mitima ya mpalume sha kwa Moabu mu bushiku bulya ikaba ngo mutima wa mwanakashi ilyo alecululuka pa kupaapa.’”+
42 “‘Kabili abena Moabu bakaloba kabili tabakabeko na kabili,+ pantu ni kuli Yehova e ko balecita icilumba.+
43 Umwenso no bucinga ne citeyo fili pali iwe, we mwikashi wa mu Moabu,’+ e fyasosa Yehova.
44 ‘Onse uwafulumuka ku mwenso, akawila mu bucinga; na onse uwafuma mu bucinga, akekatwa mu citeyo.’+
“‘Pantu nkaleta pa bena Moabu, umwaka wa kubakanda,’+ e fyasosa Yehova.
45 ‘Mu cinshingwa ca kwa Heshebone e mo abafulumwike beminine, tabakwete na maka. Pantu umulilo ukafuma mu Heshebone,+ no lubingu mu kati ka Sihone;+ kabili ukoca amatempele ya kwa Moabu na pa muulu wa mitwe ya bana baume pakaba icimfulunganya.’+
46 “We bulanda kuli iwe, we Moabu!+ Abantu ba kwa Kemoshe+ nabaloba. Pantu abana bobe abaume nabasendwa ukuba bankole na bana bobe abanakashi nabasendwa ukuba bankole.
47 Kabili nkalonganika bankole ba kwa Moabu mu nshiku sha ku mpela,’+ e fyasosa Yehova. ‘Ukufika pano, ifi e fyo Moabu apingwilwe.’”+
Amafutunoti
^ Abantu balefwala “insamu” nga baleloosha nelyo nga bali no bulanda.