Yeremia 5:1-31
5 Sabanteni mu misebo ya mu Yerusalemu mumone, no kwishiba, kabili mufwaye mu mansa shakwe nga mulesangamo umuntu,+ nga mwaliba umuntu uucita umulinganya,+ uufwaya icishinka,+ ninshi Yerusalemu kuti namwelela.
2 Nangu basose abati: “Na pali Yehova!” balelapa fye ubufi.+
3 Mwe Yehova, bushe te pa cishinka amenso yenu yalolesha?+ Namuboma,+ lelo tabalwele.+ Namubalofya.+ Nabakaana ukubasalapula.+ Nabakosha ifinso fyabo ukucila icilibwe.+ Nabakaana ukubwela.+
4 Na ine natile: “Kwena aba bantu ba pa nshi. Nabacita ifya buwelewele, pantu nabakaana inshila ya kwa Yehova, ubupingushi bwa kwa Lesa wabo.+
5 Nkaya ku bacindami no kulanda nabo;+ pantu bena bafwile balishiba inshila sha kwa Yehova, ubupingushi bwa kwa Lesa wabo.+ Cine cine bonse bafwile balifuna ikoli; baliputaula ifikakilo.”+
6 E mulandu wine inkalamo ukufuma mu mutengo ibasanshiile,+ kabili baleikatwa ku mumbulu wa mu ciswebebe, ne mbwili ilebalolela ku misumba yabo.+ Onse uwafumamo, alasantaulwa. Pantu bumpulamafunde bwabo nabufula; ne membu shabo nashifula.+
7 Bushe kuti nakwelela shani? Abana bobe nabansha, kabili balelapa+ uushili Lesa.+ Nalebapeela fyonse,+ lelo batwalilile ukucita ubucende,+ no kulaya umulongo ku ng’anda ya kwa cilende.
8 Balisanguka nga bakabalwe abali ne nsuuna iyaluma, abashinaka ukutamfya abakota. Onse afwaya umukashi wa munankwe.+
9 “Bushe nshifwile ukubalubulwisha pa mulandu wa ifi?” e fyasosa Yehova.+ “Kabili bushe nshifwile ukulandula ku luko lwa musango yu?”+
10 “Kabiyeni ku mitande yakwe iya myangashi no kuyonaula,+ lelo mwionaula yonse.+ Mufumyeko fye utumisambo twakwe utwalelema, pantu te twa kwa Yehova iyo.+
11 Pantu aba mu ng’anda ya kwa Israele na ba mu ng’anda ya kwa Yuda balimbepa,” e fyasosa Yehova.+
12 “Balikaana Yehova, kabili basosa abati, ‘Tabako.+ Ububi tabwakese pali ifwe, kabili tatwakepaiwe ku lupanga ne cipowe tacakatwishile.’+
13 Kabili bakasesema nabasanguka aba fye, ne cebo tacaba muli bena.+ E fyo cikaba kuli bena.”
14 E ico Yehova, Lesa wa mabumba, atila: “Pa mulandu wa kuti imwe mulesosa ifi, moneni, ndelenga amashiwi yandi ukuba umulilo mu tunwa twenu,+ na ba bantu bakaba inkuni, kabili umulilo ukaboca.”+
15 “Moneni ndeleta pali imwe uluko ulwa kutali,+ mwe ba mu ng’anda ya kwa Israele,” e fyasosa Yehova. “Uluko ulwa nshiku ne nshiku.+ Uluko ulwa kale na kale, uluko ulo mushaishiba ululimi lulanda, kabili teti mumfwe no kwishiba ifyo balanda.
16 Umufuko wabo uwa kulongamo imifwi waba nge nshiishi; kabili bonse ni mpalume.+
17 Kabili bakalya ifyo mukalobolola no mukate wenu.+ Bakalya abana benu abaume na bana benu abanakashi. Bakalya impaanga shenu ne ng’ombe shenu. Bakalya imyangashi yenu ne mikunyu yenu.+ Bakonaula ne misumba yenu iya malinga iyo mwacetekelamo.”
18 Yehova atila, “Na muli shilya shine nshiku, nshakamulofye.+
19 Na imwe mukasosa amuti, ‘Nga kanshi cinshi ico Yehova acitila fyonse ifi kuli ifwe?’+ Ukabebe auti, ‘Filya fine na imwe munshile no kubombela lesa umbi mu calo cenu, e fyo na imwe mukabombela abantu bambi bambi mu calo icishili cenu.’”+
20 Shimikeni ici ku ba mu ng’anda ya kwa Yakobo, kabili sabankanyeni muli Yuda, amuti:
21 “Umfweni mwe bashakwata amano, mwe bashaba na mutima usuma:+ Balikwata amenso lelo tabamona;+ balikwata na matwi lelo tabomfwa.+
22 ‘Bushe te kuti muntiine,’+ e fyo asosa Yehova, ‘nangu ukusakamikwa nga nshi pa mulandu wandi,+ ne wabika umucanga ukuba umupaka wa bemba, ukuba icipope ca muyayaya pa kuti bemba epita ukucilapo? Nangu amabimbi yaima shani, te kuti yapite ukucilapo; nangu yasunkana shani, te kuti yapite ukucilapo.+
23 Lelo aba bantu baliba no mutima uwatalama kabili uwa bucipondoka; balyaluka no kulaenda mu nshila yabo.+
24 Lelo tabatila mu mitima yabo: “Lekeni nomba tutiine Yehova Lesa wesu,+ Uupeela imfula e lyo ne mfula ya kubangilila ne mfula ya mulekelelo,+ uusunga imilungu umo yatantikilwa iya kulobolola kwesu.+
25 Ifilubo fyenu nafitalusha ifi fintu, kabili imembu shenu e shicilikile ubusuma ukuti bwi-isa kuli imwe.+
26 “Pantu mu bantu bandi namusangwa ababifi.+ Kabili balalengela, filya abekata ifyuni babendelela.+ Bateya iciteyo ca konaula. Abantu e bo bekata.
27 Filya muli kasalanga mwisula ifyuni, e fyo amayanda yabo yaisulamo ubucenjeshi.+ E mulandu wine babela abacindami kabili e co banonkela icuma.+
28 Baliina;+ kabili balitelela, no bubi bwabo bwalifula. Tabalubulwilako abali ne milandu,+ nangu fye mulandu wa mwana wa nshiwa,+ ukuti batunguluke;+ tabalubulwilako na balanda.’”
29 “Bushe nshifwile ukubalubulwisha pa mulandu wa ifi?” e fyasosa Yehova, “kabili bushe nshifwile ukulandula ku luko lwa musango yu?+
30 Ica kupapusha, kabili icabipa nacicitwa mu calo.+
31 Bakasesema basesema ifya bufi;+ na bashimapepo ku maka yabo banyantilila abantu.+ Na bo abantu bandi e fyo batemwa;+ nga kanshi cinshi mukacita pa mpela ya ifi?”+
